Asɛmpa A Wɔbɛka Akyerɛ—Denam Borɔn So Adansedi Ne Nkurɔfo A Yɛbɛma Wɔn Nsɛmma Nhoma Daa So
1 Efi Yehowa Adansefo nnɛyi adwuma no mfiase pɛɛ no, wɔde nsɛmma nhoma adi dwuma de aboa wɔn a “ɔkɔm de wɔn” ma wɔasua nokware no. Mfiase no na wɔyɛ eyi titiriw denam ne kra so, nanso wɔdaa akwan afoforo bi a wɔbɛfa so de nsɛmma nhoma ama adi wɔ January 1940 mu. Wɔhyɛɛ nyansa sɛ wɔmfa mma wɔ mmorɔn so ne denam nkurɔfo a wɔma wɔn bi daa a wobenya so. Dɛn na efii mu bae? 1941 Afe Nhoma no ma mmuae sɛ: “Wɔkyekyɛɛ nsɛmma nhoma mfuamfua a ne dodow reyɛ adu 3,000,000 wɔ saa kwan yi so.
2 Wɔ afe a etwaam no mu no adawurubɔfo a wɔboro 22,000 a wɔkɔɔ asɛnka wɔ Ghana no kyekyɛɛ nsɛmma nhoma a ɛboro 1,900,000. Eyinom mu pii yɛ nea wɔde memae wɔ afie afie adwuma a wɔyɛ daa no mu. Ebia eyi ne ɔkwan a wofaa so nyaa mu kyɛfa. So wubetumi adu wɔn a nokware ho kɔm de wɔn no pii nkyɛn, denam nsɛmma nhoma a wode bɛma wɔ mmorɔn so ne wɔn a woma wɔn bi daa a wubenya so? So woasɔ akwan horow yi ahwɛ?
BORƆN SO ADANSEDI
3 Adawurubɔfo ne akwampaefo pii di adanse wɔ borɔn so, faako a ɛbɛn ahyɛn gyinabea anɔpa, bere a nkurɔfo rekɔ adwuma. Onuawa biako kɔɔ ɔbea bi a ofi ɔman foforo so nkyɛn na n’ani gyei sɛ obegye nsɛmma nhoma no. Obisae sɛ obi betumi ne no abesua ade wɔ ne kurom kasa mu, efisɛ ɔrehwehwɛ Yehowa Adansefo. Mprempren odidi daa wɔ Yehowa pon so.
4 Bere a anuanom mmea baanu retwɛn ma wɔn kuw no mufo afoforo awie afie afie adansedi adwuma Kwasida no, wɔkɔɔ nkurɔfo nkyɛn wɔ borɔn bi a adagyew nni so so na wɔn mu biara maa nsɛmma nhoma boro 20 wɔ simma kakraa bi mu. Wɔn mu biako maa obi a ɔkyerɛ ade wɔ ntoaso sukuu mu a ɔkae sɛ ɔrehwehwɛ nokware no nhoma, bere a ɔkae sɛ ɔpɛ foforo pii aka nsɛmma nhoma no ho no.
5 Ɛyɛɛ dɛn na adawurubɔfo yi maa nsɛmma nhoma pii saa? Wɔkɔɔ nkurɔfo a wɔnam borɔn no so ne wɔn a wɔwɔ faako a kar ahorow gyinagyina no nkyɛn. Wɔde anim sereserew dan adwene kɔɔ asɛm pɔtee bi a ɛwɔ nsɛmma nhoma mu a wosusuw sɛ onipa no ani begye ho so. Nokwasɛm no ne sɛ na wɔredi nnipa ahorow adanse sen sɛ wobegyina faako anaasɛ wobedi akɔneaba a wokurakura nsɛmma nhoma no.
WƆN A YƐMA WƆN BI DAA
6 Adawurubɔfo a wotumi nya nnipa a wɔma wɔn bi daa no ka sɛ ade a edi kan a ɛho hia ne nsɛmma nhoma dwumadi mu kyɛfa a wubenya daa. Bere a wɔde nsɛmma nhoma ama wɔ apon ano no, wɔka kyerɛ onipa no sɛ: “Sɛ w’ani gye eyinom ho a, ebia wobɛpɛ sɛ wo nsa ka nea ebedi akyi aba no, enti sɛ meretwam wɔ dapɛn abien akyi a, mɛfa ha ma woatumi agye nea aba no bi.” Afoforo dan adwene kɔ “Nea Ɛbɛba Mu Nsɛm” no so na wɔkyerɛ nsɛm ahorow a ɛyɛ anigye a ɛbɛba no. Ebia wɔbɛka sɛ, “Merehwɛ kwan sɛ mɛkenkan saa asɛm yi, sɛ ɛba a. Ebia wo nso wobɛpɛ sɛ wokenkan.” Ebinom nso twe adwene si afã a ɛba daa te sɛ “Mmofra Bisa Sɛ” anaa “Onyankopɔn Asɛm Wɔ Nkwa” no so.
7 Sɛ wohyɛ bɔ sɛ wobɛsan aba a, ɛho hia sɛ wokɔ. Kɔ a wo ankasa wobɛsan akɔ bere nyinaa de nsɛmma nhoma no akɔma wɔn no betumi ama adamfofa pa a emu yɛ den abɛda wo ne ofiewura no ntam na obesiesie ne ho yiye sɛ obegye nsɛmma nhoma no. Ebinom a wɔwɔ nnipa a wɔma wɔn bi daa hu sɛ bere a eye a wode bɛkɔ ne anwummere, bere a ofiewura no afi adwuma aba. Afoforo kɔ wɔn a wɔma wɔn bi no nkyɛn Memeneda.
8 Sɛ ɛyɛ borɔn so anaa yɛrekɔ wɔn a yɛma wɔn bi daa nkyɛn no, momma yɛmfa hokwan ahorow nyinaa nni dwuma mma nkurɔfo nsa nka nsɛmma nhoma no.—Dw. 107:9.