1 Berɛsosɛm
13 Dawid ne apem apem ne ɔha ha so ahwɛfoɔ ne akannifoɔ no nyinaa tuu agyina;+ 2 na Dawid ka kyerɛɛ Israel asafo no nyinaa sɛ: “Sɛ ɛyɛ wɔ mo ani so na ɛtene Yehowa yɛn Nyankopɔn anim a, momma yɛnsoma nkɔ yɛn nuanom nkaeɛ a wɔwɔ Israel+ asase soɔ nyinaa, ne asɔfoɔ+ ne Lewifoɔ+ a wɔwɔ wɔn nkuro+ mu ne ɛho mfikyisase soɔ no nkyɛn sɛ wɔmmoaboa wɔn ano mmra yɛn nkyɛn, 3 na yɛnkɔfa yɛn Nyankopɔn adaka+ no mmra ha.” Saul berɛ soɔ no, ɛho asɛm anhia wɔn.+ 4 Ɛnna asafo no nyinaa kaa sɛ wɔbɛyɛ deɛ waka no, ɛfiri sɛ na ɛtene ɔman no nyinaa ani so.+ 5 Enti Dawid boaboaa Israel nyinaa ano+ firi Egypt asubɔnten+ ho kɔsii Hamat+ kurotia sɛ wɔnkɔfa nokorɛ Nyankopɔn adaka+ no mfiri Kiriat-Yearim+ mmra.
6 Ɛnna Dawid ne Israel nyinaa kɔɔ Baala+ a ɛne Kiriat-Yearim, wɔ Yuda, sɛ wɔrekɔfa Yehowa, nokorɛ Nyankopɔn a ɔte kerubim+ soɔ no adaka a ne din da soɔ no aba. 7 Nanso teaseɛnam foforɔ+ bi so na wɔde nokorɛ Nyankopɔn adaka a wɔkɔfa firii Abinadab fie no siiɛ; Ussa ne Ahio+ na wɔdii teaseɛnam no anim. 8 Dawid ne Israel nyinaa de nnwom+ ne asankuo+ ne asankuten+ ne mpintin+ ne nnawuta ne ntotorobɛnto+ dii ahurisie+ dendeenden nokorɛ Nyankopɔn anim. 9 Wɔde nkakrankakra bɛduruu Kidon+ ayuporobea hɔ, na ɛhɔ na Ussa tenee ne nsa kɔsɔɔ Adaka+ no mu, ɛfiri sɛ ɛkaa kakraa bi sɛ anka anantwie no redane ahwe hɔ. 10 Ɛhɔ ara na Yehowa bo fuu Ussa, na ɔbɔɔ no hwee fam sɛ ɔtenee ne nsa kaa Adaka+ no, na ɔwuu Onyankopɔn anim hɔ.+ 11 Ɛnna Dawid bo fuu+ sɛ Yehowa abufuo adɛre atia Ussa. Na wɔbɛfrɛɛ hɔ Peres-Ussa de bɛsi nnɛ.
12 Na Dawid suroo nokorɛ Nyankopɔn no saa da no,+ na ɔkaa sɛ: “Mɛyɛ dɛn de nokorɛ Nyankopɔn adaka no aba me nkyɛn?”+ 13 Enti Dawid amfa Adaka no amma ne nkyɛn wɔ Dawid Kuro mu na mmom ɔde mane kɔɔ Gatni+ Obed-Edom fie.+ 14 Na nokorɛ Nyankopɔn adaka no kaa Obed-Edom fie+ abosome mmiɛnsa, na Yehowa kɔɔ so hyiraa+ Obed-Edom fie ne deɛ ɔwɔ nyinaa.