Atemmufoɔ

11 Saa berɛ yi, na Gileadni+ bi a ɔde Yefta+ a ne maame yɛ ɔbaa dwamanfoɔ+ abɛyɛ ɔbarima katakyie kokoɔdurofoɔ.+ Ná Yefta papa din de Gilead. 2 Na Gilead yere woo mma mmarima maa no. Afei berɛ a ne yere no mma nyinyiniiɛ no, wɔpamoo Yefta ka kyerɛɛ no sɛ: “Wonni agyapadeɛ biara wɔ yɛn papa fie,+ ɛfiri sɛ ɔbaa foforɔ bi ba ne wo.” 3 Enti Yefta firii ne nuanom nkyɛn kɔtenaa Tob+ asase so, na akobɔfoɔ bi boaa wɔn ho ano bɛkaa Yefta ho, na ɔpue a, wɔne no na ɛkorɔ.+

4 Akyire yi Ammonfoɔ ne Israelfoɔ bɛkoeɛ.+ 5 Berɛ a Ammonfoɔ ne Israelfoɔ bɛkoeɛ no,+ Gilead mpanimfoɔ yɛɛ ntɛm kɔɔ Tob+ asase so sɛ wɔrekɔfa Yefta aba. 6 Na wɔka kyerɛɛ Yefta sɛ: “Bra bɛyɛ yɛn sahene na yɛne Ammonfoɔ nko.” 7 Ɛnna Yefta bisaa Gilead mpanimfoɔ+ no sɛ: “Ɛnyɛ mo na ɔtan nti mopamoo me firii me papa fie no?+ Afei sɛ mo ho akyere mo a, moaba sɛ menyɛ mo dɛn?”+ 8 Na Gilead mpanimfoɔ no ka kyerɛɛ Yefta sɛ: “Ɛno nti na yɛasan aba wo nkyɛn yi.+ Enti ma yɛnkɔ na yɛne Ammonfoɔ nkɔko, na yɛbɛma woadi Gileadfoɔ+ nyinaa so.” 9 Ɛnna Yefta ka kyerɛɛ Gilead mpanimfoɔ no sɛ: “Sɛ mode me san kɔ sɛ me ne Ammonfoɔ nkɔko, na Yehowa de wɔn hyɛ me nsa+ a, ɛnneɛ mɛyɛ mo tiri!” 10 Na Gilead mpanimfoɔ no ka kyerɛɛ Yefta sɛ: “Yehowa ate, enti sɛ yɛanyɛ deɛ woaka yi a,+ ɔno ne yɛn ntam danseni.”+ 11 Ɛnna Yefta ne Gilead mpanimfoɔ no kɔeɛ, na ɔman no de no yɛɛ wɔn tiri ne wɔn sahene.+ Na Yefta de n’asɛm nyinaa too Yehowa anim+ wɔ Mispa.+

12 Afei Yefta tuu abɔfoɔ kɔɔ Ammon+ hene nkyɛn kɔbisaa no sɛ: “Asɛm bɛn na me ne wo wɔ+ a enti woaba m’asase so sɛ wo ne me rebɛko yi?” 13 Na Ammonfoɔ hene ka kyerɛɛ Yefta abɔfoɔ no sɛ: “Asɛm no ara ne sɛ, berɛ a Israelfoɔ firi Egypt reba no, wɔfaa m’asase+ de firi Arnon+ kɔ Yabok kɔsi Yordan+ ano. Enti dane ma me komm.” 14 Nanso Yefta san tuu abɔfoɔ kɔɔ Ammon hene nkyɛn 15 kɔka kyerɛɛ no sɛ:

“Yefta se yɛnka nkyerɛ wo sɛ, ‘Israel amfa Moab+ ne Ammonfoɔ+ asase biara. 16 Berɛ a Israelfoɔ firi Egypt reba no, wɔfaa serɛ so bɛduruu Po Kɔkɔɔ+ no ho, na wɔfiri hɔ baa Kades.+ 17 Afei Israel tuu abɔfoɔ kɔɔ Edom+ hene nkyɛn kɔka kyerɛɛ no sɛ: “Mesrɛ wo ma memfa w’asase so,” nanso Edom hene ampene. Na wɔsoma kɔɔ Moab+ hene nso nkyɛn, na ɔno nso ampene. Enti Israelfoɔ tenaa Kades.+ 18 Berɛ a wɔnam serɛ soɔ no, wɔtwa faa Edom+ ne Moab asase ho kɔpuee Moab asase no apueeɛ,+ na wɔkɔsoɛɛ Arnon mpɔtamu. Na wɔantra amma Moab asase so,+ ɛfiri sɛ na Arnon da Moab hyeɛ so.+

19 “‘Akyire yi Israel somaa nnipa kɔɔ Amorifoɔ hene Sihon a ɔdi adeɛ wɔ Hesbon+ no nkyɛn kɔka kyerɛɛ no sɛ: “Yɛsrɛ wo ma yɛmfa w’asase so nkɔ m’asase so.”+ 20 Nanso na Sihon tirim ntene no sɛ ɔbɛma Israelfoɔ afa n’asase soɔ, na ɔboaboaa ne dɔm nyinaa ano wɔ Yahas+ ne Israelfoɔ koeɛ.+ 21 Na Israel Nyankopɔn Yehowa de Sihon ne ne dɔm nyinaa hyɛɛ Israelfoɔ nsa, na wɔkunkum Amorifoɔ faa asase a wɔte soɔ nyinaa.+ 22 Wɔfaa Amorifoɔ asase nyinaa firi Arnon kɔsi Yabok, firi serɛ so kɔsi Yordan ano.+

23 “‘Enti Israel Nyankopɔn Yehowa na ɔtuu Amorifoɔ firii ne man Israel anim,+ na wo nso wopɛ sɛ wotu ɔman yi anaa? 24 Ɛnyɛ asase a wo nyame Kemos+ bɛma woagyeɛ no na wobɛfa? Enti yɛn nso, asase a yɛn Nyankopɔn Yehowa bɛma yɛagyeɛ no na yɛbɛfa.+ 25 Wosusu sɛ wokyɛn Sipor ba Balak, Moab hene no, anaa?+ Ɔne Israel dii asie, anaa ɔne wɔn koo pɛn? 26 Berɛ a Israel te Hesbon ne ɛho nkuro+ ne Aroer+ ne ɛho nkuro ne nkuro a ɛgu Arnon nsunoa nyinaa mu mfeɛ ahasa no, adɛn nti na woannye amfiri wɔn nsam saa berɛ no?+ 27 Me deɛ, menyɛɛ wo bɔne biara, na wo mmom na woayɛ bɔne sɛ wode ntɔkwa atoa me. Ɔtemmufoɔ+ Yehowa no ara mmu Israelfoɔ ne Ammonfoɔ ntam atɛn nnɛ.’”

28 Na Ammonfoɔ hene no antie asɛm a Yefta soma maa wɔkɔka kyerɛɛ no no.+

29 Afei Yehowa honhom baa Yefta so+ na ɔkɔfaa Gilead ne Manase kɔɔ Gilead-Mispe, na ɔfiri Gilead-Mispe+ kɔɔ Ammonfoɔ so.

30 Na Yefta hyɛɛ Yehowa bɔ+ sɛ: “Sɛ wode Ammonfoɔ hyɛ me nsa, 31 na mefiri Ammonfoɔ so ba asomdwoeɛ mu+ a, obiara a ɔbɛfiri me fie abɛhyia me no bɛyɛ Yehowa dea,+ na mede no bɛbɔ ɔhyeɛ afɔdeɛ.”+

32 Enti Yefta kɔɔ Ammonfoɔ so ne wɔn kɔkoeɛ, na Yehowa de wɔn hyɛɛ ne nsa. 33 Na ɔkunkum wɔn firii Aroer ara kɔduruu Minit,+ nkuro aduonu, na ɔdwerɛɛ nnipa no kɔduruu Abel-Keramim. Enti wɔbrɛɛ Ammonfoɔ ase maa Israelfoɔ.

34 Afei Yefta baa Mispa,+ na ɔrekɔ ne fie no, hwɛ, ne babaa de mpintin ne asa bɛhyiaa no!+ Ná ɔdi no bakorɔ; ɔnni ɔbabarima anaa ɔbabaa biara ka ne ho. 35 Berɛ a n’ani bɔɔ ne soɔ ara pɛ na ɔsuanee n’atadeɛ mu,+ na ɔkaa sɛ: “Ao me ba! Woama mahodwo, sɛɛ na wo na merebɛtwa wo asuo. Nanso manya abue m’ano ahyɛ Yehowa bɔ, enti mentumi nsan m’akyi.”+

36 Ɛnna ne babaa no ka kyerɛɛ no sɛ: “Papa, sɛ woabue w’ano ahyɛ Yehowa bɔ a, ɛnneɛ deɛ afiri w’anom no, yɛ me saa ara,+ ɛfiri sɛ Yehowa atua w’atamfo Ammonfoɔ so ka ama wo.” 37 Na ɔtoaa so ka kyerɛɛ ne papa sɛ: “Deɛ meresrɛ woɔ nie: Gya me kwan na menkɔ mmepɔ so abosome mmienu, na me ne me nnamfonom nkɔsu me baabunuyɛ.”+

38 Ɛnna ne papa kaa sɛ: “Kɔ!” Enti ɔgyaa no kwan maa no kɔɔ abosome mmienu. Na ɔne ne nnamfonom kɔsuu ne baabunuyɛ wɔ mmepɔ so. 39 Abosome mmienu no baa awieeɛ no, ɔbaa ne papa nkyɛn, na ɔyɛɛ no sɛdeɛ wahyɛ bɔ no.+ Na ababaa no ne ɔbarima biara anna da. Afei ɛbɛyɛɛ amanneɛ wɔ Israel sɛ: 40 Afe biara Israel mmabaa kɔkamfo Gileadni Yefta babaa no nnanan.+