Ɔsɛnkafoɔ

4 Mesan hwɛɛ nhyɛsoɔ+ a wɔde ba nnipa so owia ase nyinaa, na hwɛ! mehunuu wɔn a wɔhyɛ wɔn soɔ no nisuo,+ nanso wɔnni ɔwerɛkyekyefoɔ biara;+ tumi wɔ nhyɛsofoɔ no nsam ma enti wɔn a wɔhyɛ wɔn soɔ no nni ɔwerɛkyekyefoɔ biara. 2 Ɛnna mekamfoo awufoɔ a wɔawuwu dada no senee ateasefoɔ a wɔda so te aseɛ.+ 3 Nanso deɛ ne deɛ yɛ sene wɔn nyinaa ne deɛ ɔnnya mmaeɛ,+ deɛ ɔnhunuu ɔbrɛdwuma a wɔyɛ no owia ase no.+

4 Na mehunuu ɔbrɛ nyinaa ne adwumayɛ mu nimdeɛ nyinaa,+ sɛ ɛma obi ne ne yɔnko si akan;+ yei nso yɛ ahuhudeɛ ne adehunu akyiridie.

5 Ɔkwasea bobɔ ne nsa,+ na ɔno ara ne honam na ɛbɛyɛ n’aduane.+

6 Ɔhome nsa mã yɛ sene ɔbrɛ ne adehunu nsa mã mmienu akyiridie.+

7 Na mesan hwɛɛ ahuhudeɛ a ɛwɔ owia ase no: 8 Obi wɔ hɔ a obiara nka ne ho;+ ɔnni ba, na ɔnni onua biara,+ nanso ɔyɛ adwumaden a, ɔnnyae da. Na ahonyadeɛ biara nsɔ n’ani:+ “Na hwan koraa na merebrɛ ama no, a ne nti mede nneɛma pa rekame me kra yi?”+ Yei nso yɛ ahuhudeɛ; ɛyɛ ɔbrɛdwuma.+

9 Baanu yɛ sene baako,+ ɛfiri sɛ wɔnya wɔn brɛ so akatua pa.+ 10 Sɛ baako hwe ase a, deɛ ɔka ne ho no bɛma ne so.+ Na ɔbaakofoɔ a ɔhwe ase a obi mma ne soɔ no, ɛbɛsi no sɛn?+

11 Bio nso, sɛ baanu da a, wɔn ho bɛyɛ wɔn hye; na ɔbaakofoɔ deɛ, ɛbɛyɛ dɛn na ne ho ayɛ no hye?+ 12 Sɛ obi bɛtumi adi ɔbaakofoɔ so a, nnipa mmienu deɛ, wɔbɛtumi ne no de asi ani.+ Na homa a ɛbɔ ho mmiɛnsa no, emu rente ntɛm.

13 Abɔfra hiani nyansafoɔ yɛ+ sene ɔhene akɔkoraa gyimfoɔ+ a ɔntie kɔkɔbɔ bio.+ 14 Afiase na abɔfra no firi bɛdii hene;+ wɔwoo no hiani wɔ baako no ahennie mu.+ 15 Mahunu wɔn a wɔte aseɛ a wɔnenam owia ase nyinaa ne sɛdeɛ ɛwie abɔfra a ɔsi baako no ananmu.+ 16 Ɔmanfoɔ a ɔdi wɔn anim no rensa da;+ na wɔn a wɔbɛdi n’akyi aba no deɛ, wɔn ani rennye ne ho,+ na yei nso yɛ ahuhudeɛ ne adehunu akyiridie.+