Kasi Ŵakaboni ŵa Yehova Ŵakugomezga Tesitamenti Lakale?

Enya. Ŵakaboni ŵa Yehova ŵakugomezga kuti Baibolo lose ‘ndakupelekeka na Chiuta ndipo ndachandulo.’ (2 Timote 3:16) Kung’anamura Tesitamenti Lakale na Tesitamenti Lasono. Ŵakaboni ŵa Yehova ŵakuti Tesitamenti Lakale ni Malemba gha Chihebere ndipo Tesitamenti Lasono ni Malemba Ghachigiriki. Tikuyowoya nthena chifukwa tikuwona kuti vigaŵa vyose vya Baibolo ni vyakuzirwa ndipo vichali kugwira ntchito.

Chifukwa Wuli Ŵakhristu Ŵakwenera Kugomezga Tesitamenti Lakale na Tesitamenti Lasono?

Mpositole Paulosi wakalemba kuti: “Vinthu vyose ivyo vikalembeka kale, vikalembeka kuti vitisambizge.” (Ŵaroma 15:4) Ichi chikung’anamura kuti mu Malemba Ghachihebere namo muli mdauko na ulongozgi wakuzirwa.

• Mdauko wakovwira. Malemba Ghachihebere ghakulongosora umo Chiuta wakalengera vinthu na umo ŵanthu ŵakanangira. Vinthu ivi vilekenge kulembeka, mphanyi tikughamanya yayi mazgoro gha mafumbo ghakuzirwa nga ghakuti: Kasi ŵanthu ŵakafuma nkhu? Chifukwa wuli ŵanthu ŵakufwa? (Genizesi 2:7, 17) Malemba Ghachihebere ghakulongosoraso umo Yehova wakachitiranga vinthu na ŵanthu ŵakale, awo vikaŵayenderanga na awo ŵakakumananga na masuzgo nga agho tikukumana nagho.—Yakobe 5:17.

• Ulongozgi wakovwira. Buku la Zintharika na Mupharazgi, ghakusangika mu Malemba Ghachihebere, ghali na ulongozgi uwo ukutchujuka yayi ndipo ngwakovwira pa umoyo withu. Ulongozgi uwu ukutovwiraso umo tingakhalira ŵakukondwa mu mabanja ghithu (Zintharika 15:17), umo tikwenera kuwonera ntchito (Zintharika 10:4; Mupharazgi 4:6), na umo ŵanyamata ŵangachitira kuti vinthu viŵayendere makora (Mupharazgi 11:9–​12:1).

Tikusangaso fundo zakuzirwa chomene para tikuŵerenga Dango la Mozesi, ilo likusangika mu mabuku ghankhondi ghakwambilira gha mu Tesitamenti Lakale (Torah). Nangauli Dango ili likalembekera Ŵakhristu yayi, kweni lili na fundo ziwemi izo zingatovwira kuti tiŵenge ŵakukondwa na umoyo withu.—Levitiko 19:18; Dotoronome 6:5-7.