Umo Tingachitira Pakupharazga na Buku la Kasi Baibolo Likutisambizga Vichi?

Buku la Baibolo Likutisambizga Vichi? likuyanako waka na la Baibolo Likusambizgachi? Mabuku agha ghali na nkhani zakuyana ndipo tingasambizgira ŵanthu unenesko. Kweni mphambano njakuti buku la Baibolo Likutisambizga Vichi? lili kulembeka munthowa yipusu ndipo likuyowoya fundo mwakudumura. Buku ili lili kulembekera ŵanthu awo ŵangasuzgikira kupulikiska ivyo vili mu buku la Baibolo Likusambizgachi? Chinyake ntchakuti, mu buku la Baibolo Likutisambizga Vichi? muli mazgu ghakuumaliro m’malo mwa vyakusazgirapo. Mazgu ghakuumaliro agha ghakulongosora mazgu na fundo zinyake izo zikusangika mukati mu nkhani. Pa mutu uliwose, palije mafumbo ghakwambilira panji bokosi lakuweleramo. Kweni paumaliro wa mutu uliwose, pali fundo zakudumura izo zalongosoreka mukati mu nkhani. Tingagaŵira buku la Baibolo Likutisambizga Vichi? nyengo yiliyose, nga umo tikuchitira na la Baibolo Likusambizgachi?, nanga mwezi uwo ŵandayowoye kuti ndilo tigaŵirenge. Kasi tingagwiliskira wuli ntchito vigaŵa vyapadera vya buku ili para tikuchitiska sambiro la Baibolo?

FUNDO ZAKUDUMURA: Ŵanthu ŵanandi ŵangatemwa kuti tisambirenge nawo pakulondezga nthowa ya kuŵazga ndime na kufumba mafumbo, umo tikusambilira buku la Baibolo Likusambizgachi? Kweni tiyelezgere kuti uyo mukusambira nayo wakuchimanya makora yayi chiyowoyero panji wakutondeka kuŵazga makora. Para vyaŵa nthena, mungasambira nayo mu buku la Baibolo Likutisambizga Vichi? Ndipo mungadumbiskana nayo waka fundo zakudumura pa mutu uliwose na kumupempha kuti payekha waŵazgenge nkhani yose. Mungatora maminiti 15 kusambira na munthu pa unenesko uliwose. Pakuti pa fundo zakudumura palije vinandi, uyo wakusambizga wakwenera kunozgekera makora, ndipo wakwenera kughanaghanira umo msambiri wake waliri. Para mwasankha kuti msambiri musambire nayo nkhani yose, mungazakaweleramo nayo waka fundo zakudumura.

MAZGU GHAKUUMALIRO: Mazgu na fundo izo zili pa chigaŵa ichi, zili kulembeka kuyana na apo zikusangika mu nkhani yose. Msambizgi wangasankha kudumbiskana mazgu ghakuumaliro na msambiri pa nyengo iyo ŵakusambira panji yayi.