Deuteronomium
29 Yei ne apam a Yehowa ka kyerɛɛ Mose sɛ ɔne Israelfoɔ mpam no Moab asase soɔ no mu nsɛm. Ɛsono apam a ɔne wɔn pam no Horeb no.+
2 Afei Mose frɛɛ Israelfoɔ no nyinaa ka kyerɛɛ wɔn sɛ: “Mo ara mode mo ani hunuu deɛ Yehowa de baa Farao ne ne nkoa ne n’asase nyinaa so wɔ Egypt no.+ 3 Mohunuu sɔhwɛ akɛseɛ+ ne nsɛnkyerɛnne+ ne anwanwadeɛ akɛseɛ.+ 4 Nanso ɛbɛsi nnɛ, Yehowa mmaa mo akoma a mode bɛhunu ne ani a mode bɛhwɛ ne aso a mode bɛteɛ.+ 5 ‘Berɛ a mede mo faa serɛ so mfeɛ aduanan no,+ mo ho ntadeɛ antete na mo nan ase mpaboa anhi.+ 6 Moanni paanoo+ na moannom bobesa anaa mmosã biara na moahunu sɛ mene Yehowa mo Nyankopɔn.’ 7 Afei berɛ a mobɛduruu ha no, Hesbon hene Sihon+ ne Basan hene Og+ bɛhyiaa yɛn ne yɛn koeɛ, na yɛdii wɔn so.+ 8 Na yɛgyee wɔn asase maa Rubenfoɔ ne Gadfoɔ ne Manase abusuakuo fã no.+ 9 Enti monhwɛ nni apam yi mu nsɛm so na ama biribiara a mobɛyɛ asi mo yie.+
10 “Ɛnnɛ mo nyinaa gyina Yehowa mo Nyankopɔn anim, mo mmusua ti, mo mpanimfoɔ, mo atitire, Israel mmarima nyinaa,+ 11 ne mo mma nkumaa ne mo yerenom+ ne ahɔhoɔ+ a wɔwɔ mo nkyɛn nyinaa, wɔn a wɔkɔ anyina ma mo ne wɔn a wɔkɔ nsuo ma mo.+ 12 Moahyia nnɛ sɛ mo ne Yehowa mo Nyankopɔn rebɛyɛ apam+ na moaka ntam Yehowa mo Nyankopɔn anim,+ 13 na moabɛyɛ ne man+ na ɔno nso ayɛ mo Nyankopɔn,+ sɛdeɛ ɔhyɛɛ mo bɔ na ɔkaa mo agyanom Abraham+ ne Isak+ ne Yakob+ ntam no.
14 “Nanso ɛnyɛ mo nko ara na me ne mo reyɛ apam ama moaka ɛho ntam yi,+ 15 na mmom obiara a ɔne yɛn gyina Yehowa yɛn Nyankopɔn anim nnɛ ne wɔn a wɔnni yɛn nkyɛn nnɛ nyinaa nso.+ 16 (Mo ara monim sɛdeɛ yɛtenaa Egypt asase soɔ ne sɛdeɛ yɛtwaam faa aman foforɔ nsase soɔ, aman a mofaa wɔn mfimfini no.+ 17 Na mohunuu wɔn akyiwadeɛ ne wɔn abosom fĩ+ a wɔde nnua ne aboɔ ne dwetɛ ne sika ayɛ a ɛwɔ wɔn nkyɛn no.) 18 Monhwɛ yie na mo mu ɔbarima anaa ɔbaa anaa abusua anaa abusuakuo bi akoma ammane amfiri Yehowa yɛn Nyankopɔn ho nnɛ ankɔsom amanaman no anyame,+ na nhini bi amfefɛ anso awɔnwono a ɛdi awuo.+
19 “Na sɛ obi te ntanka yi+ na ɔhyira ne ho n’akomam ka sɛ ‘Mepirim m’akoma mpo a,+ mɛnya asomdwoeɛ,’+ na ɔyɛ n’adwene sɛ ɔbɛpra deɛ asi frɔmm ne deɛ ahoa nyinaa akɔ a, 20 ɛnneɛ Yehowa nso remfa mfiri no,+ mmom Yehowa bo bɛfu+ no na ɔde n’anibereɛ+ mu wisie bɛpunu no,+ na nnome a ɛwɔ nwoma yi mu nyinaa bɛba ne so,+ na Yehowa bɛpepa ne din afiri ɔsoro ase. 21 Na Yehowa bɛyi+ no afiri Israel mmusua nyinaa mu de ɔhaw aba ne so, sɛdeɛ apam no mu nnome a wɔatwerɛ no mmara nwoma yi mu no teɛ.
22 “Awoɔ ntoatoasoɔ a wɔbɛba daakye, mo nkyirimma, ne ahɔhoɔ a wɔfiri akyirikyiri asase so nyinaa bɛka ho asɛm, berɛ a wɔhunu ɔhaw ne nyarewa a Yehowa de aba asase no soɔ no.+ 23 Sɛ wɔhunu sɛ sɔfe ne nkyene+ ne ɔhyew+ asɛe asase no nyinaa na obiara ntumi nnua adeɛ wɔ so, na biribiara ntumi mfifi wɔ so, na ayɛ sɛ Sodom ne Gomora+ ne Adma+ ne Seboiim+ a Yehowa nam n’abufuhyeɛ so ka guiɛ no a,+ 24 aman no nyinaa bɛka sɛ, ‘Adɛn nti na Yehowa ayɛ asase yi saa?+ Ɛdeɛn ne abufuhyeɛ kɛseɛ yi?’ 25 Na wɔbɛka sɛ, ‘Ɛfiri sɛ wɔapo apam+ a Yehowa wɔn agyanom Nyankopɔn ne wɔn yɛeɛ berɛ a ɔyii wɔn firii Egypt asase soɔ no.+ 26 Na wɔakɔsom anyame foforɔ akoto wɔn, anyame a wɔnnim wɔn a ɛnyɛ ɔno na ɔde maa wɔn.+ 27 Afei Yehowa abufuo dɛre tiaa asase no na ɔde nnome a wɔatwerɛ no nwoma yi mu nyinaa baa so.+ 28 Enti Yehowa de anibereɛ ne abufuo+ tuu wɔn firii wɔn asase so kɔtoo wɔn guu asase foforɔ so sɛdeɛ ɛteɛ nnɛ yi.’+
29 “Nsɛm a ahunta+ yɛ Yehowa yɛn Nyankopɔn dea, na deɛ wɔayi no adie+ no yɛ yɛne yɛn mma dea daa, na ama yɛadi mmara yi mu nsɛm nyinaa so.+