Yesu Ho Asɛm a Ɛwɔ Bible Mu no, Dɛn na Ɛkyerɛ sɛ Nkurɔfo Nsesaa No?

Nea Bible ka

Luka ka wɔn a wɔkyerɛw Bible no ho. Yesu asetena ho nsɛm a ɔkyerɛw wɔ ne nhoma no mu no, ɔkaa ho asɛm sɛ: “Mahwehwɛ nneɛma no nyinaa mu pɛpɛɛpɛ afi mfiase.”​—Luka 1:3.

Nsɛmpa no yɛ Yesu asetena ho nsɛm a ne mfɛfo Mateo, Marko, Luka, ne Yohane kyerɛwee. Ebinom ka sɛ Yesu akyi bɛboro mfe 200 no, nkurɔfo sesaa Nsɛmpa no mu nsɛm.

Nanso, bɛyɛ mfe 100 ni no, wɔhuu Yohane Asɛmpa no fã bi wɔ kratasin bi so wɔ Egypt. Saa krataa no som bo paa. Wɔfrɛ no Papyrus Rylands 457 (P⁵²), na wɔakora so wɔ John Rylands nhomakorabea a ɛwɔ England kurow Manchester no. Yohane Asɛmpa no fã a ɛwɔ so no, yɛhwɛ Bible a ɛwɔ hɔ nnɛ mu a, yɛbɛhu wɔ Yohane 18:31-33, 37, 38.

Kristofo Hela Kyerɛwnsɛm no, nkurɔfo hwɛɛ so kyerɛw bi. Wɔfrɛ nea wɔahwɛ ebi so akyerɛw no nsaano nkyerɛwee. Asinasin a nkurɔfo ahu nyinaa, Papyrus Rylands no ne nea akyɛ paa. Nhomanimfo pii adwene yɛ wɔn sɛ wɔyɛɛ saa nsaano nkyerɛwee no bɛyɛ afe 125 Y.B. Ɛno kyerɛ sɛ, bere a wɔkyerɛw Yohane Asɛmpa no wiei no, bɛyɛ mfe 25 pɛ na wɔyɛɛ Papyrus Rylands no. Sɛ wode emu nsɛm toto nsaano nkyerɛwee a akyiri yi nkurɔfo yɛe ho a, ɛkame ayɛ sɛ ɛyɛ ade koro.