Ahosiesie a Ɛfata Kyerɛ Obu a Yɛwɔ Ma Onyankopɔn
1. Ɔkwan bɛn so na yebetumi akyerɛ ɔmantam nhyiam a yɛrebɛyɛ no ho anisɔ?
1 Ɛrenkyɛ yebenya hokwan akɔ Yehowa anim wɔ 2003 “Monhyɛ Onyankopɔn Anuonyam” Amanaman Ntam/Ɔmantam Nhyiam ahorow no ase. Hwɛ aseda ara a yɛde ma Yehowa sɛ wato nsa afrɛ yɛn sɛ yɛmmra honhom fam apontow a nnepa pii wɔ ase no ase! Yɛnam yɛn ntadehyɛ ne yɛn ahosiesie so betumi ada nidi a yɛwɔ ma no ne anisɔ a yɛwɔ ma ne honhom fam nsiesiei no adi.—Dw. 116:12, 17.
2. Dɛn nti na ɛho hia sɛ yɛn ho tew na yɛhyɛ ntade a ɛsɛ?
2 Ahotew ne Ahosiesie a Ɛsɛ: Ɛsɛ sɛ yɛn ahosiesie da yɛn Nyankopɔn a ne ho tew na ɔyɛ nneɛma wɔano wɔano no gyinapɛn horow adi. (1 Kor. 14:33; 2 Kor. 7:1) Ɛsɛ sɛ yedi yɛn nipadua, yɛn ti nhwi, ne yɛn awerɛw ni, na yɛhyɛ ntade a ɛfata. Ahosiesie a ɛmfata abu so nnɛ. Nanso, sɛ sini mu nipa anaa agumadi mu okunini bi siesie ne ho ɔkwan a ɛmfata so a, ɛno nkyerɛ sɛ ɛsɛ sɛ Kristofo nso yɛ saa. Sɛ yedi ntadehyɛ a aba so akyi a, ɛbɛyɛ den ama nkurɔfo sɛ wobehu nsonsonoe a ɛda wɔn a wɔresom nokware Nyankopɔn ne wɔn a wɔnsom no ntam.—Mal. 3:18.
3. Yɛbɛyɛ dɛn atumi ahwɛ ahu sɛ yɛn ahosiesie ne afotu a ɛwɔ 1 Timoteo 2:9, 10 no hyia?
3 Atade a Ɛfata Kristofo Asomfo: Bere a ɔsomafo Paulo kyerɛw Kristoni hwɛfo Timoteo no, ɔhyɛɛ ‘mmea nkuran sɛ wɔnhyɛ ntade a ɛsɛ, mfa ani a ewu ade ne adwenemtew nkeka wɔn ho, wɔ nnwuma pa a ɛsɛ mmea a woyi onyamesom kyerɛ mu.’ (1 Tim. 2:9, 10) Yɛn ahosiesie a ɛbɛfata no hwehwɛ sɛ yesusuw nneɛma ho yiye. Ɛsɛ sɛ yɛkwati ntade a sɛnea wɔapam no no kyerɛ sɛ yɛn bra asɛe. Ɛsɛ sɛ yɛn ntade ani tew, ɛho twa, ɛnyɛ kyenkyerenn—ɛnyɛ nea ɛmfata anaa nea ɛkanyan nna ho akɔnnɔ.—1 Pet. 3:3.
4, 5. Kɔkɔbɔ bɛn na ɛsɛ sɛ Kristofo mmarima ne mmea tie?
4 Paulo bɔɔ kɔkɔ wɔ ‘mmɛsawɔw anaa sika anaa nhene pa anaa ntade a ne bo yɛ den’ a wɔde besiesie wɔn ho ma atra so nso ho. (1 Tim. 2:9) Nyansa wom sɛ Kristofo mmea bɛkari pɛ wɔ agude a wɔhyɛ, srade ne nneɛma foforo a wɔde siesie wɔn ho no mu.—Mmeb. 11:2.
5 Paulo afotu a ɔde kɔmaa Kristofo mmea no fa Kristofo mmarima nso ho. Ɛsɛ sɛ anuanom mmarima kwati ntade a sɛnea wɔapam no no da wiase nsusuwii adi. (1 Yoh. 2:16) Sɛ nhwɛso no, wɔ aman bi mu no, wɔkyerɛ ntade a ɛsosõ ho anigye, nanso saa ntade yi mfata mma Onyankopɔn somfo. Saa ara na yebetumi aka afa abogyesɛ a wogyaw ho.—be-TW kr. 133, nky. 1.
6. Dɛn nti na ɛsɛ sɛ yekura gyinapɛn a ɛkorɔn mu wɔ yɛn ntadehyɛ ne ahosiesie mu bere a yɛrekɔ nhyiam ase ne bere a yɛrefi hɔ, bere a yɛwɔ nhyiam no ase, ne bere a yɛapɔn no akyi da biara da?
6 Bere a Yɛregye Yɛn Ahome: Anuanom mmarima ne mmea dodow no ara yɛ nhwɛso pa wɔ ntadehyɛ ne ahosiesie mu bere a wɔrekɔ dwumadi no ase no. Nanso, amanneɛbɔ kyerɛ sɛ ebinom yɛ anibiannaso bere a wɔrekɔ nhyiam no ase ne bere a wɔrefi hɔ anaa bere a wɔregye wɔn ahome wɔ dwumadi no akyi no. Nokwarem no, yɛn ahosiesie—sɛ́ ɛyɛ bere a dwumadi no rekɔ so anaa mmere foforo no—nya sɛnea afoforo bu Onyankopɔn nkurɔfo no so nkɛntɛnso. Esiane sɛ yɛbɔ yɛn nhyiam baagye no nti, ɛsɛ sɛ bere nyinaa yesiesie yɛn ho wɔ ɔkwan a ɛfata Kristofo asomfo so. Eyi taa ma afoforo kamfo yɛn na ebue kwan ma yedi wɔn adanse.—1 Kor. 10:31-33.
7. Nkɛntɛnso bɛn na yɛn ntadehyɛ ne ahosiesie a ɛfata no betumi anya wɔ afoforo so?
7 Sɛnea adamfofa kwan so serew ma yɛn anim tew no, saa ara na ntadehyɛ ne ahosiesie a ɛfata no hyɛ asɛm a yɛka ne ahyehyɛde a yegyina ananmu no anuonyam. Ebetumi aka nnipa binom a wobehu yɛn wɔ “Monhyɛ Onyankopɔn Anuonyam” Nhyiam ahorow no ase afe yi no ma wɔahwehwɛ nea enti a yɛda nsow no mu na awiei koraa no, wɔaka sɛ: “Yɛne mo bɛkɔ, na yɛate [na yɛahu] sɛ Onyankopɔn ne mo na ɛte.” (Sak. 8:23) Ɛmmra sɛ yɛn mu biara nam ne ntadehyɛ ne n’ahosiesie so de obu bɛma Yehowa.
[Kratafa 5 adaka]
Ma W’ahosiesie Nyɛ Nea Ɛfata
▪ Bere a woretu kwan
▪ Bere a wowɔ nhyiam ase
▪ Bere a woregye w’ahome