Atemmufoɔ
14 Na Samson kɔɔ Timna+ kɔhunuu Filistifoɔ mma mmaa no baako wɔ hɔ. 2 Enti ɔka kyerɛɛ ne papa ne ne maame sɛ: “Mahunu Filistini ababaa bi wɔ Timna, na mepɛ sɛ mokɔgye no awareɛ ma me.”+ 3 Na ne papa ne ne maame bisaa no sɛ: “Woanhunu ɔbaa biara wɔ wo nuanom ne me nkurɔfoɔ nyinaa mu+ a enti wopɛ sɛ wokɔware ɔbaa firi Filistifoɔ momonotofoɔ yi mu?”+ Nanso Samson ka kyerɛɛ ne papa sɛ: “Ɔno ara na m’ani gye ne ho, enti kɔgye no ma me.” 4 Ná ne papa ne ne maame nnim sɛ Yehowa nsa wom,+ ɛfiri sɛ na ɔrehwehwɛ kwan a ɔbɛfa so anya Filistifoɔ no. Saa berɛ no na Filistifoɔ di Israel so.+
5 Enti Samson ne ne papa ne ne maame siim kɔɔ Timna. Na berɛ a ɔduruu Timna+ bobe nturo mu no, ɔbɛhwɛ a, gyata bi na ɔrebobom ba ne soɔ yi! 6 Ɛnna Yehowa honhom baa ne soɔ,+ na ɔwaee aboa no mu mmienu sɛdeɛ obi wae ɔpapo kumaa mu, nanso na ɔnkura biribiara wɔ ne nsam. Na wammɔ deɛ ɔyɛeɛ no so ankyerɛ ne papa anaa ne maame. 7 Na ɔtoaa so kɔɔ n’anim ne ɔbaa no kɔkasaeɛ, na Samson hunuu sɛ ɔbaa no da so ara sɔ n’ani.+
8 Berɛ bi akyi no, ɔkɔɔ sɛ ɔrekɔfa ɔbaa no aba fie.+ Na ɔmane kɔhwɛɛ gyata funu no, na ɔhunuu sɛ nwowa ne ɛwoɔ+ ahyɛ mu mã. 9 Enti ɔyii bi kuraa ne nsam, na ɔrekɔ nyinaa na ɔredi.+ Berɛ a ɔkɔtoo ne papa ne ne maame no, ɔmaa wɔn bi diiɛ. Nanso wanka ankyerɛ wɔn sɛ gyata no funu mu na ɔyii ɛwoɔ no.
10 Na ne papa toaa so kɔɔ ɔbaa no nkyɛn, na Samson too pono wɔ hɔ,+ ɛfiri sɛ saa na na mmeranteɛ no taa yɛ. 11 Berɛ a wɔhunuu no no, wɔde mmarima aduasa brɛɛ no sɛ ayeforɔkunu nnamfo a wɔbɛtena ne ho. 12 Afei Samson ka kyerɛɛ wɔn sɛ: “Mewɔ aborɔme bi a mepɛ sɛ mokyerɛ me aseɛ.+ Sɛ motumi kyerɛ aseɛ ansa na apontoɔ yi aba awieeɛ nnanson+ akyi a, mɛma mo atadeɛ nhyɛaseɛ aduasa ne ngugusoɔ+ nso aduasa. 13 Na sɛ moantumi ankyerɛ me aseɛ a, ɛnneɛ mobɛma me atadeɛ nhyɛaseɛ aduasa ne ngugusoɔ nso aduasa.” Na wɔka kyerɛɛ no sɛ: “To w’aborɔme no na yɛntie.” 14 Enti ɔka kyerɛɛ wɔn sɛ:
“Odidifoɔ mu+ na wɔnyaa biribi a wɔdie,
Na ɔhoɔdenfoɔ mu na wɔnyaa ade fremfrem.”+
Na wɔtenaa ho nnansa a wɔantumi ankyerɛ aseɛ. 15 Afei da a ɛtɔ so nnan no, wɔka kyerɛɛ Samson yere sɛ: “Daadaa wo kunu na ɔnkyerɛ yɛn aborɔme no ase.+ Anyɛ saa a, yɛbɛhye wo ne wo papa fie nyinaa.+ Adɛn, mode yɛn baa ha sɛ morebɛpra yɛn ho nneɛma+ anaa?” 16 Enti Samson yere su guu ne so+ sɛ: “Mahunu sɛ ɔtan na wotan me, na wonnɔ me koraa.+ Woato me nkurɔfoɔ aborɔme,+ nanso wonka nkyerɛɛ me.” Ɛnna ɔka kyerɛɛ no sɛ: “Hwɛ, me papa ne me maame mpo menka nkyerɛɛ wɔn,+ na wo na menka nkyerɛ woɔ?” 17 Na ɔsu guu ne so nnanson a apontoɔ no gu soɔ no nyinaa. Afei da a ɛtɔ so nson no, ɔka kyerɛɛ no ɛfiri sɛ na ɔreteetee no.+ Na ɔbaa no nso ka kyerɛɛ ne nkurɔfoɔ.+ 18 Enti da a ɛtɔ so nson no, ansa na ɔbɛkɔ ɔbaa no pia mu+ no, kurom hɔ mmarima no ka kyerɛɛ no sɛ:
“Ɛdeɛn na ɛyɛ fremfrem sene ɛwoɔ?
Na ɛdeɛn na ɛwɔ ahoɔden sene gyata?”+
Ɛnna ɔka kyerɛɛ wɔn sɛ:
“Sɛ moamfa me nantwie amfuntum a,+
Anka montumi nkyerɛ m’aborɔme yi ase.”+
19 Na Yehowa honhom baa ne so,+ na ɔkɔɔ Askelon+ kɔkunkum wɔn mmarima aduasa, na ɔyii wɔn ntadeɛ maa wɔn a wɔkyerɛɛ aborɔme no ase no.+ Na ɔde abufuo kɔɔ ne papa fie.
20 Na wɔde Samson yere+ no maa ne yɔnko+ bi a na ɔka ne ho sɛ ayeforɔkunu adamfo.