Deuteronomium

24 “Sɛ ɔbarima ware ɔbaa na ɔhunu sɛ ɔbaa no ayɛ biribi a ɛnyɛ ma enti ɔmpɛ no bio+ a, ɛnneɛ ɔntwerɛ awaregyaeɛ krataa+ nhyɛ ɔbaa no nsam na ɔmma no mfiri ne fie nkɔ.+ 2 Ɔmfiri fie hɔ nkɔware ɔbarima foforɔ.+ 3 Na sɛ ɔbarima a ɔtɔ so mmienu no nso ani nnye ne ho na ɔtwerɛ awaregyaeɛ krataa de hyɛ ne nsam pamo no firi ne fie, anaa sɛ ɔbarima no wu a, 4 ne kunu a ɔdi kan a ɔpamoo no no ntumi nware no bio berɛ a ɔbaa no ho agu fĩ no,+ ɛfiri sɛ Yehowa kyiri nneyɛɛ a ɛte saa. Enti hwɛ na woamma bɔne amma asase a Yehowa wo Nyankopɔn de ama woɔ no so.

5 “Sɛ ɔbarima ware foforɔ a,+ ɔnnkɔ sraadie, na ɔnnyɛ adwuma foforɔ biara nso. Ɔntena fie afe na ɔmma ne yere a wafa no no ani nnye.+

6 “Obiara nnnye oyuyammoɔ anaa ɛboɔ a ɛda soɔ no awowa.+ Sɛ ɔyɛ saa a, ɛyɛ ɔkra na wagye no awowa no.

7 “Sɛ wɔhunu sɛ obi akye ne nuanom Israelfoɔ no bi* asie+ na ɔne no di no atirimuɔden so na ɔtɔn no a,+ ɛsɛ sɛ deɛ wakye ne nua asie no wuo. Yɛ saa fa yi adebɔne firi wo mfimfini.+

8 “Hwɛ wo ho yie kwata ho,+ na hwɛ yɛ deɛ Lewifoɔ asɔfoɔ no bɛkyerɛ mo nyinaa.+ Monni deɛ maka akyerɛ wɔn no nyinaa so pɛpɛɛpɛ.+ 9 Kae deɛ Yehowa wo Nyankopɔn de yɛɛ Miriam ɛkwan soɔ, berɛ a mofiri Egypt reba no.+

10 “Sɛ wobɔ wo yɔnko bosea a,+ nkɔ ne fie nkɔgye deɛ ɔde asi awowa no.+ 11 Gyina abɔnten ma deɛ woabɔ no bosea no nkɔfa deɛ ɔde asi awowa no mmrɛ wo abɔnten hɔ. 12 Nanso sɛ onii no ho akyere no a, hwɛ na woamfa deɛ ɔde asi awowa no anto wo ho amma adeɛ ankye so.+ 13 Awia kɔtɔ ara a, san fa deɛ ɔde sii awowa no kɔma no+ na ɔmfa ne ntoma nna+ na ɔnhyira wo.+ Na Yehowa wo Nyankopɔn nso bɛbu no tenenee ama wo.+

14 “Nsisi ɔpaani hiani a ne ho akyere no; wo nua oo, ɔhɔhoɔ a ɔte w’asase so wɔ wo kurom oo, nsisi no.+ 15 Tua no ka da no ara,+ na mma awia nnkɔtɔ so ɛfiri sɛ ne ho akyere no, na n’akatua no ara ne ne kra anidasoɔ. Woanyɛ saa na ɔsu frɛ Yehowa+ a, ɛbɛdane bɔne ama wo.+

16 “Sɛ mma yɛ biribi a, nku wɔn agyanom, na sɛ agyanom nso yɛ biribi a, nku wɔn mma.+ Obiara bɔne ho na wɔnku no.+

17 “Sɛ ɔhɔhoɔ+ anaa agyanka+ de asɛm ba w’anim a, nnane atemmuo ani, na nnye kunafoɔ ntoma awowa.+ 18 Kae sɛ na woyɛ akoa Egypt asase so na Yehowa wo Nyankopɔn gyee wo firii hɔ.+ Ɛno nti na mede mmara yi rema woɔ na woadi so.

19 “Sɛ wotwa w’afuo mu nnɔbaeɛ+ na wogya nnɔbaeɛ a wɔakyekyere no bi wɔ hɔ a, nsan nkɔfa. Gya ma ɔhɔhoɔ ne agyanka ne okunafoɔ+ na Yehowa wo Nyankopɔn ahyira wo nsa ano adwuma nyinaa so.+

20 “Sɛ woporo wo ngodua a, nsan nkɔfa so bio. Gya deɛ aka soɔ no ma ɔhɔhoɔ ne agyanka ne okunafoɔ.+

21 “Sɛ wote wo bobeturom aba a, nsan w’akyi nkɔtete deɛ aka soɔ no. Gya ma ɔhɔhoɔ ne agyanka ne okunafoɔ. 22 Kae sɛ na woyɛ akoa wɔ Egypt asase so.+ Ɛno nti na mede mmara yi rema woɔ na woadi so.+