ASƐM A ƐDA SO | HWANNOM NE YEHOWA ADANSEFO?
Dɛn na Yehowa Adansefo Gye Di?
Yehowa Adansefo gye di sɛ “Twerɛnsɛm no nyinaa firi Onyankopɔn honhom mu na ɛyɛ.” (2 Timoteo 3:16) Bible yɛ nwoma a mfaso wɔ so, ɛma yɛsua Ɔbɔadeɛ no ho asɛm na ɛboa yɛn ma yɛbɔ bra pa.
Bible ka sɛ: “Nnipa nhunu sɛ wo a wo din de Yehowa no, wo nko ara ne Ɔsorosoroni, asase nyinaa so.” (Dwom 83:18) Enti Yehowa Nyankopɔn nko ara na yɛsom no, na sɛ́ n’Adansefo no, yɛbɔ mmɔden sɛ yɛbɛma nkurɔfo ahu ne din no.—Yesaia 43:10-12.
Yɛyɛ Kristofo, enti yɛgye di sɛ Yesu, “Onyankopɔn Ba no,”a baa asase so na ɔbɛyɛɛ Mesia. (Yohane 1:34, 41; 4:25, 26) Yesu wui akyi no, wɔnyanee no kɔɔ soro. (1 Korintofoɔ 15:3, 4) Akyiri yi, ɔbɛyɛɛ Onyankopɔn Ahenni no so Hene. (Adiyisɛm 11:15) Saa Ahenni no yɛ aban ankasa a ɛbɛsan de Paradise aba asase so. (Daniel 2:44) Bible ka sɛ, “Ahobrɛasefoɔ bɛnya asase no adi, na wɔagye wɔn ani asomdwoeɛ bebree mu.”—Dwom 37:11, 29.
“Sɛ wɔkenkan biribi firi Bible mu a, wɔgye di sɛ Onyankopɔn na ɛne wɔn rekasa. Bere biara a wɔbɛhyia ɔhaw bi wɔ wɔn abrabɔ mu no, wɔkɔ Onyankopɔn Asɛm mu kɔpɛ ano aduro. . . . Wɔn deɛ, wɔgye di sɛ Onyankopɔn Asɛm da so ara wɔ nkwa.”—Katolek sɔfo Benjamin Cherayath; Germany atesɛm krataa, Münsterländische Volkszeitung
Yehowa Adansefo gye di sɛ ɛnnɛ nso Bible mu nnyinasosɛm bɛtumi aboa nnipa. (Yesaia 48:17, 18) Ɛno nti, yɛde nnyinasosɛm a ɛte saa bɔ yɛn bra. Nhwɛso bi ni: Esiane sɛ Bible bɔ yɛn kɔkɔ sɛ yɛntwe yɛn ho mfiri nneyɛe bi a ɛbɛtumi agu yɛn honam ne yɛn adwene ho fĩ nti, yɛnnom sigaret na yɛmmfa nnuro nni dwuma ɔkwammɔne so. (2 Korintofoɔ 7:1) Afei nso, yɛtwe yɛn ho firi nneyɛe a Bible kasa tia tẽẽ no ho. Ebi ne asaborɔ, adwamammɔ, ne korɔno.—1 Korintofoɔ 6:9-11.
a Bible san frɛ Yesu sɛ ‘Onyankopɔn Ba a ɔwoo no koro,’ efisɛ ɔno nko ara ne abɔde a ɔdi kan a Yehowa nko ara bɔe.—Yohane 3:18; Kolosefoɔ 1:13-15.