Hiob

4 Ɛnna Elifas+ a ɔfiri Teman no buaa sɛ:

 2 “Sɛ obi bɔ mmɔden ka asɛm bi kyerɛ wo a, ɛbɛha wo anaa?

Nanso hwan na ɔbɛtumi aka ne kasa ahyɛ?

 3 Hwɛ! Woatene nnipa pii so,+

Na nsa a emu agoɔ no, woahyɛ no den.+

 4 Deɛ ɔrehwe aseɛ no, wo nsɛm ama no asɔre agyina;+

Na nkotodwe a ahodwo no, woahyɛ no den.+

 5 Afei a ebi ato woɔ no, woaboto;

Ebi kaa woɔ yi deɛ, woahodwo.

 6 Ɛnyɛ wo nyamesuro na ama woanya ahotɔsoɔ?

Ɛnyɛ w’anidasoɔ ne w’akwan a ɛdi mũ?+

 7 Mesrɛ wo, kae yei: Hwan na ne ho nni asɛm a wɔasɛe no pɛn?

Na ɛhe na wɔapepa obi a ɔtene+ pɛn?

 8 Deɛ mahunu ne sɛ wɔn a wɔsusu bɔne

Ne wɔn a wɔdua ɔhaw no, ɛno ara na wɔtwa.+

 9 Onyankopɔn home mu na wɔsɛeɛ,

Na n’abufuhyeɛ mu na wɔn awieeɛ ba.

10 Gyata bobom, wɔte gyataforɔ nne,

Nanso gyatanini sẽ bubu.

11 Hanam a ɛnni hɔ nti, gyata wu,

Na gyata mma bɔ pete.

12 Asɛm bi wiawiaa ne ho baa me nkyɛn,

Na ɛtwaa m’asom+ ketewaa bi wɔ

13 Dadwene a ɛfiri anadwo anisoadehunu mu no mu,

Berɛ a nnahɔɔ tɔ nnipa soɔ no.

14 Ehu kaa me, me ho popoeɛ,

Na ehu hyɛɛ me nnompe nyinaa mã.

15 Honhom bi bɛtwaam m’anim;

Me ho nwi sɔresɔreeɛ.

16 Ɛbɛgyinaa hɔ dinn

Nanso manhunu sɛdeɛ ɛteɛ;

Biribi bɛgyinaa m’ani so;

Ɛhɔ tɛm dinn, na afei metee ɛnne bi sɛ:

17 ‘Onipa dasani—ɔbɛtumi atene asene Onyankopɔn anaa?

Na ɔbarima ho bɛtumi ate asene ne Bɔfoɔ?’

18 Hwɛ! Ɔnni gyidie wɔ n’asomfoɔ mu,

Na n’abɔfoɔ nso, ɔbu wɔn sɛ wɔtɔ sini;

19 Na wɔn a wɔtete dɔtedan mu na ɔbɛbu wɔn sɛn,

Wɔn a wɔn fapem yɛ dɔteɛ no!+

Wɔyam wɔn ntɛm sene abubummabaa.

20 Ɛbɛfiri anɔpa akɔsi anwummerɛ no, na wɔayam koraa;

Wɔyera korakora a obiara nnwene ho.

21 Wɔn ntomadan homa no, wɔntetee mu anaa?

Nyansa a wɔnnie nti, wɔwuwu.