Deuteronomium
16 “Kae bosome Abib+ na di twam ma Yehowa wo Nyankopɔn,+ ɛfiri sɛ bosome Abib mu na Yehowa wo Nyankopɔn yii wo firii Egypt anadwo.+ 2 Fa odwan ne nantwie+ bɔ twam afɔdeɛ ma Yehowa wo Nyankopɔn+ wɔ baabi a Yehowa de ne din bɛdua.+ 3 Di no nnanson, na mfa biribiara a emu aka nka ho.+ Fa paanoo a mmɔreka nnim, anaa ahoyera paanoo, ka ho di, ɛfiri sɛ wode ahoperɛ na ɛfirii Egypt asase so baeɛ.+ Na wo nkwa nna nyinaa wobɛkae da a wofirii Egypt no.+ 4 Na ɛnsɛ sɛ wɔhunu mmɔreka obiara nkyɛn wɔ asase no nyinaa so nnanson.+ Afei sɛ wokum aboa no da a ɛdi kan anwummerɛ a, nnya bi mma adeɛ nnkye so.+ 5 Wontumi nkum twam aboa no wɔ nkuro a Yehowa wo Nyankopɔn de ama woɔ no biara mu kɛkɛ. 6 Mmom baabi a Yehowa wo Nyankopɔn de ne din bɛdua no,+ ɛhɔ na kum twam aboa no. Ku no anwummerɛ, berɛ a awia akɔtɔ,+ te sɛ berɛ a wofirii Egypt no. 7 Baabi a Yehowa wo Nyankopɔn bɛyie no,+ ɛhɔ na siesie twam no na di no,+ na adeɛ kye anɔpa a woasan akɔ wo ntomadan mu. 8 Di paanoo a mmɔreka nnim nnansia, na da a ɛtɔ so nson no bɛyɛ nhyiamu titire ama Yehowa wo Nyankopɔn.+ Nyɛ adwuma biara.
9 “Kan adapɛn nson. Kan firi da a ɛdi kan a wode wo kantankrankyi bɛto w’ayuo so sɛ woretwa no; kan adapɛn nson firi saa berɛ no.+ 10 Na di adapɛn afahyɛ ma Yehowa wo Nyankopɔn.+ Fa ayɛyɛdeɛ a ɛfiri wo pɛ mu bra sɛdeɛ Yehowa wo Nyankopɔn bɛhyira woɔ.+ 11 Wo ne wɔn a wɔwɔ wo nkyɛn nyinaa ani nnye Yehowa wo Nyankopɔn anim.+ Wo ne wo babarima ne wo babaa, w’akoa ne w’afenaa, Lewini a ɔwɔ wo kurom ne ɔhɔhoɔ,+ agyanka+ ne okunafoɔ+ nyinaa ani nnye baabi a Yehowa wo Nyankopɔn de ne din bɛdua no.+ 12 Di ahyɛdeɛ yi nyinaa so+ na kae sɛ na woyɛ akoa wɔ Egypt.+
13 “Di asese afahyɛ+ no nnanson. Ɛyɛ berɛ a woboaboa wo nnɔbaeɛ ne wo ngo ne wo nsã ano. 14 Ɛduru afahyɛ berɛ yi a ma w’ani nnye,+ wo ne wo babarima ne wo babaa, w’akoa ne w’afenaa, Lewini ne ɔhɔhoɔ, agyanka ne okunafoɔ a ɔwɔ wo kurom no. 15 Di afahyɛ no nnanson+ fa hyɛ Yehowa wo Nyankopɔn animuonyam baabi a Yehowa bɛkyerɛ no, ɛfiri sɛ Yehowa wo Nyankopɔn bɛhyira+ wo nnɔbaeɛ ne wo nsa ano adwuma nyinaa so. Enti deɛ wobɛyɛ ara ne sɛ wobɛma w’ani agyeɛ.+
16 “Afe biara ɔbarima biara bɛba abɛgyina Yehowa wo Nyankopɔn anim mprɛnsa wɔ baabi a ɔbɛkyerɛ no:+ berɛ a woredi paanoo a mmɔreka nnim afahyɛ+ ne adapɛn afahyɛ+ ne asese afahyɛ no.+ Na obiara mmfa nsapan mmma Yehowa anim.+ 17 Obiara nhwɛ sɛdeɛ Yehowa wo Nyankopɔn ahyira no ho mfa n’akyɛdeɛ mmra.+
18 “Sisi atemmufoɔ+ ne mpanimfoɔ+ wɔ nkuro a Yehowa wo Nyankopɔn de ama abusuakuo biara no apono ano, na wɔmfa atɛntenenee mmu ɔman no atɛn. 19 Mmu atɛnkyea.+ Nhwɛ nnipa anim,+ na nnye adanmudeɛ, ɛfiri sɛ adanmudeɛ fira anyansafoɔ ani,+ na ɛtumi ma ateneneefoɔ sesa wɔn ano. 20 Asɛntenenee, asɛntenenee+ na die na woanya nkwa na woakɔfa asase a Yehowa wo Nyankopɔn de ama woɔ no.+
21 “Nnua dua biara mfa nyɛ abosonnua wɔ Yehowa wo Nyankopɔn afɔrebukyia a wobɛsie no ho.+
22 “Nyɛ abosom adum biara,+ ɛfiri sɛ ɛyɛ adeɛ a Yehowa wo Nyankopɔn kyiri koraa.+