Kovwira Awo Ŵakusuzgika Kuŵazga
1. Cifukwa wuli nchakusuzga kusambira Baibolo na ŵanthu awo ŵakusuzgika kuŵazga?
1 Ŵanthu awo ŵakusuzgika kuŵazga, ŵanganweka na vinthu vyauzimu, kweni ŵangawona nga ŵangafiska yayi kuŵazga Baibolo panji mabuku ghanyake. Ŵangasanga candulo viŵi yayi para tingamba kuŵagaŵira buku la Baibolo Likusambizgaci. Kasi ŵanthu aŵa tingaŵawovwira wuli mwauzimu? Tikafumba ŵapharazgi ŵaluso kufuma mu vyaru vyakujumpha 20 kuti ŵatiphalireko ivyo ŵakucita. Pasi apa pali masacizgo ghawo.
2. Kasi ŵanthu awo wakusuzgika kuŵazga tingaŵawovwira na mabuku wuli?
2 Usange munthu wakusuzgika kuŵazga panji wakumanya yayi, mungamba kusambira nayo burosha la Tegherezgani kwa Ciuta panji la Tegherezgani kwa Ciuta na Kuŵa Wamoyo Kwamuyirayira. Mupayiniya munyake ku United States wakulongora munthu maburosha ghose ghaŵiri na kumupempha kuti wasankhepo ilo wakuwona kuti ndipusu kwa iyo. Munthu wakusambira wangazomera kuŵazga ndime na kumufumba mafumbo, kweni uyo wakusuzgika kuŵazga wangawona nga mukumusuzga. Usange ŵakumana na munthu uyo wakuŵazgako makora, ŵapharazgi ŵanandi ŵakwamba kusambira nayo maburosha gha Ciuta Wakutiphalira Uthenga Uwemi!, panji Mungaŵa Bwezi la Ciuta!, na Buku Lane la Nkhani za mu Baibolo.
3. Kasi mukwenera kucita vici kuti muŵasambizge makora awo ŵakumanya yayi kuŵazga?
3 Ŵawongani: Awo ŵakumanya yayi kuŵazga ŵakucita soni, ndipo ŵanandi ŵakujidelera. Kuti muŵasambizge unenesko, mukwenera dankha kuŵawovwira kuti ŵaleke kucita soni. Ŵacindikani. (1 Pet. 3:15) Ŵalutilirenge kusambira usange ŵakuwona kuti ŵakuphyoka pawaka yayi kweniso kuti ŵakukura mwauzimu. Ntheura, nyengo zose ŵawongani pa ivyo ŵakucita makora.
Awo ŵakumanya yayi kuŵazga ŵakucita soni, ndipo ŵanandi ŵakujidelera. Kuti muŵasambizge unenesko, mukwenera dankha kuŵawovwira kuti ŵaleke kucita soni
4. Kasi awo ŵakusuzgika kuŵazga tingaŵawovwira wuli kuti ŵanozgekerenge sambiro?
4 Nanga ni para uyo mukusambira nayo wakusuzgika kuŵazga, muciskani kuti wanozgekerenge sambiro. Ŵapharazgi ŵanyake ku South Africa ŵakuphalira awo ŵakusambira nawo kuti ŵapemphe munthu uyo wakumanya kuŵazga kuti waŵawovwire. Mupharazgi munyake ku Britain wakuciska ŵasambiri ŵake kuti ŵanozgekerenge. Wakuŵapa buku lake ilo wagwaramo mzere na kusambirapo nawo ndime zicoko waka kuti ŵawone umo vikuŵira vipusu kusanga mazgoro para ŵaghagwara mzere. Mubali munyake ku India wakuciska awo wakusambira nawo kuti ŵawonerengethu vithuzi ivyo vili mu sambiro lakulondezgapo na kughanaghanirapo.
5. Kasi tingalongora wuli kuti ndise ŵakuzikira para tikusambira na munthu?
5 Zikirani: Kwali mukusambira nayo buku wuli, ŵikani mtima pa fundo zikuru na kumovwira uyo mukusambira nayo kuti wazipulikiske makora. Madazi ghakwambilira, mungadumbiskana nayo maminiti 10 panji 15. Kweniso kusambira nayo vinandi yayi. Mungasambira nayo ndime zicoko waka. Zikirani para uyo mukusambira nayo wakuŵazga pacokopacoko. Para wamba kutemwa na kumumanya makora Yehova, wangaciskika kuti wambe kuŵazga makora. Kuti wacite nthena, nchiwemi kumucemera ku maungano gha mpingo para mwamba waka kusambira nayo.
6. Kasi mungaŵawovwira wuli ŵanthu kuti ŵamanye kuŵazga?
6 Usange munthu wamanya kuŵazga wangakura luŵiro mwauzimu. (Sal. 1:1-3) Ŵapharazgi ŵanandi ŵawovwira awo ŵakusambira nawo kuti ŵamanye kuŵazga. Ŵakuŵawovwira na buku la Dziperekeni pa Kuwerenga ndi Kulemba kuumaliro wa sambiro lililose. Usange uyo mukusambira nayo wamba kugongowa, mungamovwira kuti waleke kujikayikira. Mungamuphalira vinthu ivyo wamanya kufuma apo mukambira kusambira nayo. Musimikizgirani kuti Yehova wamutumbikenge cifukwa ca ivyo wakucita, na kumuciska kuti walombenge. (Zinth. 16:3; 1 Yoh. 5:14, 15) Ŵapharazgi ŵanyake ku Britain ŵakuciska awo ŵakusambira nawo kuti ŵaŵenge na vilato ivyo ŵangafiska, nga kumanya vilembo vya alufabeti, kusanga mavesi, na kuŵazga mabuku ghapusu agho ghakulongosora Baibolo. Kuti musambizge ŵanthu kumanya kuŵazga, mukwenera kuŵawovwira kuti ŵaŵe na khumbo lakuti ŵamanye kuŵazga.
7. Cifukwa wuli tikwenera kuleka yayi kusambizga awo ŵakusuzgika kuŵazga?
7 Ŵanthu awo ŵandasambire comene, Yehova wakuŵawona kuti mbapasi yayi. (Job 34:19) Yehova wakupenja mtima. Ntheura kuleka yayi kusambizga awo ŵakusuzgika pakuŵazga. Pali mabuku ghanandi agho mungambirapo. Para nyengo yajumphapo, mungamba kusambira nayo mu buku la Baibolo Likusambizgaci kuti wapulikiske makora Malemba.