Atemmufoɔ

12 Na Efraim mmarima boaa wɔn ho ano kɔɔ atifi fam kɔka kyerɛɛ Yefta sɛ: “Adɛn nti na wo ne Ammonfoɔ rekɔko no woamfrɛ yɛn amma yɛne wo ankorɔ?+ Yɛde gya bɛhye wo fie agu wo so.”+ 2 Na Yefta ka kyerɛɛ wɔn sɛ: “Manso kɛseɛ bi bɛtɔɔ me ne me man ne Ammonfoɔ ntam.+ Na mebɛfrɛɛ mo sɛ mommɛboa me, nanso moammɛgye me amfiri wɔn nsam. 3 Berɛ a mehunuu sɛ moremma mmɛgye me no, meyɛɛ m’adwene sɛ mede me kra bɛto me nsam+ ne Ammonfoɔ akɔko.+ Na Yehowa nso de wɔn hyɛɛ me nsa. Afei adɛn nti na moaba me so nnɛ sɛ mo ne me rebɛko yi?”

4 Ɛhɔ ara na Yefta boaboaa Gilead+ mmarima nyinaa ano ne Efraimfoɔ koeɛ; na Gilead mmarima no kunkum Efraimfoɔ no, ɛfiri sɛ wɔkaa sɛ: “Mo Gileadfoɔ, moyɛ Efraim adwanefoɔ a mowɔ Efraim ne Manase mu.” 5 Na Gileadfoɔ dii Efraimfoɔ anim kɔsii Yordan asutwareeɛ+ no kwan. Afei sɛ Efraimfoɔ a wɔredwane no bi duru hɔ na ɔka sɛ: “Momma mentwa nkɔ” a, Gileadfoɔ no bisa no sɛ: “Woyɛ Efraimni?” Sɛ ɔka sɛ: “Dabi” a, 6 na wɔaka akyerɛ no sɛ: “Ka sɛ Hyibolet.”*+ Nanso ɛyɛ a ɔntumi nka no yie, enti ɔka sɛ “Sibolet.” Ɛba saa a na wɔakye no aku no wɔ Yordan asutwareeɛ hɔ. Saa berɛ no, Efraimfoɔ mpem aduanan mmienu na wɔhweree wɔn nkwa.+

7 Gileadni Yefta buu Israel atɛn mfeɛ nsia, na ɛno akyi no ɔwuiɛ, na wɔsiee no ne kurom wɔ Gilead.

8 N’akyi no, Ibsan a ɔfiri Betlehem+ bɛbuu Israel atɛn.+ 9 Ɔwoo mma mmarima aduasa ne mma mmaa aduasa. Na ɔsoma maa wɔkɔfaa mmaa aduasa firii baabi brɛɛ ne mma mmarima no. Na ɔbuu Israel atɛn mfeɛ nson. 10 Akyire yi Ibsan wuiɛ, na wɔsiee no Betlehem.

11 N’akyi no, Sebulonni+ Elon bɛbuu Israel atɛn. Na ɔbuu Israel atɛn mfeɛ du. 12 Na Sebulonni Elon wuiɛ, na wɔsiee no Ayalon wɔ Sebulon asase so.

13 N’akyi no Piratonni+ Hilel ba Abdon firii aseɛ buu Israel atɛn. 14 Ɔnyaa mma mmarima aduanan ne mmanana aduasa a wɔtenatenaa mfunumu aduɔson soɔ.+ Na ɔbuu Israel atɛn mfeɛ nwɔtwe. 15 Akyire yi Piratonni Hilel ba Abdon wuiɛ, na wɔsiee no Piraton wɔ Efraimfoɔ asase so wɔ Amalek+ bepɔ so.