MUTU 20
Uteŵeti wa Kovwira Ŵanyithu
1, 2. (a) Kasi mu Yudeya mukaŵa suzgo wuli? (b) Kasi Ŵakhristu mu Yudeya ŵakawona ukaboni wuli wakuti ŵanyawo ŵakuŵatemwa?
MU CHAKA cha 46 C.E., mu Yudeya mukaŵa njara yakofya. Chakurya chikaŵa chakusoŵa ndipo chikaŵa chakudura chomene mwakuti ŵasambiri ŵa Yesu ŵakasoŵa pakukora. Kukaŵa gwang’wang’wa muheni. Yehova wakakorako ndipo wakaŵawovwira munthowa iyo ŵakakhazganga yayi. Ntchivichi chikachitika?
2 Ŵakhristu Ŵachiyuda na Ŵamitundu mu Antiyoke wa ku Siriya, ŵakaŵalengera lusungu ŵabali ŵawo mu Yudeya. Ntheura ŵakasonkha ndalama kuti ŵawovwirepo. Ŵakasora ŵabali ŵaŵiri pakati pawo, Baranaba na Saulosi kuti ŵakapeleke wovwiri uwu ku ŵabali ŵawo mu Yerusalemu. (Ŵerengani Milimo 11:27-30; 12:25.) Ŵabali mu Yudeya ŵakwenera kuti ŵakasoŵa na chakuyowoya pa ivyo ŵakachita ŵabali ŵawo aŵa.
3. (a) Chifukwa wuli Ŵakhristu ŵachali kulondezga ivyo ŵakachita ŵanyawo ku Antiyoke? Yowoyani chiyelezgero. (Wonaniso bokosi la mutu wakuti “Wovwiri Ukuru Chomene”) (b) Kasi tizgorenge mafumbo wuli mu mutu uwu?
3 Uwu mbukaboni wakwamba wakuchita kulembeka wakuti Ŵakhristu awo ŵakukhala kunyake ŵakawovwira ŵanyawo ku chigaŵa chinyake. Nase tikuchita umo ŵakachitira Ŵakhristu ŵanyithu ku Antiyoke. Para tamanya kuti ŵabali ŵithu kunyake ŵasuzgika, tikovwirapo.a Pali kukolerana pakati pa uteŵeti wakovwira ŵanyithu uwu, na mauteŵeti ghanyake agho tikuchita. Tiwonenge mafumbo ghatatu agho ghatovwirenge kupulikiska fundo iyi: Chifukwa wuli tikuti kovwira ŵabali mbuteŵeti? Chifukwa wuli tikovwira ŵanyithu pa suzgo? Kasi uwemi wa kuchita uteŵeti uwu ngwakuti wuli?
Kovwira pa Suzgo “Mbuteŵeti Wakupatulika”
4. Kasi Paulosi wakaŵaphalirachi Ŵakhristu ŵa mpingo wa Korinte vya uteŵeti?
4 Mu kalata yachiŵiri iyo Paulosi wakalembera mpingo wa Korinte, wakalongosora kuti Ŵakhristu ŵakuchita uteŵeti mitundu paŵiri. Kalata iyi Paulosi wakalembera Ŵakhristu ŵakuphakazgika, kweni fundo iyo wakayowoya yikovwiraso ŵa “mberere zinyake” mazuŵa ghano. (Yoh. 10:16) Wakwamba ni “uteŵeti wa kuphemaniska” kung’anamura kupharazga na kusambizga. (2 Kor. 5:18-20; 1 Tim. 2:3-6) Kweni wachiŵiri ni uteŵeti uwo tikuchitira ŵabali ŵithu. Pa chigaŵa ichi, Paulosi wakazunurapo ‘kupeleka vyawanangwa.’ (2 Kor. 8:4) Mazgu ghose ghaŵiri, “uteŵeti wa kuphemaniska” na ‘kupeleka vyawanangwa,’ ghakufuma ku lizgu limoza la Chigiriki lakuti di·a·ko·niʹa. Kweni fundo njakuti wuli chomene?
5. Kasi Paulosi wakayowoyerachi kuti kupeleka wovwiri mbuteŵeti?
5 Pakuti Paulosi wakazunura mazgu agho ghakufuma ku lizgu limoza la Chigiriki, wakang’anamuranga kuti uteŵeti wakupeleka vyawanangwa ukuyana waka na mauteŵeti ghanyake agho ghakuchitika mu mpingo. Pakwamba wakayowoyapo kuti “pali mauteŵeti ghakupambanapambana, kweni Fumu njimoza. kweniso kuti “milimo yose iyi yikuchitika na mzimu umoza.” (1 Kor. 12:4-6, 11) Nakuti Paulosi wakati milimo yose iyo yikuchitika mu mpingo “mbuteŵeti wakupatulika.”b (Rom. 12:1, 6-8) Lekani wakawona kuti chikaŵa chakuzirwa kupatura nyengo na “kukateŵetera ŵatuŵa.”—Rom. 15:25, 26.
6. (a) Chifukwa wuli kovwira ŵanyithu nako nkhusopa? (b) Longosorani umo ntchito ya kovwira pa suzgo yikuchitikira pa charu chose? (Wonani bokosi la mutu wakuti “Para Soka Lachitika.”)
6 Paulosi wakakhumbanga kuti Ŵakhristu mu Korinte ŵamanye kuti kupeleka wovwiri mbuteŵeti, kweniso ni nthowa yakusopera Yehova. Fundo yake yikaŵa iyi: Ŵakhristu ŵakovwira ŵanyawo chifukwa ‘ŵakujilambika ku makani ghawemi gha Khristu.’ (2 Kor. 9:13) Iwo ŵakuchita nthena chifukwa ŵakulondezga ivyo Khristu wakasambizga. Paulosi wakati lusungu ulo ŵakachitiranga ŵanyawo ukaŵa ukaboni wa “lusungu lukuru lwa Chiuta.” (2 Kor. 9:14; 1 Pet. 4:10) Lekani Gongwe la Mulinda Lachingelezi la Disembala 1, 1975 likati: “Tikukayika yayi kuti Yehova Chiuta na Mwana wake Yesu Khristu ŵakuwona kuti ntchito iyi njakuzirwa chomene.” Ntheura kovwira ŵanyithu mbuteŵeti wakupatulika.—Rom. 12:1, 7; 2 Kor. 8:7; Heb. 13:16.
Chifukwa Wuli Tikovwira Ŵanyithu?
7, 8. Kasi chilato chakwamba icho tikovwilira ŵanyithu ntchivichi? Longosorani.
7 Chifukwa wuli tikovwira ŵanyithu para ŵasuzgika? Paulosi wakazgora fumbo ili mu kalata yachiŵiri iyo wakalembera Ŵakorinte. (Ŵerengani 2 Ŵakorinte 9:11-15.) Mu mavesi agha, Paulosi wakazunura vinthu vitatu ivyo vikuchitika para tikovwira ŵanyithu. Tiyeni tiviwone vinthu ivi, chilichose pachekha.
8 Chakwamba, para tikovwira ŵanyithu Chiuta wakupika uchindami. Mu mavesi 5 agha, Paulosi wakuzunura Yehova Chiuta kanandi waka. Mu vesi 11 na 12, mpositole uyu wakaphalira ŵabali kuti “ŵawongenge Chiuta” ndiposo “ŵanthu ŵanandi ŵawonge Chiuta.” Mu vesi 13 na 14, wakati ntchito ya kovwira ŵanji yikuchiska Ŵakhristu kuti ‘ŵachindikenge Chiuta’ na kulumba “lusungu lukuru lwa Chiuta.” Ndipo wakati walongosora vyose vya ntchito ya kovwira ŵanji, mu vesi 15 wakati: “Tikuwonga Chiuta.”—1 Pet. 4:11.
9. Kasi ŵanthu ŵanyake ŵachita wuli chifukwa chakuti tikovwira ŵanji? Yowoyani chiyelezgero.
9 Ŵateŵeti ŵa Chiuta mazuŵa ghano ŵakuchita nga ni Paulosi. Ŵakuwona kuti kovwira ŵanyawo ni mwaŵi wakuchindikira Yehova, kweniso kuti “ŵatozge chisambizgo” chake. (1 Kor. 10:31; Tito 2:10) Nakuti kanandi, ntchito ya kovwira ŵanji yikupeleka mwaŵi ku ŵanthu ŵanyake kuti ŵamanye makora Yehova na Ŵakaboni ŵake. Mu charu chinyake, mama yumoza wakaŵika chiphambano pa mulyango icho chikatenge: “Ŵakaboni ŵa Yehova Pano Cha!” Nyengo yinyake chimphepo chikananga vinthu mu chigaŵa icho, ndipo wakawona ŵanthu ŵakunozga nyumba iyo yikathyana na yake. Ŵanthu aŵa ŵakagwira ntchito mwakukolerana mazuŵa ghanandi, ndipo zuŵa linyake wakaluta penepapo kuti waŵamanye. Wakati wamanya kuti ŵakaŵa Ŵakaboni ŵa Yehova, wakazizwa, ndipo wakati: “Nkhamanyanga yayi kuti ndimo muliri.” Ntheura wakawuskapo chiphambano pa mulyango.
10, 11. (a) Ntchivichi chikulongora kuti chilato chachiŵiri icho tikovwilira ŵanyithu chikufiskika? (b) Ntchivichi chikovwira kuti awo ŵakujipeleka kovwira ŵanyawo ŵachitenge makora ntchito iyi? (Wonani bokosi la mutu wakuti “Kabuku Ako Kakovwira.”)
10 Chachiŵiri, ‘tikupeleka waka ivyo vikukhumbikwa’ mwakuti ŵabali ŵithu ŵawovwirike. (2 Kor. 9:12a) Tikukhumba kovwira ŵabali na ŵadumbu ŵithu awo ŵasoŵa pakukora. Kasi tikuchitirachi ivi? Tikuchita ivi chifukwa mpingo ni “thupi limoza,” ndipo “usange chiŵaro chimoza chikusuzgika, viŵaro vinyake vyose vikusuzgikira nacho lumoza.” (1 Kor. 12:20, 26) Lekani para ŵabali ŵapulika waka kuti ŵanyawo soka laŵasanga, ŵakulekezga dankha ivyo ŵachitanga, ŵakutora vyakugwilira ntchito na kuluta kukawovwira, chifukwa ŵakuŵatemwa. (Yak. 2:15, 16) Mu 2011, chindindindi na majigha ghakuru vikananga vinthu ku Japan. Ofesi ya Ŵakaboni ŵa Yehova mu United States yikatuma kalata ku Makomiti gha Vyakuzenga mu charu ichi, kupempha ŵabali ŵakumanya ntchito kuti ŵakawovwire kuzengaso Nyumba za Ufumu ku Japan. Kasi ŵakasangika? Mu masabata ghachoko waka, ŵabali na ŵadumbu pafupifupi 600 ŵakajipeleka, ndipo ŵakazomera kwendera ndalama zawo. Ofesi ya Ŵakaboni ŵa Yehova mu United States yikati: “Ŵanthu ŵakajipeleka na mtima wose.” Mubali yumoza ku Japan wakafumba yumoza wa ŵanthu ŵakujipeleka aŵa, icho chikamutuma kuluta ku charu ichi kukawovwira. Iyo wakati: “Ŵabali ŵithu mu Japan ntchigaŵa cha ‘thupi lithu.’ Takomwera lumoza, ndipo tikusuzgikira lumoza.” Chifukwa cha kutemwa ŵabali ŵawo, nyengo zinyake ŵakujipata waka na kuluta kukaŵawovwira.c—1 Yoh. 3:16.
11 Awo ŵakuwona ivyo tikuchita nawo ŵakuwonga. Mu 2013, ku United States, mu chigaŵa cha Arkansas mukawa soka, ndipo Ŵakaboni ŵakujipeleka ŵakawovwirapo mwaluŵiro. Pakuwona ivi, nyuzipepara yinyake yikati: “Ŵakaboni ŵa Yehova ŵakunozgekera mwakuti para kwawa soka, ŵakovwirana makora chomene.” Nga umo wakayowoyera mpositole Paulosi, ‘tikupeleka ivyo vikukhumbikwa’ ku ŵabali ŵithu.
12-14. (a) Chifukwa wuli tikukondwa para chilato chachitatu icho tikovwilira ŵanyithu chikufiskika? (b) Kasi pali ukaboni wakulongora kuti ntchakuzirwa kulutilira na vinthu vyauzimu?
12 Chachitatu, tikovwira awo ŵasuzgika kuti ŵambeso kuchita vyauzimu. Chifukwa wuli ichi ntchakuzirwa? Chifukwa ntchakuti awo ŵawovwirika ŵakukhumba ‘kuwonga Chiuta.’ (2 Kor. 9:12b) Nthowa yiwemi chomene yakuti ŵawongere Chiuta njakuti ŵambeso kumusopa mwaluŵiro. (Fil. 1:10) Mu 1945, Gongwe la Mulinda likati: “Paulosi wakazomera kuti ŵabali ŵasonkhenge vyakovwilira ŵabali ŵawo chifukwa awo ŵakapokeranga wovwiri uwu, ŵakasanganga nkhongono na kukoleska ntchito ya Yehova ya kupharazga.” Lekani nase tikovwira ŵanyithu mazuŵa ghano. Para ŵabali ŵambaso kupharazga, ŵakukhwimiska ŵanyawo na kujikhwimiskaso ŵekha.—Ŵerengani 2 Ŵakorinte 1:3, 4.
13 Pulikani ivyo ŵakayowoya ŵanyake awo ŵati ŵawovwirika, ŵakasanga nkhongono na kwambaso kupharazga. Mubali yumoza wakati: “Likaŵa thumbiko mu mbumba yithu kwambaso kupharazga. Tikaluwako dankha suzgo yithu chifukwa tikatangwanika na kupembuzga ŵanyithu.” Mudumbu munyake wakati: “Pakuti nkhatangwanika na vinthu vyauzimu, nkhaluwako kuti vinthu vyanangika. Nkhawona kuti chivikiliro chilipo.” Mudumbu munyakeso wakati: “Vinandi vikanangika mwakuti pakaŵavya chakuti tingachitapo, kweni uteŵeti ukatovwira. Tikakhwima mtima chifukwa tikaphaliranga ŵanthu vya chigomezgo chithu chakuti kuzamuŵa charu chiphya.”
14 Padera pa kupharazga, ŵabali ŵithu awo ŵali mu suzgo ŵakwenera kwambaso kuwungana mwaluŵiro. Pulikani ivyo vikachitikira Kiyoko, mudumbu uyo wakaŵa na vyaka pafupifupi 60 nyengo iyo. Vinthu vyake vyose vikanangika na tsunami. Wakakhala waka na ivyo wakavwara mu thupi na skapato. Wakaŵavya pakukora. Mbwenu mulara wakamuphalira kuti kuŵenge ungano wa mpingo uwo uchitikirenge mu galimoto yake. Kiyoko wakati: “Mulara yura, muwoli wake, na mudumbu munyake, tikakhala mu galimoto. Ukaŵa ungano ukuru yayi, kweni ukanovwira chomene, chifukwa nkhaluwirathu vya soka la tsunami. Mtima ukakhazikika. Nkhawona kuti kuŵa pamoza na ŵabali, ntchinthu chakuzirwa chomene.” Mudumbu munyakeso wakayowoya vya maungano agho wakaŵapo soka likati lachitika waka, wakati: “Ndigho ghakanovwira kuzizipizga.”—Rom. 1:11, 12; 12:12.
Tikutumbikika Muyirayira Chifukwa cha Kovwira Ŵanyithu
15, 16. (a) Kasi ŵabali ŵithu ku Korinte na kunyake ŵakatumbikika wuli na ntchito ya kovwira ŵanyawo? (b) Kasi nase tikutumbikika wuli na ntchito iyi?
15 Pakulongosora vya uteŵeti uwu, Paulosi wakaphalira Ŵakorinte kuti iwo na Ŵakhristu ŵanyawo ŵakatumbikika na ntchito iyi. Iyo wakati: ‘Pamoza na kuŵeyelera chifukwa cha imwe, [Ŵakhristu Ŵachiyuda mu Yerusalemu awo ŵawovwirika] ŵakukhumba chomene kumuwonani chifukwa cha lusungu lukuru lwa Chiuta ulo luli pa imwe.’ (2 Kor. 9:14) Chifukwa cha ivyo Ŵakorinte ŵakachitira Ŵakhristu ŵanyawo mu Yudeya, Ŵakhristu Ŵachiyuda aŵa ŵakalomberanga ŵabali ŵawo mu Korinte, na Ŵamitundu wuwo, nakuti ŵakaŵatemwa chomene.
16 Gongwe la Mulinda Lachingelezi la Disembala 1, 1945 likayowoya uwemi wa kuchita ivyo wakayowoya Paulosi, likati: “Para ŵanthu ŵa Chiuta ŵawovwira ŵanyawo awo ŵasuzgika, umoza ukulutilira.” Awo ŵakovwira pa ntchito iyi ŵawona kuti ndimo vikuŵira nadi. Mulara uyo wakawovwirapo ku malo ghanyake uko maji ghakananga vinthu wakati: “Chifukwa cha kovwira pa ntchito iyi, nawona kuti aŵa mbabali ŵane nadi.” Mudumbu yumoza uyo wakawovwirika wakati, “Para tikuti Paradiso pa charu chapasi tikunena ŵabali ŵithu.”—Ŵerengani Zintharika 17:17.
17. (a) Kasi ivyo likuyowoya lemba la Yesaya 41:13 vikukolerana wuli na kovwira pa suzgo? (b) Yowoyanipo ukaboni wakuti Yehova wakupika ntchindi na ntchito iyi, na umo yikukhozgera umoza. (Wonani bokosi la mutu wakuti “Ŵakujipeleka Kovwira Ŵanyawo pa Charu Chose.”)
17 Nyengo zose para ŵabali ŵakufika uko kwachitika soka, awo soka laŵawira ŵakuwona kuti layizgo la Chiuta ili ndanadi, lakuti: “Ine Yehova Chiuta wako nkhukukora pa woko lako lamalyero, ine nkhuyowoya nawe kuti: ‘Ungawopanga chara, ine nikovwirenge.’” (Yes. 41:13) Mudumbu uyo wakapona pa soka linyake wakati: “Nkhongono zikanimalira pakuwona umo vinthu vikanangikira, kweni Yehova wakanikora pa woko. Nkhutondeka na kuyowoya wuwo chifukwa cha ivyo ŵabali ŵakanichitira.” Ku chigaŵa chinyake, ŵalara ŵaŵiri ŵakalemba ivi m’malo mwa mipingo yose mu chigaŵa icho: “Tikasuzgika mu maghanoghano chifukwa cha chindindindi, kweni Yehova wakatovwira kwizira mu ŵabali ŵithu. Tikaŵazganga waka vya wovwiri wanthena, kweni nase tikajiwonera tekha.”
Kasi Mungawovwirapo?
18. Kasi mungachita wuli usange mukukhumba kuchitako ntchito ya kovwira ŵanyithu? (Wonani bokosi la mutu wakuti “Vikamovwira Kuti Walutilire.”)
18 Kasi mungatemwa kovwira ŵanyinu kuti namwe muŵe ŵachimwemwe? Kumbukani kuti kanandi awo ŵakusoleka kovwira pa ntchito iyi ni awo ŵakuzenga Nyumba za Ufumu. Ntheura phalirani ŵalara kuti namwe mukukhumba kuchitako ntchito iyi. Mubali mulara uyo wachita ntchito iyi nyengo yitali wakati: “Para komiti yakulaŵilira ntchito iyi yindamuchemani, kulutako yayi.” Ichi chikovwira kuti ntchito yithu yendenge mwandondomeko.
19. Kasi awo ŵakuchitako ntchito iyi ŵakovwira wuli kupeleka ukaboni wakuti tili ŵasambiri ŵa Khristu?
19 Iyi ni nthowa yapadera yakulongolera kuti tikupulikira dango la Khristu lakuti ‘titemwanenge.’ Para tikutemwana, tikulongora kuti tili ŵasambiri ŵa Khristu. (Yoh. 13:34, 35) Mazuŵa ghano pali ŵanandi awo ŵakupeleka uchindami kwa Chiuta na kovwira ŵanyawo awo ŵali ku chigaŵa cha Ufumu wa Chiuta. Ili ni thumbiko likuru chomene!
a Mutu uwu ukulongosora vya kovwira Ŵakaboni ŵanyithu. Kweni kanandi Mbakaboni pera yayi awo ŵakovwirika.—Gal. 6:10.
b Lizgu lakuti di·aʹko·nos likung’anamura muteŵeti yumoza. Kweni apo Paulosi wakayowoyanga vya ‘ŵateŵeti ŵakovwira,’ wakazunuraso lizgu lenelili.—1 Tim. 3:12.
c Wonani nkhani ya mutu wakuti “Kuthandiza Banja Lathu la Chikhulupiriro mu Bosnia,” Mu Gongwe la Mulinda Lachicheŵa la Novembala 1, 1994, peji 23-27.