Yeremia

24 Ɛnna Yehowa de nkɛntɛn mmienu a borɔdɔma wom a ɛwɔ Yehowa asɔrefie no anim kyerɛɛ me. Saa berɛ no, na Babilon hene Nebukadnesar* asoa Yehoiakim ba+ Yekonia,*+ Yuda hene no ne Yuda mpanimfoɔ ne adwumfoɔ ne atomfoɔ* nyinaa kɔ. Ɔde wɔn firii Yerusalem kɔɔ Babilon.+ 2 Ná kɛntɛn baako mu borɔdɔma no yɛ paa te sɛ borɔdɔma aba a ɛdi kan. Kɛntɛn baako no mu borɔdɔma no deɛ, na ɛnyɛ koraa; ɛnyɛ koraa ma enti wodi a ɛnyɛ yie.

3 Na Yehowa bisaa me sɛ: “Yeremia, deɛn na wohunu?” Ɛnna mekaa sɛ: “Borɔdɔma; borɔdɔma a ɛyɛ no yɛ paa, na deɛ ɛnyɛ no deɛ, ɛnyɛ koraa; ɛnyɛ koraa ma enti wodi a ɛnyɛ yie.”+

4 Ɛnna Yehowa ka kyerɛɛ me sɛ: 5 “Deɛ Yehowa, Israel Nyankopɔn no aka nie, ‘Sɛdeɛ borɔdɔma a ɛyɛ yi teɛ no, saa ara na Yudafoɔ a metuu wɔn firii ha kɔɔ Kaldeafoɔ asaase so no, mɛbu wɔn sɛ wɔyɛ. 6 Mede m’ani bɛdi wɔn akyi ama no asi wɔn yie, na mɛma wɔasan aba asaase yi so.+ Mede wɔn bɛsisi hɔ, na merennwiri wɔn ngu; mɛdua wɔn, na merentutu wɔn ase.+ 7 Na mɛma wɔanya akoma a wɔde bɛhunu sɛ mene Yehowa.+ Wɔbɛyɛ me man na me nso mayɛ wɔn Nyankopɔn,+ ɛfiri sɛ wɔde wɔn akoma nyinaa bɛsan aba me nkyɛn.+

8 “‘Na borɔdɔma a ɛnyɛ koraa ma enti wodi a ɛnyɛ yie no,+ deɛ Yehowa aka afa ho nie: “Saa ara na Yuda hene Sedekia+ ne ne mpanimfoɔ ne Yerusalemfoɔ a wɔaka asaase yi so ne wɔn a wɔtete Egypt asaase so no, mɛbu wɔn sɛ wɔnyɛ.+ 9 Baabiara a mɛhwete wɔn akɔ no,+ mɛma wɔadane biribi a ɛyɛ hu ne abusudeɛ ama asaase so ahennie nyinaa,+ na mɛma wɔn anim agu ase, na wɔde wɔn bɛbu bɛ, na wɔahwɛ wɔn asere, na wɔayɛ nnome.+ 10 Na mede sekan+ ne kɔm ne nsanyareɛ a ɛdi awuo bɛba wɔn so+ akɔsi sɛ wɔbɛsa afiri asaase a mede maa wɔn ne wɔn agyanom no so.”’”