NEA EDI KAN A ƆDE KƆMAA TIMOTEO

1 Me Paul a yɛn Agyenkwa Nyankopɔn ne Kristo Yesu a ɔyɛ yɛn anidaso no ayi me sɛ Kristo Yesu somafo no,+ 2 mede krataa yi rekɔma Timoteo*+ a ɔyɛ me ba paa+ wɔ gyidi no mu no:

Agya Nyankopɔn ne yɛn Awurade Kristo Yesu adom ne mmɔborɔhunu ne asomdwoe nka wo.

3 Bere a merebɛkɔ Makedonia no, mesrɛɛ wo sɛ tena Efeso. Saa ara na seesei nso meresrɛ wo sɛ tena hɔ, sɛnea ɛbɛyɛ a wobɛma ebinom ate wɔn ho ase sɛ, ɛnsɛ sɛ wɔkyerɛkyerɛ nkyerɛkyerɛ foforo, 4 na ɛnsɛ sɛ wotie atosɛm+ ne abusua santen ho nsɛm. Saa nneɛma no, mfaso biara nni so.+ Nea ɛde ba ara ne akekakeka; ɛmma yennya biribiara a ɛhyɛ gyidi den mfi Onyankopɔn hɔ. 5 Nea ɛwom ne sɛ, akwankyerɛ* a mede ama yi, adwene a ɛwɔ akyi ara ne sɛ yebefi koma a emu tew, ne ahonim* pa, ne gyidi+ a nyaatwom nnim mu ada ɔdɔ adi.+ 6 Ebinom aman afi eyinom ho, enti nsɛnhunu+ na wɔkeka. 7 Wɔpɛ sɛ wɔkyerɛkyerɛ+ mmara, nanso nsɛm a wɔka no, wɔnte ase, na nea wogye gyina mu denneennen no nso, wɔnte ase.

8 Yenim sɛ, sɛ obi de Mmara no yɛ adwuma yiye* a, ɛnde na Mmara no yɛ papa. 9 Nanso ɛsɛ sɛ ɔkae sɛ, ɛnyɛ atreneefo nti na wɔhyɛ mmara, na mmom wɔhyɛ mmara ma mmaratofo+ ne atuatewfo, amumɔyɛfo ne abɔnefo, wɔn a wodi afoforo huammɔ* ne wɔn a wɔmfa nneɛma kronkron nyɛ hwee, wɔn a wokum wɔn papanom ne wɔn a wokum wɔn maamenom, awudifo, 10 aguamammɔfo,* mmarima a wɔne mmarima da, wɔn a wɔkyere nkurɔfo sie, atorofo, wɔn a wɔka ntam hunu,* ne biribi foforo biara a etia nkyerɛkyerɛ pa*+ no. 11 Anuonyam asɛmpa a efi anigye Nyankopɔn no nkyɛn a wɔde ahyɛ me nsa+ no, ɛno na saa nkyerɛkyerɛ pa no gyina so.

12 Meda yɛn Awurade Kristo Yesu a ɔhyɛɛ me den no ase, efisɛ wabu me ɔnokwafo de ɔsom adwuma bi ahyɛ me nsa.+ 13 Ɛwom, bere bi a atwam no mekekaa abususɛm, metan nkurɔfo ani, na meyɛɛ aniammɔnho.+ Nanso wohuu me mmɔbɔ, efisɛ na minnim nea mereyɛ, na gyidi a na minni nti na meyɛɛ saa. 14 Nanso yɛn Awurade adom dɔɔso boroo so, na na gyidi ne ɔdɔ a ɛwɔ Kristo Yesu mu nso ka ho. 15 Saa asɛm yi yɛ nokware, na ɛsɛ sɛ yegye tom paa. Ɛne sɛ: Kristo Yesu baa wiase sɛ ɔrebegye abɔnefo nkwa.+ Na mene ɔbɔnefo a ɔsen abɔnefo nyinaa.+ 16 Nanso, wohuu me mmɔbɔ sɛnea ɛbɛyɛ a, me a mesen abɔnefo nyinaa no, Kristo Yesu bɛfa me so ayi n’abotare nyinaa adi, na ɔde me ayɛ nhwɛso ama wɔn a wobegye no adi na wɔanya daa nkwa+ no.

17 Afei, mmeresanten Hene,+ nea ɔmporɔw,+ nea wonhu no,+ Onyankopɔn koro pɛ no,+ ɔno na nidi ne anuonyam nka no daa daa. Amen.

18 Me ba Timoteo, mede akwankyerɛ* yi rema wo, sɛnea wo ho nkɔm a wɔhyɛe no kyerɛ no, na nkɔmhyɛ no aboa wo ama woakɔ so ako ɔko pa no.+ 19 Bere a woreko ɔko pa no, kura gyidi ne ahonim pa+ mu. Ɛno na ebinom apia ato nkyɛn ama wɔn gyidi asɛe te sɛ po so hyɛn a abɔ. 20 Wɔn mu bi ne Himeneo+ ne Aleksandro, na mede wɔn ama Satan+ sɛnea ɛbɛyɛ a nteɛso bɛma wɔasua sɛ wɔrenkeka abususɛm.

2 Enti nea edi kan koraa no, m’afotu ne sɛ momfa nkotosrɛ, mpaebɔ, srɛ a wɔsrɛ ma afoforo, ne aseda nni mma nnipa ahorow nyinaa, 2 ahemfo ne wɔn a wɔwɔ dibea a ɛkorɔn* nyinaa,+ sɛnea ɛbɛyɛ a yɛbɛkɔ so de onyamesom pa ne anidahɔ a edi mu abɔ yɛn bra wɔ asomdwoe ne kommyɛ mu.+ 3 Ɛno na eye na ɛfata wɔ yɛn Agyenkwa Nyankopɔn+ anim; 4 ɔno na ɔpɛ sɛ ogye nnipa ahorow nyinaa+ na wonya nokware no ho nimdeɛ a edi mu. 5 Na Onyankopɔn baako na ɔwɔ hɔ,+ ne afei Onyankopɔn ne nnipa+ ntamgyinafo baako.+ Ɔno ne onipa Kristo Yesu.+ 6 Ɔno na ɔde ne ho mae sɛ agyede a ɛfata maa obiara*+ no. Eyi na wobedi ho adanse wɔ ɛno ara ne bere mu. 7 Adanse yi nti+ na wɔpaw me sɛ ɔsɛnkafo ne ɔsomafo,+ ne obi a ɔkyerɛkyerɛ gyidi ne nokware no kyerɛ amanaman no.+ Nokware na mereka, ɛnyɛ atoro na meredi.

8 Enti mepɛ sɛ mmarima na wɔbɔ mpae daa* wɔ baabiara, na wɔma nsa a ɛho tew so+ a abufuw+ ne akyinnyegye nni mu.+ 9 Saa ara na ɛsɛ sɛ mmea hyɛ ntaade a ɛfata, na wɔde ahobrɛase ne adwene a emu da hɔ siesie wɔn ho. Ɛnyɛ nea ehia ne sɛ wɔbɛbɔ wɔn ti kuntann,* na wɔde sika kɔkɔɔ anaa nhene pa anaa ntaade a ne bo yɛ den paa asiesie wɔn ho,+ 10 na mmom nea ehia ne sɛ wɔbɛyɛ nnwuma pa a ɛfata mmea a wɔkyerɛ sɛ wɔsom Onyankopɔn.+

11 Ɔbea nyɛ komm, na omfi ahobrɛase nyinaa mu nsua ade.+ 12 Memma ɔbea kwan sɛ ɔnkyerɛkyerɛ anaasɛ onni ɔbarima so tumi, na mmom ɔnyɛ komm.*+ 13 Efisɛ wodii kan bɔɔ Adam ansa na wɔrebɔ Hawa.+ 14 Afei nso, wɔannaadaa Adam, na mmom ɔbea no na wɔdaadaa no koraa+ ma ɔtoo mmara. 15 Nanso sɛ ɔkɔ so* tena gyidi ne ɔdɔ ne kronkronyɛ mu, na ɔma n’adwene mu da hɔ+ a, ɔnam abawo so+ benya ahobammɔ.

3 Asɛm yi yɛ nokware: Sɛ ɔbarima bi rebɔ ne ho mmɔden sɛ ɔbɛba abɛyɛ ɔhwɛfo+ a, na ɔrepɛ adwuma pa. 2 Enti ɛsɛ sɛ ɔhwɛfo yɛ obi a ne ho nni asɛm, ɛsɛ sɛ ɔyɛ okunu a ɔwɔ yere baako, ɔnyɛ nneɛma ntra so,* n’adwene mu da hɔ,*+ ɔyɛ n’ade pɛpɛɛpɛ, ɔpɛ ahɔhoyɛ,+ otumi kyerɛkyerɛ,+ 3 ɔnyɛ ɔkɔwensani,+ ɔmpɛ ntɔkwaw,* na mmom ɔte asɛm ase,+ ɔnyɛ obi a ɔne nkurɔfo ham,+ ɔnyɛ sikanibere,+ 4 ɔyɛ ɔbarima a odi* n’ankasa fifo so yiye, ne mma ani da fam paa, na wɔbrɛ wɔn ho ase ma no+ 5 (na sɛ obi nnim sɛnea obedi* n’ankasa fifo so a, ɔbɛyɛ dɛn atumi ahwɛ Onyankopɔn asafo so?), 6 ɛnsɛ sɛ ɔyɛ obi a waba gyidi no mu foforo,*+ efisɛ anhwɛ a ɔbɛyɛ ahomaso na wahwe atemmu a wɔde ama Ɔbonsam no mu. 7 Bio nso, ɛsɛ sɛ wɔn a wonni asafo no mu di ne ho adanse pa,*+ sɛnea ɛbɛyɛ a n’anim rengu ase na ɔntɔ Ɔbonsam afiri mu.

8 Asafo mu asomfo nso, ɛsɛ sɛ wɔma wɔn ani da fam, sɛ wɔka asɛm a, ɛnsɛ sɛ wɔdan wɔn ano,* ɛnsɛ sɛ wɔnom nsã boro so, ɛnsɛ sɛ wɔyɛ adifudepɛ hwehwɛ mfaso bɔne,+ 9 na ɛsɛ sɛ wɔde ahonim* a emu tew kura gyidi no ho ahintasɛm kronkron no mu.+

10 Afei nso, ɛsɛ sɛ wodi kan sɔ eyinom hwɛ sɛ wɔfata, na sɛ asɛm biara nni wɔn ho+ a, wɔama wɔasom sɛ asomfo.

11 Mmea nso, ɛsɛ sɛ wɔma wɔn ani da fam, wɔnnsɛe nkurɔfo din,+ wɔnnyɛ nneɛma nntra so;* ɛsɛ sɛ wodi nokware wɔ biribiara mu.+

12 Asafo mu somfo nyɛ okunu a ne yere yɛ baako, obi a odi ne mma ne n’ankasa fifo so yiye. 13 Na mmarima a wɔsom yiye no nya din pa,* na wotumi de ahotoso kɛse kasa wɔ gyidi a ɛwɔ Kristo Yesu mu no mu.

14 M’ani da so sɛ mɛba wo nkyɛn nnansa yi ara, nanso merekyerɛw eyinom abrɛ wo, 15 na sɛ ɛba sɛ mekyɛ a, woahu ɔkwan a ɛsɛ sɛ wofa so bɔ wo bra wɔ Onyankopɔn fi,+ kyerɛ sɛ, Onyankopɔn teasefo no asafo a ɛne nokware no dum ne ne nnyinaso no. 16 Nokwarem no, akyinnye biara nni ho sɛ onyamesom pa ho ahintasɛm kronkron yi sõ: ‘Woyii no adi ɔhonam mu,+ wobuu no bem honhom mu,+ oyii ne ho adi kyerɛɛ abɔfo,+ wɔkaa ne ho asɛm wɔ amanaman mu,+ wogyee no dii wɔ wiase,+ wogyee no kɔɔ ɔsoro wɔ anuonyam mu.’

4 Nanso asɛm a efi honhom mu no* ka no pefee sɛ, mmere bi bɛba a ebinom bɛtwe wɔn ho afi gyidi no ho akodi nnaadaasɛm a efi honhom mu*+ ne ahonhommɔne* nkyerɛkyerɛ akyi. 2 Nea ɛbɛma aba saa ne sɛ wobetie nyaatwomfo a wɔka atosɛm.+ Wɔn na wɔn ahonim* awu; ɛte sɛ etwã a dade ahye obi ama abɛda ne ho. 3 Wɔbara aware,+ na nnuan a Onyankopɔn bɔe sɛ wɔn a wɔwɔ gyidi+ na wɔahu nokware no yiye mfa aseda nni no,+ wɔka kyerɛ nkurɔfo sɛ ɛnsɛ sɛ wodi.+ 4 Nanso nea ɛwom ne sɛ, Onyankopɔn abɔde nyinaa ye,+ na sɛ obi da ase wɔ ho a, ɛnsɛ sɛ ɔpo biribiara,+ 5 efisɛ Onyankopɔn asɛm ne mpae a wɔbɔ gu so no ma ɛho tew.

6 Sɛ wode afotusɛm yi ma anuanom no a, wobɛyɛ Kristo Yesu somfo pa, obi a wɔde nsɛm a egyina gyidi ne nkyerɛkyerɛ pa so atete no;* ɛno na woadi akyi pɛpɛɛpɛ no.+ 7 Atosɛm a etia nneɛma kronkron, te sɛ nea mmerewa ka no, bɔ gu.+ Mmom, fa onyamesom pa si w’ani so na fa tete wo ho. 8 Efisɛ apɔwmuteɛteɛ so wɔ mfaso kakra de, nanso onyamesom pa so wɔ mfaso ade nyinaa mu, efisɛ ɛboa yɛn wɔ asetena mu nnɛ, na ɛbɛboa yɛn wɔ nkwa a ɛbɛba daakye no+ nso mu. 9 Saa asɛm no yɛ nokware, na ɛsɛ sɛ yegye tom paa. 10 Eyi nti na yɛyɛ adwumaden na yɛyere yɛn ho+ no, efisɛ yɛde yɛn ani ato Onyankopɔn teasefo no so. Ɔno na ɔyɛ nnipa ahorow nyinaa+ Agyenkwa,+ ne titiriw no, anokwafo.

11 Kɔ so fa ahyɛde ahorow yi ma na fa kyerɛkyerɛ. 12 Mma obiara mmmu aberante a woyɛ no animtiaa* da. Mmom no, yɛ nhwɛso ma anokwafo no wɔ ɔkasa, abrabɔ, ɔdɔ, gyidi, ne ahotew mu. 13 Ma w’ani nku baguam akenkan,+ afotu,* ne nkyerɛkyerɛ ho kosi sɛ mɛba. 14 Mmu w’ani ngu akyɛde a ɛwɔ wo mu no so, nea wɔnam nkɔmhyɛ so ma wunyae, bere a mpanyimfo kuw no de wɔn nsa guu wo so no.+ 15 Dwinnwen eyinom ho; fa w’adwene nyinaa si so, na ama nnipa nyinaa ahu wo nkɔso. 16 Hwɛ wo ho so yiye bere nyinaa, na ma w’ani nku wo nkyerɛkyerɛ+ ho daa. Yere wo ho yɛ eyinom, na sɛ woyɛ saa a, wubegye wo ho ne wɔn a wotie wo no nkwa.+

5 Nkasa nkyerɛ ɔpanyin yayaayaw.*+ Mmom no, wo ne no nkasa sɛ agya, wo ne mmerante nkasa sɛ nua mmarima, 2 wo ne mmea mpanyimfo nkasa sɛ maamenom, wo ne mmabaa nkasa sɛ nua mmea wɔ ahotew nyinaa mu.

3 Akunafo a wɔyɛ akunafo paa* no, wɔn na hwɛ wɔn.*+ 4 Nanso sɛ okunafo bi wɔ mma anaa mmanana a, ɛnde ne mma ne ne mmanana no nsua sɛ wobedi kan ahwɛ wɔn ankasa fifo sɛnea onyamesom pa hwehwɛ.+ Na wɔmfa* nea ɛfata wɔn awofo ne wɔn nananom mma wɔn,+ efisɛ eyi na ɛsɔ Onyankopɔn ani.+ 5 Ɔbea a ɔyɛ okunafo paa, a ahia no buruburoo no, ɔde n’ani ato Onyankopɔn so,+ na daa ɔde nkotosrɛ ne mpaebɔ kɔ n’anim awia ne anadwo.+ 6 Na okunafo a odi ɔhonam akɔnnɔ akyi de, ɔte ase, nanso wawu.* 7 Enti kɔ so fa akwankyerɛ* ahorow yi ma, na obi annya wɔn ho asɛm anka. 8 Nokwasɛm ni, sɛ obi nhwɛ ɔno ara ne nkurɔfo, ne ne titiriw no, ne fifo a, wapo gyidi no, na ɔyɛ onipa bɔne sen nea onnye nni mpo.+

9 Sɛ wɔde okunafo bi din bɛba abɛka ho a, gye sɛ wadi mfe 60 rekɔ, na ɛsɛ sɛ ɔyɛ ɔbea a na ne kunu yɛ baako, 10 nea wodi ne ho adanse sɛ ɔyɛɛ nnwuma pa,+ nea ɔtetee mma,+ nea ogyee ahɔho,+ nea ɔhohoroo akronkronfo nan ho,+ nea ɔboaa wɔn a wɔwɔ amanehunu mu,+ nea ofi ne koma nyinaa mu yɛɛ adwuma pa biara bi.

11 Nanso mfa akunafo a wonnyinii din nka ho, efisɛ sɛ nna ho akɔnnɔ a ɛwɔ wɔn mu no yi wɔn adwene fi Kristo so a, ɛyɛ a na wɔpɛ sɛ wɔware. 12 Na wobenya atemmu efisɛ wɔapo gyidi a na wɔwɔ kan no.* 13 Bere koro no ara nso, wɔba bɛyɛ nkurɔfo a wɔmpɛ adwuma,* na wokyinkyin nkurɔfo afi mu. Nokwasɛm ne sɛ, ɛnyɛ adwuma nko na wɔmpɛ, na mmom wodi nseku de wɔn ho gyigye nkurɔfo nsɛm mu+ nso, na wɔkeka nsɛm a ɛnsɛ sɛ wɔka. 14 Enti mepɛ sɛ akunafo a wonnyinii no ware,+ na wɔwo mma,+ na wɔhwɛ fie, na wɔamma ɔtamfo no annya yɛn ho asɛm anka. 15 Nea ɛwom ne sɛ, akunafo binom aman akodi Satan akyi dedaw. 16 Sɛ ɔbea gyidini bi wɔ abusuafo a wɔyɛ akunafo a, ma ɔmmoa wɔn, na ammɛyɛ adesoa anto asafo no so. Ɛno bɛma asafo no atumi aboa wɔn a wɔyɛ akunafo paa* no.+

17 Wɔmfa nidi mmɔho+ mma mpanyimfo a wodi nneɛma anim yiye+ no, ne titiriw no, wɔn a wɔbɔ mmɔden wɔ ɔkasa ne nkyerɛkyerɛ mu+ no. 18 Na kyerɛwsɛm no ka sɛ, “Sɛ nantwi reporow hwiit* a, ɛnsɛ sɛ wokyekyere n’ano,”+ na ɛsan ka sɛ, “Odwumayɛni akatua sɛ no.”+ 19 Sɛ wɔbɔ ɔpanyin* bi sobo a, nnye ntom, gye sɛ egyina adansefo baanu anaa baasa anom asɛm so.+ 20 Wɔn a wɔte bɔne mu no,+ kasa kyerɛ wɔn anibere so+ wɔ wɔn a wɔwɔ hɔ nyinaa anim, na ayɛ kɔkɔbɔ ama wɔn a aka no.* 21 Mehyɛ wo denneennen wɔ Onyankopɔn ne Kristo Yesu ne abɔfo a wɔapaw wɔn no anim sɛ, di akwankyerɛ ahorow yi so a wonyɛ nyiyim ne animhwɛ.+

22 Mpere wo ho mfa wo nsa ngu obiara so da;*+ mma ebinom bɔne nso mmmɛka wo; kɔ so bɔ ɔbra kronkron.

23 Nnom nsu bio,* na mmom wo yafunu ne yare a wotaa yare nti, nom bobesa kakra.

24 Nnipa bi bɔne da adi ma obiara hu, na ekowie atemmu mu, na ebinom nso bɔne da adi akyiri yi.+ 25 Saa ara na nnwuma pa nso da adi ma obiara hu,+ na nea ɛnna adi mpo no, ɛso rentumi nkata daa.+

6 Wɔn a wɔhyɛ nkoasom kɔndua ase no, ma wɔnkɔ so mmu wɔn wuranom sɛ wɔfata nidi a edi mũ,+ na amma nkurɔfo ankeka Onyankopɔn din ne nkyerɛkyerɛ no ho nsɛmmɔne da.+ 2 Bio nso, wɔn a wɔwɔ awuranom a wɔyɛ gyidifo no, ɛnsɛ sɛ wɔka sɛ wɔn wuranom yɛ anuanom nti wɔremmu wɔn. Mmom no, ɛsɛ sɛ woyi wɔn yam som wɔn, efisɛ wɔn a wonya wɔn adwuma pa so mfaso no yɛ gyidifo ne adɔfo.

Kɔ so fa saa nsɛm yi kyerɛkyerɛ, na fa afotu yi ma. 3 Sɛ obi kyerɛkyerɛ nkyerɛkyerɛ foforo, na wannye akwankyerɛ pa*+ a efi yɛn Awurade Yesu Kristo hɔ no antom, anaa wannye nkyerɛkyerɛ a ɛne onyamesom pa hyia+ no antom a, 4 ɔyɛ ahomaso, na ɔnte hwee ase.+ Akyinnyegye ne nsɛm ho mansotwe agye n’adwene.*+ Nea saa nneɛma no de ba ne anibere, twe-ma-mentwe, dinsɛe,* nnipa ho adwemmɔne, 5 nneɛma a ɛho nhia a nnipa a wɔn adwene asɛe+ na wɔnte nokware no ase bio twe ho manso daa. Wɔn adwene yɛ wɔn sɛ onyamesom pa yɛ ade a wɔde pɛ mfaso.+ 6 Nea ɛwom ne sɛ, sɛ obi de onyamesom pa+ bɔ ne bra na ɔma nea ɔwɔ sɔ n’ani a, mfaso wɔ so paa. 7 Efisɛ yɛamfa hwee amma wiase, na yɛrentumi nso mfa hwee mfi mu nkɔ.+ 8 Enti sɛ yɛwɔ nea yebedi ne nea yɛbɛhyɛ* a, yɛbɛma ɛno ara asɔ yɛn ani.*+

9 Na wɔn a wɔn ani abere sɛ wɔbɛyɛ asikafo no de, wɔtɔ sɔhwɛ ne afiri+ ne nkwasea akɔnnɔ bebree a epira nnipa no mu; na ɛno de nnipa kɔ ɔsɛe pasaa mu.+ 10 Efisɛ nneɛma bɔne nyinaa ntini baako ne sikanibere, na ebinom adi akyi ama wɔayera afi gyidi no ho, na wɔde yaw bebree awowɔ wɔn ho nyinaa.+

11 Nanso wo Onyankopɔn nipa de, guan fi eyinom ho. Mmom no, yere wo ho yɛ adetrenee, na yere wo ho di onyamesom pa, gyidi, ɔdɔ, animia, ne odwo+ akyi. 12 Ko gyidi ko pa no, na daa nkwa a ɛno nti wɔfrɛɛ wo na wokaa ho asɛm yiye wɔ baguam wɔ adansefo pii anim no, so mu denneennen.

13 Migyina Onyankopɔn a ɔma nneɛma nyinaa nkwa, ne Kristo Yesu, ɔdansefo a ogyinaa Pontio Pilato anim dii no adanse kama wɔ baguam+ no anim ka kyerɛ wo sɛ, 14 di ahyɛde no so, na mma nkekae ne asɛm biara mmma wo ho* kosi sɛ wɔbɛda yɛn Awurade Yesu Kristo adi.+ 15 Na sɛ bere a wɔahyɛ no so a, Obirɛmpɔn koro pɛ a ɔwɔ anigye no bɛda ne ho adi. Ɔno ne ahemfo mu Hene ne awuranom mu Awurade,+ 16 ɔno nko ara na ontumi nwu da,+ nea ɔte hann a wontumi mmɛn ho mu,+ a onipa biara nhuu no da, na obiara rentumi nhu no+ no. Ɔno na nidi ne daa tumi yɛ ne dea. Amen.

17 Ka kyerɛ* wɔn a wɔyɛ asikafo wɔ wiase yi* mu sɛ, wɔnnyɛ ahomaso,* na wɔmmfa wɔn ani nnto ahonyade a ɛnkyɛ*+ so. Mmom wɔmfa wɔn ani nto Onyankopɔn so, nea ɔma yɛn nneɛma a yehia nyinaa ma ɛboro so+ no. 18 Ka kyerɛ wɔn sɛ wɔnyɛ papa, wɔnyɛ adefo wɔ nnwuma pa mu, wommue wɔn nsam,* wɔnkyɛ ade,+ 19 na wɔmfa nto fapem pa nsie yiye mma daakye,+ na ama wɔatumi aso nkwa ankasa no mu denneennen.+

20 Timoteo, nea wɔde ahyɛ wo nsa no, bɔ ho ban,+ na nsɛnhunu a etia nea ɛyɛ kronkron ne nea wɔfrɛ no “nimdeɛ” nanso ɛne nokware nhyia no, twe wo ho fi ho.+ 21 Ebinom de saa nimdeɛ no hoahoaa wɔn ho, na wɔaman afi gyidi no ho.

Adom nka mo.