Citima Cambura Kumara

MUNTHU munyake wakakhumbanga kumanya umo ŵanthu awo ŵakutemweka ŵawo ŵali kutayika ŵakujipulikira para pajumpha nyengo. Wakatumira mafumbo ŵapapi ŵanji awo ŵana ŵawo ŵakatayika vilimika vyakumanyuma. Mbapapi wose yayi ŵakamuzgora. Dada munyake, zina lake Vladimir uyo mwana wake wakaŵa watayika vilimika vinkhondi kumanyuma, wakati cikaŵa cakusuzga kuti wayowoye za mwana wake.a

Citima cambura kumara ici ndico cikuŵa na ŵapapi ŵanandi awo ŵana ŵawo ŵali kutayika. Vilimika khumi ivyo vyajumpha, mwana wa William wakafwa nyifwa ya mu maji. William wakalemba kuti: “Nicali na citima mpaka sono, ndipo cizamumarapo yayi mpaka nyifwa yane.” Lucy, uyo mwana wake wakatayika mwamabuci vilimika vinkhondi ivyo vyajumpha, wakalemba kuti: “Mazuŵa ghakwambilira nkhagomezganga yayi kuti vyacitika nadi. Nkhawonanga nga nkhutulo. Pakati pajumpha nyengo, nkhamanya kuti wafwa nadi. Wakazgeŵa mu maso. Nangauli pajumpha vilimika vinkhondi kufuma apo mwana wane wali kutayikira, kweni nyengo zinyake para nili panekha nkhumulira.”

Nchifukwa wuli ŵapapi awo ŵana ŵawo ŵali kutayika, nga ni Vladimir, William, na Lucy ŵakuŵa na citima cambura kumara? Tiyeni tiwone vifukwa vinyake.

Cifukwa Wuli Citima Cikuŵa Cikuru?

Para mu mbumba mwasangika bonda, ŵapapi ŵakuŵa na cimwemwe cambura mayowoyeko. Ŵakuŵa ŵakukondwa comene, kweniso ŵakukhorwa para ŵamukolera mwana wawo, kumuwona wagona, panji para wakumwemwetera. Ŵapapi ŵacitemwa ŵakuŵapwelelera ŵana ŵawo. Ŵakuŵasambizga kuti ŵaŵe na nkharo yiwemi kweniso nchindi. (1 Ŵatesalonika 2:7, 11) Para ŵana ŵawo ŵakukura mwakuyana na umo ŵakuŵasambizgira, ŵapapi ŵakunotha, ndipo ŵakwamba kuŵa na cigomezgo mwa iwo.

Ŵapapi awo ŵakupwelelera ŵana ŵawo, ŵakuyezgayezga kuŵasangira ivyo ŵakukhumba. Kanandi ŵakusunga ndarama panji katundu kuti vizakawovwire ŵana ŵawo munthazi. (2 Ŵakorinte 12:14) Vyose ivyo ŵapapi ŵakucita kwali nchitemwa ico ŵakulongora, nyengo iyo ŵakumalira kucezga nawo, na ndarama izo ŵakuŵasungira, vikulongora waka kuti ŵapapi pakulera ŵana ŵawo ŵakuŵavya cilindizga cakuti ŵafwenge. Para mwana watayika, mulimo wa kulera uwo ŵapapi ŵanguŵa nawo, ukudumulizgika, ndipo cigomezgo cawo pa iyo cikumalira papo. Citemwa ico ŵapapi ŵakuŵa naco pa mwana wawo cikudumulizgika na nyifwa. Ŵapapi ŵakuŵelengera para ŵali na mwana, kweni para watayika, vyose vikumalira papo. Ndipo ŵapapi ŵakuŵa na citima ico nchakusuzga kuti cimare.

Baibolo nalo likulongora kuti ŵapapi awo ŵana ŵawo ŵatayika ŵakuŵa na citima cikuru kweniso cambura kumara. Pakuyowoya ivyo vikacitika apo Yakobe wakapulika kuti mwana wake Yosefe wakomeka, Baibolo likuti: Yakobe “wakapalura vyakuvwara vyake, na kuvwara cigudulu mu ciwunu cake, wakamutengelera mwana wake mazuŵa ghanandi. Ŵana ŵake wose ŵanalume na ŵanakazi ŵakawuka kuyakamusanguluska; kweni wakakana kusanguluskika, wakati, ‘Cara, nditindikhilire mu dindi ku mwana wane na kuliralira.’” Pakati pajumpha vilimika, Yakobe wakalutilira kulira mwana wake uyo wakaghanaghananga kuti wali kufwa. (Genesis 37:34, 35; 42:36-38) Ciyelezgero cinyake ca mu Baibolo cikuyowoya za mwanakazi wakugomezgeka zina lake Naomi, uyo ŵana ŵake ŵaŵiri ŵakatayika. Cifukwa ca citima cikuru ico wakaŵa naco, wakaghanaghana kuti wasinthe zina lake lakuti Naomi, ilo likang’anamuranga kukondwa, ndipo wacemekenge Mara, kung’anamura vyakuŵinya.—Ruth 1:3-5, 20, 21.

Ndipouli, Baibolo kuti likuyowoya waka za citima ico ŵapapi awo ŵana ŵawo ŵapotera ŵakuŵa naco yayi. Likuyowoyaso umo Yehova wakupelekera nkhongono kwa awo ŵakulira. Mu nkhani yakulondezgapo tiwonenge nthowa zinyake izo Ciuta wakusanguluskira awo ŵakulira.

[Mazgu ghamusi]