Deuteronomium

30 “Na ɛba sɛ nsɛm yi nyinaa ba wo so, nhyira+ ne nnome+ a mede asi w’anim yi nyinaa, na wokae+ no aman a Yehowa wo Nyankopɔn apamo wo+ kɔ soɔ no nyinaa mu, 2 na wosan ba Yehowa wo Nyankopɔn nkyɛn+ na wo ne wo mma de mo akoma ne mo kra nyinaa tie n’ahyɛdeɛ a mede rema wo nnɛ yi a,+ 3 ɛnneɛ Yehowa wo Nyankopɔn bɛhu wo mmɔbɔ+ na ɔde wo nkurɔfoɔ a wɔwɔ nkoasom+ mu no aba, na waboaboa wɔn ano afiri aman a Yehowa wo Nyankopɔn pamoo wo kɔɔ soɔ no nyinaa so.+ 4 Sɛ wo nkurɔfoɔ no ahwete akɔduru ɔsoro akyi tɔnn mpo a, Yehowa wo Nyankopɔn bɛboaboa wɔn ano afiri hɔ aba.+ 5 Yehowa wo Nyankopɔn de wo bɛba asase a ɔde maa w’agyanom no so na woafa; ɔbɛdom wo na wama w’ase atrɛ asene w’agyanom.+ 6 Na Yehowa wo Nyankopɔn bɛtwa w’akoma+ ne w’asefoɔ+ akoma twetia na wode w’akoma nyinaa ne wo kra nyinaa adɔ Yehowa wo Nyankopɔn na woanya nkwa.+ 7 Na Yehowa wo Nyankopɔn de nnome yi nyinaa bɛba w’atamfo ne wɔn a wɔkyiri woɔ a wɔtaa woɔ nyinaa so.+

8 “Nanso wo deɛ, wobɛsesã w’akwan abɛtie Yehowa asɛm na woadi n’ahyɛdeɛ a mede rema wo nnɛ yi nyinaa so.+ 9 Afei Yehowa wo Nyankopɔn bɛhyira wo nsa ano adwuma ama no abu so,+ na wo yafunu mu aba bɛdɔɔso, na w’afieboa ase atrɛ+ na w’afuo mu nnɔbaeɛ abu so,+ na sɛdeɛ Yehowa ani gyee w’agyanom ho no, saa ara na n’ani bɛgye wo ho+ na wahyira woɔ.+ 10 Ɛbɛba saa ɛfiri sɛ wobɛtie Yehowa wo Nyankopɔn asɛm na woadi ne mmara ne n’ahyɛdeɛ a wɔatwerɛ no mmara nwoma yi mu no so,+ na wode w’akoma ne wo kra nyinaa bɛsan aba Yehowa wo Nyankopɔn nkyɛn.+

11 “Mmara a mede rema wo nnɛ yi nyɛ den dodo mma wo na ɛnni akyiri nso.+ 12 Ɛnni soro na woaka sɛ, ‘Hwan na ɔbɛforo akɔ soro akɔfa abrɛ yɛn ama yɛateɛ na yɛadi soɔ?’+ 13 Na ɛnni po agya nso na woaka sɛ, ‘Hwan na ɔbɛtwa akɔ po agya akɔfa abrɛ yɛn ama yɛateɛ na yɛadi soɔ?’ 14 Na asɛm no bɛn wo pɛɛ, ɛwɔ w’anom ne w’akomam,+ enti ɛno ara ne sɛ wobɛdi soɔ.+

15 “Ɛnnɛ mede nkwa ne papa, owuo ne bɔne asi w’anim.+ 16 Sɛ wotie Yehowa wo Nyankopɔn ahyɛdeɛ a mede rema wo nnɛ yi, na wodɔ Yehowa wo Nyankopɔn,+ na wonante n’akwan so di ne mmara nsɛm+ ne n’ahyɛdeɛ ne n’atemmusɛm+ nyinaa so a, ɛnneɛ wobɛnya nkwa+ na w’ase atrɛ, na Yehowa wo Nyankopɔn bɛhyira wo asase a worekɔfa no so.+

17 “Na sɛ w’akoma dane na woantie,+ na wɔto wo bradɛ ma wokɔkoto anyame foforɔ na wosom wɔn a,+ 18 ɛnneɛ meka no pen kyerɛ mo nnɛ sɛ wɔbɛsɛe mo,+ na morenkyɛre asase a moretwa Yordan akɔfa no so. 19 Ɛnnɛ mefrɛ ɔsoro ne asase sɛ wɔnni mo ho adanseɛ:+ Mede nkwa ne owuo,+ nhyira+ ne nnome,+ asi w’anim; enti fa nkwa na wo ne w’asefoɔ anya nkwa.+ 20 Na dɔ Yehowa wo Nyankopɔn+ na tie n’asɛm na fa wo ho fam ne ho,+ ɛfiri sɛ ɔno na ɔma wo nkwa ne nna tenten.+ Woyɛ saa a, wobɛtena asase a Yehowa kaa w’agyanom Abraham, Isak, ne Yakob ntam sɛ ɔde bɛma wɔn no so.”+