Deuteronomium
17 “Mfa nantwie anaa odwan a ɛdɛm wɔ ne ho anaa adebɔne biara mmɔ afɔdeɛ mma Yehowa wo Nyankopɔn, ɛfiri sɛ ɛyɛ Yehowa wo Nyankopɔn akyiwadeɛ.+
2 “Ebia ɔbarima anaa ɔbaa bi bɛbu Yehowa wo Nyankopɔn apam so akɔyɛ bɔne bi wɔ nkuro a Yehowa wo Nyankopɔn de ama woɔ no bi mu.+ 3 Sɛ ɔkɔsom anyame foforɔ anaa ɔkoto awia anaa bosome anaa ɔsoro asafo+ biara a menhyɛɛ wɔn,+ 4 na wɔka ma wote na wohwehwɛ asɛm no mu yie hunu sɛ ampa+ wayɛ akyiwadeɛ a ɛte saa wɔ Israel a, 5 ɛnneɛ fa ɔbarima anaa ɔbaa a ɔyɛɛ saa bɔne no bra kuro no pono ano, ɔbarima anaa ɔbaa biara a ɔyɛɛ saa no, na si no aboɔ ma no nwu.+ 6 Adansefoɔ mmienu anaa mmiɛnsa anom asɛm so+ na wɔnnyina nku no. Ɛnsɛ sɛ wɔgyina danseni baako anom asɛm so ku no.+ 7 Adansefoɔ no nsa nni kan wɔ ne so, na ɔman no nyinaa nni akyire mma no nwu.+ Yɛ saa fa yi bɔne biara firi wo mu.+
8 “Sɛ obi hwie mogya gu+ anaa ɔne ne yɔnko twe manso+ anaa ɔpira ne yɔnko na ɛyɛ asɛm a asɔre+ wo kuro pono ano, na asɛm no mu yɛ duru ma wo sɛ wobɛdie+ a, ɛnneɛ sɔre kɔ baabi a Yehowa wo Nyankopɔn ayi asi hɔ no,+ 9 na kɔhunu Lewifoɔ asɔfoɔ+ ne ɔtemmufoɔ+ a ɔwɔ hɔ saa berɛ no na fa asɛm no to wɔn anim na wɔmmua mma wo.+ 10 Hwɛ di asɛm biara a wɔbɛka akyerɛ wo baabi a Yehowa ayi asi hɔ no so, na biribiara a wɔbɛkyerɛ wo sɛ yɛ no, yɛ no saa pɛpɛɛpɛ. 11 Mmara no mu asɛm biara a wɔbɛkyerɛ woɔ anaa atɛn biara a wɔbɛbuo no, di so.+ Mmane mfiri asɛm a wɔbɛka akyerɛ woɔ no ho nkɔ nifa anaa benkum.+ 12 Sɛ obi yɛ ahantan na wantie ɔsɔfoɔ a ɔgyina Yehowa wo Nyankopɔn anim resom anaa ɔtemmufoɔ no a,+ ɛsɛ sɛ ɔwuo,+ na yi bɔne biara firi Israel.+ 13 Ɛba saa a, ɔman no nyinaa bɛte na wɔasuro+ na wɔanni ahantansɛm bio.
14 “Sɛ wonya kɔfa asase a Yehowa wo Nyankopɔn de ama woɔ no tena so,+ na woka sɛ, ‘Ma mensi ɔhene na ɔnni me so sɛ aman a wɔatwa me ho ahyia’+ no nyinaa a, 15 ɛnneɛ obi a Yehowa wo Nyankopɔn bɛyi no na ɛsɛ sɛ wode no si wo so hene.+ Ma wo nuanom bi nni wo so hene. Wontumi mma ɔhɔhoɔ a ɔnyɛ wo nua nni wo so. 16 Nanso ɔnhwɛ yie na n’ani ammere apɔnkɔ pii+ na ɛnsɛ sɛ ɔma nkurɔfoɔ no san kɔ Egypt kɔpɛ apɔnkɔ pii,+ ɛfiri sɛ Yehowa aka akyerɛ mo sɛ, ‘Monnsan nnkɔfa kwan yi so bio.’ 17 Afei ɛnsɛ sɛ ɔware mmaa bebree na n’akoma ammane,+ na saa ara na ɛnsɛ sɛ n’ani bere dwetɛ ne sika kɔkɔɔ pii.+ 18 Na sɛ ɔnya bɛtena n’ahennwa so a, ɔnhwɛ mmara a ɛwɔ Lewifoɔ asɔfoɔ no nkyɛn no so ntwerɛ bi wɔ nwoma mu mfa.+
19 “Ɔmfa nto ne ho na ɔnkenkan ne nkwa nna nyinaa+ na ama wasuro Yehowa, ne Nyankopɔn, na wadi mmara yi mu nsɛm ne ahyɛdeɛ nyinaa so.+ 20 Ɔnyɛ saa na n’akoma anhoran ansene ne nuanom+ na wammane amfiri ahyɛdeɛ yi ho ankɔ nifa anaa benkum,+ na ama ne nna aware n’ahennie mu+ wɔ Israel, ɔne ne mma nyinaa.