Buronya—Dɛn Nti na Wodi Wɔ Apuei Fam Mpo?

APUEI famfo tete gyidi bi ne Buronya bere mu Papa Buronya di nsɛ. Ɛno ne Koreafo gyidi a wɔwɔ wɔ obi a wɔfrɛ no Chowangshin mu, ne biribi a ɛte saa ara a ɛwɔ Chinafo ne Japanfo bi mu.

Na wobu Chowangshin sɛ gyaade nyame, ogya nyame a na ɔne tete Koreafo a wɔsom ogya wɔ abusuabɔ. (Tete no, na Koreafo de nnyasramma tu kwan, na na wɔhwɛ no yiye sɛ ɛrennum da.) Na wogye di sɛ nyame yi na ɔhwɛ abusuafo abrabɔ so afe biara, na ɛno akyi no ɔfa sutof ne wusikwan mu foro kɔ soro.

Wɔkyerɛ sɛ, Chowangshin de n’amanneɛbɔ kɔma ɔsoro hene no wɔ December da a ɛto so 23. Na wɔhwɛ kwan sɛ afe no awiei no, ɔbɛsan afa wusikwan ne sutof mu aba, na ɔde obiara abrabɔ ho akatua ne asotwe a ɛfata abrɛ no. Da a ɔbɛba no, na ɛsɛ sɛ abusuafo no sosɔ kyɛnere wɔ gyaade ne ofie no afã foforo. Saa gyaade nyame no mfonini ne Papa Buronya de no nso di nsɛ—na atade a ɛhyɛ no no yɛ kɔkɔɔ! Na ɛyɛ amammerɛ sɛ ɔbaa warefo yɛ Koreafo sɔks, na sɛ edu awɔw bere a, ɔde ama n’asebea. Na ɛno yɛ ade a ɔde kyerɛ sɛ ɔresrɛ nkwatenten ama n’asebea no, esiane sɛ efi saa da no rekɔ no, adekyee yɛ tenten nti.

So wunhu nsɛdi bi wɔ afahyɛ ahorow a yɛreka ho asɛm yi ne Buronya mu? Ɛho anansesɛm ne amanne no yɛ ade koro: wusikwan, kyɛnere, akyɛde, sɔks, akwakoraa bi a ɔhyɛ atade kɔkɔɔ, ne da a esi no. Nanso, ɛnyɛ nsɛdi no nkutoo na ɛma nnipa pii gye Buronya tom wɔ Korea. Ɛkame ayɛ sɛ bere a wofii Buronyadi ase wɔ Korea no, na wɔn werɛ reyɛ afi Chowangshin mu gyidi no. Nokwarem no, ɛnnɛ Koreafo dodow no ara nnim sɛ na gyidi bi a ɛte saa wɔ hɔ.

Nanso, eyi kyerɛ sɛnea amanne ahorow no ne awɔw bere mfiase wɔ abusuabɔ, na afe no awiei nam akwan horow so trɛw kɔ wiase no afã nyinaa no. Wɔ afeha a ɛto so anan Y.B. mu no, Roma Ahemman mu asɔre no sesaa Saturnalia, Roma abosonsomfo afahyɛ a ɛne owia awoda no din, na wɔde eyi bɛhyɛɛ Buronya mu. Buronyadi bɛyɛɛ sɛ ɛhɔnom amanne a wɔasan de asi hɔ na wɔama no din foforo. Ɛyɛɛ dɛn na wotumi yɛɛ saa?

Dwuma a Adekyɛ Di

Adekyɛ yɛ amanne a entwaam da. Efi tete na Koreafo ani agye adekyɛ ne akyɛde ho kɛse. Eyi yɛ ade biako a ɛmaa nkurɔfo ani gyee Buronyadi ho wɔ Korea.

Wiase Ko II akyi no, nea ɛbɛyɛ na U.S. asraafo a wɔwɔ Korea a na wɔpɛ sɛ wɔne nkurɔfo no nya abusuabɔ a emu yɛ den no atumi ayɛ saa no, na wohyia wɔn wɔ asɔredan ahorow mu de akyɛde ne nneɛma a wohia ma wɔn. Buronya Da titiriw na na wɔyɛ eyi. Asɛmpɛ nti, mmofra pii kɔɔ asɔredan ahorow mu, na ɛhɔ na wɔmaa wɔn chocolate sɛ akyɛde nea edi kan. Wobɛte ase, sɛ, efi saa bere no, wɔn mu pii hwɛɛ Buronya a edi hɔ no kwan.

Wɔ mmofra a ɛte saa fam no, na wonim sɛ Papa Buronya yɛ Amerika sraani bi a ɔhyɛ kyɛw kɔkɔɔ. Mmebusɛm 19:6 ka sɛ: “Nnipa nyinaa yɛ ɔyamyefo nnamfo.” Yiw, adekyɛ bɛyɛɛ ɔkwan a etu mpɔn yiye. Nanso sɛnea wubetumi agyina saa nkyekyem no so aka biribi no, akyɛde a ɛte saa mma wonnya adamfofa a ɛtra hɔ daa. Wɔ Korea mpo no, nnipa pii wɔ hɔ a nea wonim fa asɔre ho ara ne chocolate a na wonya di bere a na wɔyɛ mmofra no. Nanso, wɔn werɛ amfi Buronya. Esiane sɛ Korea nyaa nkɔso ntɛmntɛm wɔ sikasɛm mu nti, aguadi nyaa nkɔanim, na Buronya akyɛde yɛɛ ɔkwantiaa a wɔnam so ma nkurɔfo tɔ ade kɛse. Aguadifo nam Buronya so nyaa mfaso pii.

Eyi ma wote sɛnea wodi Buronya wɔ Apuei fam nnɛ no ase. Esiane sɛ wɔtɔ ade pii Buronya bere mu nti, wɔyɛ nneɛma foforo. Sɛ wohu sɛ bere no rebɛn a wofi ase yɛ aguade ho dawurubɔ ahorow ho nhyehyɛe. Buronya akyɛde a wɔtɔ, nkrataa a wɔde ma tiri-nkwa, ne nnwom nyinaa ma adetɔn kɔ soro wɔ afe no awiei. Hwɛ, aguade ho dawurubɔ bɛma abofra bi werɛ ahow bere a ɔtra fie na onnya akyɛde biara da a wosi Buronya Dua no!

Sɛ Buronya Da no bɛn a, nnipa a wɔretotɔ akyɛde kɔhyɛ sotɔɔ ahorow a ɛwɔ Seoul mu ma, na saa ara na ɛte wɔ Apuei fam nkurow foforo mu. Kar kyere so. Adetɔfo kɔhyɛ ahɔhodan, nnwumayɛbea, ne asanombea ma. Wohu anigye ntraso—nnwom a ano yɛ den—wɔ mmɔnten so. Buronya Da no, wohu mmarima ne mmea a wɔabobow a wɔredi akɔneaba wɔ mmorɔn a wura ayɛ so ma so.

Saa na ɛte. Apuei fam Buronya nyɛ dapɔnna a wɔn a wɔfrɛ wɔn ho Kristofo na wodi mu akoten bio. Ɛda adi sɛ, wɔ Korea ne mmeae foforo no, aguadifo na wonya mfaso kɛse wɔ saa Kristoman dapɔnna yi mu. Ɛnde, so aguadi nkutoo ne ade a ama Buronya abɛyɛ afahyɛ a ɛne Kristo honhom nhyia koraa no? Ehia sɛ nokware Kristofo hwehwɛ aniberesɛm a ɛwom no mu kɔ akyiri.

Baabi a Buronya Fi

Akekaboa a wɔde no hyɛ buw mu wɔ mmoa yɛmmea da so ara yɛ aboa. Na ɛbɛyɛ mfomso kɛse sɛ wubesusuw sɛ wɔama no ayɛ afieboa esiane sɛ wada buw mu kakra, na ɛte sɛ nea ɔne ne mma redi agoru nti. Ebia woate sɛnea wɔato ahyɛ mmoa yɛmmea adwumayɛfo so ho asɛm pɛn.

Yebetumi aka Buronyadi ho asɛm saa ara wɔ akwan bi so. Mfiase no na ɛyɛ “aboa” a onni Kristosom mu. The Christian Encyclopedia (a ɛwɔ Korea kasa mu)a ka Buronya ho asɛm wɔ asɛmti ketewa “Abusuabɔ a Ɛne Romafo Saturnalia Wɔ” ase sɛ:

“Ná abosonsomfo Saturnalia ne Brumalia no agye ntini kɛse dodo sɛ Kristofo amanne a agye din nkɛntɛnso betumi ayi afi hɔ. Ebetumi aba sɛ Kwasida (Phœbus ne Mithras da ne Awurade Da) a ɔhempɔn Constantine gye toom . . . na ɛmaa afeha a ɛto so anan mu Kristofo no susuw sɛ ɛfata sɛ wɔbɛma Onyankopɔn Ba no awoda ne owia awoda ahyia. Na abosonsomfo afahyɛ a dede ne anigyede wom no agye din araa ma Kristofo ani begyee ka a wɔkae sɛ wɔntoa so nni no ho, a wɔanyɛ nsakrae biara wɔ emu nneyɛe anaa ɔkwan a wɔfa so di mu.”

So wususuw sɛ biribi a ɛte saa betumi aba a enhyia ɔsɔretia biara? Nhoma koro no ara ka sɛ: “Atɔe fam ne Mmeae a Ɛbemmɛn Apuei fam Kristofo nsɛnkafo kasa tiaa nsɛnhunu a wogyinaa so dii Kristo awoda no, na Kristofo a wɔwɔ Mesopotamia nso bɔɔ wɔn nuanom a wɔwɔ Atɔe fam no sobo sɛ wɔsom abosom ne owia, esiane sɛ wɔafa saa abosonsomfo afahyɛ yi sɛ Kristofo de ti.” Nokwarem no, na biribi atoto fi mfiase no. Nhoma a ɛka nneɛma pii ho nsɛm no ka sɛ: “Nanso wogyee afahyɛ no toom ntɛmntɛm, na awiei koraa no, ebegyee ntini araa ma Protestant ɔsesɛw a ɛbae wɔ afeha a ɛto so dunsia no mpo antumi antu ase.”

Yiw, wɔde owia-nyame afahyɛ a na ɛnka nokware Kristosom ho no baa asɔre a na ɛwɔ hɔ no mu. Enyaa din foforo—nanso n’abosonsom nneɛma no kaa hɔ. Na ɛboae maa wɔde abosonsom bɛhyɛɛ asɔre ahorow a wɔfrɛ wɔn ho Kristofo no mu, ma asɛe ankorankoro honhom fam yiyedi. Abakɔsɛm di adanse sɛ bere a Kristosom renyin no, ɔbrasɛe ne akodi a ɛyɛ hu besii mfitiase su a ɛne “dɔ w’atamfo” no ananmu.

Bere kɔɔ so no, ɛbɛdaa adi sɛ ɛmfa ho din hunu a anya no, Buronya mfitiase abosonsom nneɛma, potwaa, asabow, anigyede, asaw, adekyɛ, ne nhabammono a wɔde siesie afie mu no daa adi wom. Nea ɛbɛyɛ na aguadifo adu wɔn botae a ɛsen biara—nneɛma pii a wɔbɛtɔn—ho no, wɔde Buronya adi dwuma wɔ akwan horow so. Nsɛm ho amanneɛbɔfo akamfo; ɔmamfo ani agye ho kɛkɛ. Wɔ Seoul kurow mu no, sotɔɔ bi a wɔtɔn atade nhyɛase wom no de ɛno bi nkutoo sensɛn Buronya dua a wɔde sii ahwehwɛ mu no so, ma wɔkaa ho asɛm wɔ television so. Na wohu Buronya ho sɛnkyerɛnne wɔ baabiara, nanso na biribiara nni hɔ a ɛkyerɛ sɛ wɔrehwɛ Kristo kwan.

Kyerɛwnsɛm a Yebegyina so Ahwehwɛ Buronya Mu

Dɛn na yesua fi abakɔsɛm ne nneɛma a akɔ so yi mu? Sɛ wɔantoto soro atade bi mu yiye mfiase a, ɔkwan biako pɛ a wobetumi afa so ateɛ tebea no ne sɛ wobefi ase atotom bio. So ɛnte saa? Saa nokwasɛm yi nyinaa akyi no, ebinom ka sɛ ɛmfa ho sɛ Buronya fi owiasom a ɛyɛ abosonsom mu no, Kristoman agye atom. Enti wɔte nka sɛ wɔatew dapɔnna no ho ayɛ no Kristo awoda, na wɔama akyerɛ biribi foforo.

Yebetumi anya asuade a ɛsom bo afi abakɔsɛm mu asɛm bi a esii wɔ tete Yuda no mu. Wɔ 612 A.Y.B. no, Yudafo de owiasom a ɛyɛ abosonsom baa Yerusalem asɔrefie no mu. So abosonsom a ɛte saa no yɛɛ nea ɛho tew esiane sɛ wɔde baa baabi a wɔahyira so ama Yehowa Nyankopɔn som a ɛho tew no nti? Bible kyerɛwfo Hesekiel kyerɛw owiasom a na ɛkɔ so wɔ Yerusalem asɔrefie hɔ no ho asɛm sɛ: “Hwɛ, [Yehowa, NW] asɔredan no, ntwironoa ne afɔremuka no ntam no, mmarima aduonu anum a . . . wɔn anim kyerɛ apuei fam, na wɔkotow kyerɛ apuei resɔre owia ni. Na ɔka kyerɛɛ me sɛ: Onipa ba, woahu? So ɛyɛ hare ma Yuda fi sɛ wɔyɛ akyide a wɔyɛ ɛha yi, sɛ wɔde atirimɔden rehyɛ asase yi so ma, na wɔasan abehuru me bo? Na hwɛ, wɔde dubaa no ka wɔn hwene.”—Hesekiel 8:16, 17.

Yiw, sɛ anka ɛho bɛtew no, saa abosonsom no sɛee asɔrefie no nyinaa. Nneyɛe a ɛte saa baa Yudafo mu, na ɛmaa basabasayɛ ne ɔbrasɛe buu so wɔ saa asase no so. Ɛte saa wɔ Kristosom mu, baabi a nneyɛe a na agye ntini wɔ owiasom a ɛne Saturnalia mu di akoten wɔ Buronya mu no. Nea ɛho hia no, bere a Hesekiel nyaa anisoadehu no akyi mfe kakraa bi na Onyankopɔn atemmu baa Yerusalem so—Babilonfo sɛee no.—2 Beresosɛm 36:15-20.

Sɛnea Koreani nhomanimfo bi kaa Yesu mmofraase ho asɛm a yɛkaa no asɛm a edi eyi anim mu no betumi ayɛ wo serew. Nanso, esiane sɛ efi obi a onni Kristo ho nokware nimdeɛ hɔ nti, nea ɔkae no yɛ nea ɛfata. Ebetumi ama nkurɔfo a wodi Buronya no asusuw nneɛma ho anibere so. Dɛn ntia? Efisɛ Buronya nna Kristo adi wɔ ɔkwan a ɛfata so koraa. Nokwarem no, ɛmma wonhu ne gyinabea a ɔwom mprempren. Yesu nyɛ akokoaa a ɔda mmoa adididaka mu bio.

Bible si so dua mpɛn pii sɛ, mprempren, Yesu yɛ Mesia, Onyankopɔn soro Ahenni so Hene a ɔwɔ tumi. (Adiyisɛm 11:15) Wayɛ krado sɛ ɔde ohia ne amanehunu a nnipa bi werɛ mfi bere a wɔrekyɛ ade Buronya bere no bɛba awiei.

Nokwarem no, Kristoman nsase anaa aman foforo a Apuei famfo ka ho no nnyaa Buronya so mfaso biara. Mmom no, adan nkurɔfo adwene afi Onyankopɔn Ahenni ne mprempren nhyehyɛe bɔne awiei ho asɛm a nokware Kristofo ka no so. (Mateo 24:14) Yɛhyɛ wo nkuran sɛ bisa Yehowa Adansefo ma wɔnkyerɛ ɔkwan a saa awiei no bɛfa so aba no. Wobetumi akyerɛ wo nhyira a ɛbɛtra hɔ daa a ɛbɛba asase so saa bere no, wɔ Onyankopɔn Ahenni ne Ɔhene a ɔredi tumi, Yesu Kristo, akwankyerɛ ase.—Adiyisɛm 21:3, 4.

[Ase hɔ asɛm]

[Asɛm a wɔafa aka wɔ kratafa 6]

Buronya boae maa abosonsom baa asɔre ahorow a wɔkyerɛ sɛ wɔyɛ Kristofo no mu

[Kratafa 5 mfonini]

Asɛmpɛ maa mmofra pii kɔɔ asɔredan ahorow mu kogyee chocolate. Afei wɔhwɛɛ Buronya a edi hɔ no kwan

[Kratafa 7 mfonini ahorow]

Da a wosi Buronya Dua wɔ Seoul, Korea

[Kratafa 8 mfonini]

Kristo nyɛ akokoaa bio na mmom ɔyɛ Onyankopɔn Ahenni so Hene a ɔwɔ tumi