1 Berɛsosɛm
15 Na ɔsisii adan+ pii faeɛ wɔ Dawid Kuro mu; afei nso ɔsiesiee baabi+ maa nokorɛ Nyankopɔn adaka no, na ɔsii ntomadan maa no. 2 Saa berɛ no, Dawid kaa sɛ: “Obiara ntumi nsoa nokorɛ Nyankopɔn adaka no gye Lewifoɔ no nko, ɛfiri sɛ wɔn na Yehowa ayi wɔn sɛ wɔnsoa Yehowa adaka+ no na wɔnsom+ no daa.” 3 Ɛnna Dawid boaboaa Israel nyinaa ano wɔ Yerusalem+ sɛ wɔnkɔfa Yehowa adaka+ no mmra baabi a wasiesie ama no no.
4 Ɛno nti Dawid boaboaa Aaron asefoɔ+ ne Lewifoɔ no ano; 5 Kohat asefoɔ mu, otitire Uriel+ ne ne nuanom, ɔha aduonu; 6 Merari+ asefoɔ mu, otitire Asaia+ ne ne nuanom, ahanu aduonu; 7 Gersom+ asefoɔ mu, otitire Yoel+ ne ne nuanom, ɔha aduasa; 8 Elisafan+ asefoɔ mu, otitire Semaia+ ne ne nuanom, ahanu; 9 Hebron asefoɔ mu, otitire Eliel ne ne nuanom, aduɔwɔtwe; 10 Usiel+ asefoɔ mu, otitire Aminadab ne ne nuanom, ɔha ne dumienu. 11 Afei nso, Dawid frɛɛ ɔsɔfoɔ Sadok+ ne ɔsɔfoɔ Abiatar,+ ne Lewifoɔ Uriel,+ Asaia,+ Yoel,+ Semaia,+ Eliel+ ne Aminadab, 12 na ɔka kyerɛɛ wɔn sɛ: “Mone Lewifoɔ agyanom abusuafie mpanimfoɔ.+ Monnwira+ mo ho, mo ne mo nuanom, na monkɔfa Yehowa, Israel Nyankopɔn adaka no mmra baabi a masiesie ama no no. 13 Moanyɛ saa kane+ no nti na Yehowa yɛn Nyankopɔn bu baa yɛn soɔ no;+ yɛanhwehwɛ no sɛdeɛ akwankyerɛ no teɛ.”+ 14 Enti asɔfoɔ ne Lewifoɔ no dwiraa+ wɔn ho sɛ wɔrekɔfa Yehowa, Israel Nyankopɔn adaka no aba.
15 Ɛnna Lewifoɔ no soaa+ nokorɛ Nyankopɔn adaka no, sɛdeɛ Mose nam Yehowa asɛm so hyɛeɛ no; wɔde ɛho nnua no totoo wɔn mmatiri so.+ 16 Na Dawid ka kyerɛɛ Lewifoɔ atitire no sɛ wɔmma wɔn nuanom nnwontofoɔ+ no mfa wɔn nnwontoɔ nneɛma+ mmɛgyinagyina wɔn gyinabea na wɔmfa nto dwom dendeenden mma anigyeɛ mmra, asankuo ahodoɔ+ nyinaa bi, ne nnawuta.+
17 Ɛnna Lewifoɔ no maa yeinom nyinaa gyinagyinaa wɔn gyinabea: Yoel ba Heman+ ne ne nuanom mu, Berekia ba Asaf;+ wɔn nuanom Merari asefoɔ mu, Kusaia ba Etan;+ 18 wɔne wɔn nuanom a wɔwɔ kuo a ɛtɔ so mmienu+ no mu, Sakaria,+ Ben, Yaasiel, Semiramot, Yehiel, Uni, Eliab, Benaia, Maaseia, Matitia, Elifelehu, Mikneia, Obed-Edom,+ ne Yeiel; wɔyɛ apono ano ahwɛfoɔ; 19 nnwontofoɔ no ne Heman,+ Asaf+ ne Etan; wɔn na wɔde wɔn gyinagyinaa sɛ wɔmmɔ kɔbere nnawuta den;+ 20 ne Sakaria, Asiel,+ Semiramot, Yehiel, Uni, Eliab, Maaseia, ne Benaia; wɔn na wɔkurakura asankuo a wɔto no Alamot*+ soɔ, 21 ne Matitia,+ Elifelehu, Mikneia, Obed-Edom, Yeiel, ne Asasia; wɔn na wɔkurakura asankuo+ a wɔto no Seminit*+ soɔ a wɔyɛ dwonkyerɛfoɔ; 22 ne Kenania+ a ɔda Lewifoɔ a wɔsoa nneɛma no ano; ɔno na ɔkyerɛ wɔn sɛdeɛ wɔnsoa no, ɛfiri sɛ na waben mu;+ 23 ne Berekia ne Elkana, Adaka no so ahwɛfoɔ;+ 24 ne Sebania, Yosafat, Netanel, Amasai, Sakaria, Benaia, ne Elieser, asɔfoɔ a wɔhyɛne ntotorobɛnto+ nokorɛ Nyankopɔn adaka no anim, ne Obed-Edom ne Yehia, Adaka no so ahwɛfoɔ.
25 Dawid+ ne Israel mpanimfoɔ+ ne apem apem so ahwɛfoɔ+ no ka ho na wɔkɔfaa Yehowa apam adaka no firii Obed-Edom fie+ ahurisie mu.+ 26 Na ɛbaa sɛ berɛ a nokorɛ Nyankopɔn boaa+ Lewifoɔ no maa wɔsoaa Yehowa apam adaka no, wɔde anantwinini nkumaa nson ne adwennini nson bɔɔ afɔdeɛ.+ 27 Saa berɛ no, na Dawid hyɛ nwera pa atadeɛ nsasini, ɔno ne Lewifoɔ a wɔsõ Adaka no nyinaa ne nnwontofoɔ no ne Kenania,+ ɔpanin a ɔdi animu ma nnwontofoɔ+ soa adaka no; ná Dawid hyɛ nwera asɔfotadeɛ+ nso. 28 Na Israelfoɔ nyinaa siim sɛ wɔde Yehowa apam adaka no reba; wɔbɔɔ ose,+ na wɔhyɛnee mmɛn+ ne ntotorobɛnto,+ bɔɔ nnawuta+ ne asankuo ahodoɔ+ nyinaa bi dendeenden.
29 Berɛ a wɔde Yehowa apam adaka+ no duruu Dawid Kuro mu no, Saul babaa Mikal+ hwɛɛ mpomma mu, na ɔhunuu sɛ Dawid rehurihuri sa,+ na ɔbuu ɔhene animtia+ n’akomam.