Kovwira Awo Ŵakuleka Kugomezga Baibolo na Awo Ŵakuti Ciuta Kulije
1. Kasi ni waliyose uyo wanganweka na buku la Baibolo Likusambizgaci paulendo wakwamba? Longosorani.
1 Kuti munthu wambe kusopa Yehova, wakwenera kumanya ivyo Baibolo likusambizga. Kweni ŵanthu ŵanyake ŵali mu visopa ivyo ni Vyacikhristu yayi ndipo ŵakuti Baibolo ni Mazgu gha Ciuta yayi. Ŵanji ŵakugomezga kuti Ciuta kulije, ntheura Baibolo ŵalije nalo nchito. Kasi ŵanthu aŵa tingaŵawovwira wuli pambere tindambe kusambira nawo buku la Baibolo Likusambizgaci? Masacizgo agho ghali pasi apa ghafuma ku ŵapharazgi ŵa mu vyaru 20.
2. Para munthu wakuti wakugomezga mwa Ciuta yayi, kasi tikwenera kumanya vici ndipo cifukwa wuli?
2 Awo Ŵakugomezga mwa Ciuta Yayi: Usange munthu wakuti wakugomezga mwa Ciuta yayi tikwenera kumanya cifukwa cake. Kasi cingaŵa cifukwa cakuti wakugomezga kuti vinthu vikaŵako vyekha? Panji nchifukwa ca vinthu vyambura urunji na upusikizgi uwo ukucitika mu visopa? Kasi wakufuma mu caru ico cikuyuzga awo ŵakugomezga Ciuta? Panyake wakukana yayi kuti Ciuta waliko, kweni wakuwona kuti palije cifukwa cakumugomezgera. Ŵapharazgi ŵanandi ŵakutemwa kufumba kuti, “Kasi ndivyo mukugomezga kwamba kale?” Fumbo ili likovwira kuti munthu walongosore. Tegherezgani kwambura kumudumulizga. Para tamanya cifukwa ico munthu wakulekera kugomezga mwa Ciuta, tingamanya umo tingamuzgolera kweniso buku ilo tingamupa.—Zinth. 18:13.
3. Kasi tingalongora wuli kuti tikucindika ŵanthu na ivyo ŵakugomezga?
3 Pakuzgora, tikwenera kucenjera mwakuti munthu waleke kuwona nga tikumususka. Mupharazgi munyake ku United States wakati: “Nchakuzirwa kucindika wanangwa wa munthu wakugomezga ivyo wakukhumba. M’malo mwa kukhumba waka kuwina nkhani iyo tikudumbiskana, tikwenera kufumba mafumbo agho ghangawovwira munthu kughanaghanirapo na kuwamo yekha.” Para munthu wayowoya maghanoghano ghake, mulaŵiliri munyake wa dera wakutemwa kufumba kuti, “Kasi muli kughanaghanirapo fundo iyi?”
4. Kasi tingaŵawovwira wuli Ŵabuda?
4 Ku Ŵabuda ŵanandi, nchacilendo kuti kuli Ciuta. Usange ŵakupharazgira ŵanthu aŵa, ŵapharazgi ŵanyake ku Britain ŵakutemwa kudumbiskana nawo burosha la Cingelezi la Lasting Peace and Happiness—How to Find Them. Para ŵalongosora mazgu ghakwamba, ŵakudumbiskana nawo cigaŵa cakuti “Is There Really a Most High Creator?” na cakuti “A Guidebook for the Blessing of All Mankind.” Kufuma apo, ŵakuŵalongora buku la Baibolo Likusambizgaci na kuŵaphalira kuti, “Nangauli mukugomezga kuti Ciuta kulije, kweni mungasanga candulo para mungaŵazga Baibolo, cifukwa muli ulongozgi wakovwira.” Mupayiniya munyake ku United States uyo wakupharazgira ŵanthu ŵa ku China wakati, “Ŵanthu ŵanandi ŵa ku China ŵakutemwa kuŵazga. Kanandi, para tikuwelerako tikusanga kuti ŵaŵazga kale buku lose. Kweni para tikuŵaphalira za sambiro, nyengo zinyake ŵakumanya yayi kuti ni vici. Ntheura, paulendo wakwamba, nkhuŵagaŵira burosha la Uthenga Uwemi!, cifukwa lili kulembeka kuti munthu waŵazgenge yekha yayi.” Mulaŵiliri wa cigaŵa uyo wakwendera mipingo ya Cichayinizi ku United States wakati nyengo zinyake tingamulongora munthu buku la Baibolo Likusambizgaci paulendo wakwamba. Ndipouli, m’malo mwa kwamba cipaturo 1, ico cikulongosora za Ciuta, cingaŵa ciwemi kwamba cipaturo 2, ico cikulongosora mwakudumura uthenga uwo uli mu Baibolo.
5. Cifukwa wuli kuzikira nkhwakukhumbikwa?
5 Vikutora nyengo kuti munthu waŵe na cipulikano mwa Ciuta. Ntheura kuzikira nkhwakukhumbikwa. Kuti munthu wakhorwe kuti kuli Mlengi, nyengo zinyake tikwenera kudumbiskana nayo kanandi, kamoza pera yayi. Kweni para tingafwilirapo, nyengo zinyake wangamba kugomezga, panji wangamba kupulikiska cifukwa ico ŵanji ŵakuyowoyera kuti kuli Mlengi.
6. Cifukwa wuli ŵanthu ŵanyake ŵakuligomezga yayi Baibolo?
6 Awo Ŵakuleka Kugomezga Baibolo: Ŵanthu awo ŵakugomezga kuti Ciuta waliko, kanandi ŵakugomezga yayi ivyo Baibolo likusambizga, cifukwa ŵakughanaghana kuti ni Mazgu gha Ciuta yayi. Panji cingaŵa cifukwa cakuti ŵakukhala mu caru ico kulije Ŵakhristu. Panji ŵakukhala mu caru ico muli Ŵakhristu ŵanandi kweni ŵakulondezga yayi ivyo Baibolo likuyowoya. Ntheura ŵakuwona kuti Baibolo lingaŵawovwira yayi. Kasi tingaŵawovwira wuli ŵanthu ŵanthena kuti ŵambe kugomezga Baibolo na kuzomera kuti tisambirenge nawo buku la Baibolo Likusambizgaci?
7. Kasi tingaŵawovwira wuli ŵanthu kuti ŵambe kugomezga Baibolo?
7 Ofesi ya munthavi ku Greece yikati: “Nthowa yiwemi iyo tingawovwilira ŵanthu awo ŵakuleka kugomezga Baibolo nkhuŵajulira na kuŵalongora ivyo likuyowoya. Ŵapharazgi ŵanandi ŵawona kuti Mazgu gha Ciuta ngankhongono kuluska cilicose ico ŵangayowoya. (Heb. 4:12) Ŵanthu ŵanandi ŵakwamba kuŵazga Baibolo para ŵawona zina la Ciuta mu Baibolo.” Ofesi ya munthavi ku India yikati: “Ŵahindu ŵanandi ŵakunweka para mukudumbiskana nawo ivyo vikucitika para munthu wafwa. Ndimoso ŵakucitira para mukudumbiskana nawo ivyo Baibolo likulayizga pa nkhani ya sankho.” Kumanya masuzgo gha ŵanthu awo ŵakuŵapharazgira, kukovwira ŵapharazgi kuti ŵalongosore ivyo Ufumu wa Ciuta uzamucita kuti unozge vinthu.
8. Kasi tingayowoyaci ku ŵanthu awo ŵakuleka kugomezga Baibolo cifukwa ca ivyo ŵanthu awo ŵakuti Mbakhristu ŵakucita?
8 Ŵanthu ŵanyake ŵakuligomezga yayi Baibolo cifukwa ca ivyo ŵanthu awo ŵakuti Mbakhristu ŵakucita. Usange mwasangana na munthu wanthena, muphalirani kuti visopa Vyacikhristu vikubendezga Baibolo kweniso vikulondezga yayi ivyo likusambizga. Ofesi ya munthavi ku India yikati: “Nyengo zinyake tikwenera kuŵawovwira ŵanthu kumanya kuti machalichi ghakulimanya makora yayi Baibolo.” Ofesi iyi yikati Ŵahindu ŵakukondwa na cigaŵa 4 ca burosha lakuti Kodi Chifuno cha Moyo Nchiyani—Kodi Mungachipeze Motani? Cigaŵa ici cikulongosora umo machalichi ghasukuluskira Mazgu gha Ciuta. Mupayiniya munyake ku Brazil wakuphalira ŵanthu kuti: “Wuli mulisande makora Baibolo kuti mumanye ivyo likuyowoya? Ndivyo ŵanthu ŵanandi ŵakucita. Iwo ŵakucita nthena kwambura kughanaghanira ivyo ŵakugomezga mu cisopa cawo. Muzizwenge na ivyo musambirenge.”
9. Cifukwa wuli tikwenera kugongowa yayi para pakwamba ŵanthu ŵakunweka yayi na ivyo Baibolo likusambizga?
9 Yehova wakuwona mtima wa munthu waliyose. (1 Sam. 16:7; Zinth. 21:2) Wakuguza ŵamitima yiwemi kuti ŵambe kumusopa. (Yoh. 6:44) Ŵanandi mwa ŵanthu aŵa ŵakuŵa kuti ŵandasambirepo za Ciuta panji ŵakumanya vicoko waka vya Baibolo. Uteŵeti withu ukuŵapa mwaŵi wakuti “ŵafike pa kumanya makora unenesko na kuponoskeka.” (1 Tim. 2:4) Ntheura, para pakwamba ŵanthu ŵakunweka yayi na ivyo Baibolo likusambizga, kugongowa yayi! Mungamba kudumbiskana nawo mabuku agho ghali mu ciyowoyero cinu kuti ŵambe kunweka. Ndipo kuyana na umo ŵakucitira, mungamba kusambira nawo buku la Kasi Baibolo Likusambizgaci Comenecomene?
[Bokosi pa peji 4]
Para munthu wakugomezga mwa Ciuta yayi, yezgani masacizgo agha:
• Mufumbani kuti, “Kasi ndivyo mukugomezga kwamba kale?” kuti mumanye cifukwa cake.
• Para ni Mubuda, dumbiskanani nayo burosha la Cingelezi la Lasting Peace and Happiness—How to Find Them, peji 9-12.
• Usange wakugomezga kuti vinthu vikaŵako vyekha, ivyo vili pasi apa vingawovwira:
Nkhani za mu Galamukani! zakuti “Kodi Zinangochitika Zokha?”
Vidiyo ya Cingelezi yakuti The Wonders of Creation Reveal God’s Glory
Maburosha gha Umo Tingasangira Umoyo Wakukhorweska, cigaŵa 4; Was Life Created?; na The Origin of Life—Five Questions Worth Asking
• Usange wakugomezga yayi cifukwa ca vinthu vyambura urunji na upusikizgi uwo ukucitika mu visopa, mabuku panji maburosha agho ghali pasi apa ghangawovwira:
Buku la Cingelezi la Is There a Creator Who Cares About You?, cipaturo 10
Maburosha gha Kasi Ciuta Wakutipwelelera Nadi?, cigaŵa 6, na Kodi Chifuno cha Moyo Nchiyani?, cigaŵa 6
• Mungamba kusambira buku la Baibolo Likusambizgaci para munthu wamba kuzomerezga kuti Ciuta waliko. Cingaŵa ciwemi kwamba cipaturo 2 panji nkhani yiliyose iyo yingaŵa yakwenelera kuyana na munthu uyo mukudumbiskana nayo.
[Bokosi pa peji 5]
Usange munthu wakuligomezga yayi Baibolo, yezgani masacizgo agha:
• Dumbiskanani nayo vipaturo 17 na 18 vya buku la Cingelezi la Life—How Did It Get Here? By Evolution or by Creation?
• Para ni Mubuda, dumbiskanani nayo burosha la Cingelezi la Why Should We Worship God in Love and Truth?
• Para ni Muyuda, dumbiskanani nayo burosha la Cingelezi la Will There Ever Be a World Without War?, peji 3-11.
• Longosorani vyandulo ivyo munthu wakusanga para wakulondezga ivyo Baibolo likuyowoya. Pasi apa pali ivyo vingamovwirani pa nkhani iyi:
Nkhani za mu Galamukani! zakuti “Mfundo Zothandiza Mabanja”
Vidiyo ya Cingelezi yakuti The Bible—Its Power in Your Life
Maburosha gha Ciuta Wakutiphalira Uthenga Uwemi!, sambiro 9 na 11; Buku la Anthu Onse, peji 22-26; na Umo Tingasangira Umoyo Wakukhorweska, cigaŵa 2
Para ni Mubuda dumbiskanani nayo burosha la Cingelezi la The Pathway to Peace and Happiness, peji 3-7.
Para ni Musilamu dumbiskanani nayo burosha la Real Faith—Your Key to a Happy Life, cigaŵa 3.
Para ŵanthu mu cigaŵa cinu ŵakulitinkha Baibolo, cingaŵa ciwemi kuleka kuyowoya uko kwafuma ivyo mukudumbiskana. Mungayowoya para munthu mwamwendera kanandiko.
• Longosorani umo maucimi gha mu Baibolo ghafiskikira. Pasi apa pali ivyo vingamovwirani:
Vidiyo ya Cingelezi ya The Bible—Accurate History, Reliable Prophecy
Burosha la Buku la Anthu Onse, peji 27-29
• Mungamba kusambira buku la Baibolo Likusambizgaci para munthu wamba kufumba ivyo Baibolo likusambizga pa nkhani zakupambanapambana.
[Bokosi pa peji 6]
Usange munthu wakuti: “Nkhugomezga mwa Ciuta yayi,” mungayowoya kuti:
• “Kasi ningamuphaliraniko ico cikanikhorweska ine kuti mlengi waliko?” Dumbiskanani fundo izo zili mu buku la Kukambitsirana, pa peji 74-76, panji mungapangana nayo kuti mukamuyeghere buku ilo mukutemwa.
• “Kweni para Ciuta waliko, kasi mungakhumba kuti waŵe wuli?” Ŵanthu ŵanandi ŵakuzgora kuti waŵe wacitemwa, murunji, walusungu na wambura kutemwera. Mulongorani mikhaliro iyi mu Baibolo. (Panji mungadumbiskana nayo cipaturo 1 ca buku la Baibolo Likusambizgaci, kwambira ndime 6)
Usange munthu wakuti: “Nkhugomezga Baibolo yayi,” mungayowoya kuti:
• “Ŵanandi ndimo ŵakuyowoyera. Ŵanyake ŵakuti Baibolo likuteta pa nkhani za sayansi, ndipo ŵanji ŵakuti fundo izo zili mu Baibolo ni zakovwira yayi. Kasi muli kuŵazgapo Baibolo? [Mulekani wazgore. Mulongorani mazgu ghakwamba pa peji 3 mu burosha la Buku la Anthu Onse na kumugaŵira burosha ili.] Ŵanandi ŵakuligomezga yayi Baibolo cifukwa visopa vikulibendezga kweniso vikulondezga yayi ivyo likusambizga. Para nizaso, tizamudumbiskana ciyelezgero ca nkhani iyi pa peji 4 na 5.”
• “Ndimwe pera yayi. Kasi mungatemwa kuti nimuphaliraniko fundo yinyake iyo yikunikondweska comene yakukhwaskana na Baibolo? [Ŵazgani Job 26:7; panji Yesaya 40:22, apo pakulongora kuti Baibolo likuneneska pa nkhani ya sayansi.] Mu Baibolo muliso fundo zavinjeru izo zingawovwira mbumba. Para nizaso nizamumulongorani vesi.”
• “Nawonga cifukwa ca kuniphalira maghanoghano ghinu. Kweni usange Ciuta wangalembera ŵanthu buku, kasi mukughanaghana kuti mungaŵa vici?” Mulongorani ivyo Baibolo likuyowoya pa ivyo wazgora.