Deuteronomium

29 Eyi ne apam a Yehowa ka kyerɛɛ Mose sɛ ɔne Israelfo mpam wɔ Moab asase so no mu nsɛm. Ɛsono apam a ɔne wɔn pamee wɔ Horeb no.+

2 Afei Mose frɛɛ Israelfo no nyinaa ka kyerɛɛ wɔn sɛ: “Mo ankasa mode mo ani huu nea Yehowa de baa Farao ne ne nkoa ne n’asase nyinaa so wɔ Egypt no.+ 3 Muhuu sɔhwɛ akɛse+ ne nsɛnkyerɛnne+ ne anwonwade akɛse.+ 4 Nanso besi nnɛ, Yehowa mmaa mo koma a mode behu ne ani a mode bɛhwɛ ne aso a mode bɛte.+ 5 ‘Bere a mede mo faa sare so mfe aduanan no,+ mo ho ntade antetew na mo nan ase mpaboa anhi.+ 6 Moanni paanoo+ na moannom bobesa anaa mmosã biara na moahu sɛ mene Yehowa mo Nyankopɔn.’ 7 Afei bere a mubeduu ha no, Hesbon hene Sihon+ ne Basan hene Og+ behyiaa yɛn ne yɛn koe, na yedii wɔn so.+ 8 Na yegyee wɔn asase maa Rubenfo ne Gadfo ne Manase abusuakuw fã no.+ 9 Enti monhwɛ nni apam yi mu nsɛm so na ama biribiara a mobɛyɛ asi mo yiye.+

10 “Ɛnnɛ mo nyinaa gyina Yehowa mo Nyankopɔn anim, mo mmusua ti, mo mpanyimfo, mo atitiriw, Israel mmarima nyinaa,+ 11 ne mo mma nkumaa ne mo yerenom+ ne ahɔho+ a wɔwɔ mo nkyɛn nyinaa, wɔn a wɔkɔ anyina ma mo ne wɔn a wɔkɔ nsu ma mo.+ 12 Moahyia nnɛ sɛ mo ne Yehowa mo Nyankopɔn rebɛyɛ apam+ na moaka ntam wɔ Yehowa mo Nyankopɔn anim,+ 13 na moabɛyɛ ne man+ na ɔno nso ayɛ mo Nyankopɔn,+ sɛnea ɔhyɛɛ mo bɔ na ɔkaa mo agyanom Abraham+ ne Isak+ ne Yakob+ ntam no.

14 “Nanso ɛnyɛ mo nkutoo na me ne mo reyɛ apam ma moaka ɛho ntam yi,+ 15 na mmom obiara a ɔne yɛn gyina Yehowa yɛn Nyankopɔn anim nnɛ ne wɔn a wonni yɛn nkyɛn nnɛ nyinaa nso.+ 16 (Mo ankasa munim sɛnea yɛtenaa Egypt asase so ne sɛnea yetwaam faa aman foforo nsase so, aman a mofaa wɔn mfinimfini no.+ 17 Na muhuu wɔn akyide ne wɔn abosom fĩ+ a wɔde nnua ne abo ne dwetɛ ne sika ayɛ a ɛwɔ wɔn nkyɛn no.) 18 Monhwɛ yiye na mo mu ɔbarima anaa ɔbea anaa abusua anaa abusuakuw bi koma amman amfi Yehowa yɛn Nyankopɔn ho nnɛ ankɔsom amanaman no anyame,+ na ntini bi amfefɛw ansow awɔnwene a edi awu.+

19 “Na sɛ obi te ntanka yi+ na ohyira ne ho wɔ ne komam ka sɛ ‘Mipirim me koma mpo a,+ menya asomdwoe,’+ na ɔyɛ n’adwene sɛ ɔbɛpra nea asi frɔmm ne nea ahoa nyinaa akɔ a, 20 ɛnde Yehowa nso remfa mfiri no,+ mmom Yehowa bo befuw+ no na ɔde n’anibere+ mu wusiw bepun no,+ na nnome a ɛwɔ nhoma yi mu nyinaa bɛba no so,+ na Yehowa bɛpopa ne din afi ɔsoro ase. 21 Na Yehowa beyi+ no afi Israel mmusua nyinaa mu de ɔhaw aba no so, sɛnea apam no mu nnome a wɔakyerɛw wɔ mmara nhoma yi mu no te.

22 “Awo ntoatoaso a wɔbɛba daakye, mo nkyirimma, ne ahɔho a wofi akyirikyiri asase so nyinaa bɛka ho asɛm, bere a wohu ɔhaw ne nyarewa a Yehowa de aba asase no so no.+ 23 Sɛ wohu sɛ sufre ne nkyene+ ne ɔhyew+ asɛe asase no nyinaa na obiara ntumi nnua ade wɔ so, na biribiara ntumi mfifi wɔ so, na ayɛ sɛ Sodom ne Gomora+ ne Adma+ ne Seboiim+ a Yehowa nam n’abufuhyew so ka gui no a,+ 24 aman no nyinaa bɛka sɛ, ‘Dɛn nti na Yehowa ayɛ asase yi saa?+ Dɛn ne abufuhyew kɛse yi?’ 25 Na wɔbɛka sɛ, ‘Efisɛ wɔapo apam+ a Yehowa wɔn agyanom Nyankopɔn ne wɔn yɛe bere a oyii wɔn fii Egypt asase so no.+ 26 Na wɔakɔsom anyame foforo akotow wɔn, anyame a wonnim wɔn a ɛnyɛ ɔno na ɔde maa wɔn.+ 27 Afei Yehowa abufuw dɛw hyɛɛ asase no na ɔde nnome a wɔakyerɛw wɔ nhoma yi mu nyinaa baa so.+ 28 Enti Yehowa de anibere ne abufuw+ tuu wɔn fii wɔn asase so kɔtow wɔn guu asase foforo so sɛnea ɛte nnɛ yi.’+

29 “Nsɛm a ahintaw+ yɛ Yehowa yɛn Nyankopɔn dea, na nea wɔayi no adi+ no yɛ yɛne yɛn mma dea daa, na ama yɛadi mmara yi mu nsɛm nyinaa so.+