Biribiara Wɔ Ne Bere Wɔ Japan

Efi Japan Nyan! kyerɛwfo hɔ

ABERANTEWAA bi a ofi Japan akuraa bi ase kɔɔ Tokyo sɛ ɔrekɔ kɔlege. Ɛhɔ na ohyiaa abeawa fɛfɛ nimdefo bi na ɔyɛɛ nhyehyɛe sɛ ɔbɛware no. Nanso aberantewaa no abusua kasa tiaa nantew a edi aware anim no denneennen araa ma wɔhyɛɛ no ma ogyaw ne dɔfo no. Dɛn ntia? Efisɛ wosusuwii sɛ sɛnea Japanfo atetesɛm kalenda kyerɛ no, afe a wɔwoo no ne afe a wɔwoo ɔbea no nhyia.

Wɔ June 13, 1985 mu no, Ɔwɛn Aban Asafo no Japan baa dwumadibea no pɛe sɛ wofi adan a wɔda mu foforo bi nnade ho adwuma ase wɔ Ebina. Nanso, nnadedwuma adwumakuw no pɛe sɛ wɔrennyɛ saa wɔ ɛda a wɔkyerɛ no ɛfisɛ sɛnea Japanfo atetesɛm kalenda kyerɛ no na ɛyɛ “da bɔne.”

Akyinnye biara nni ho sɛ Japanfo yɛ nimdefo, adwumadenyɛfo, ne nhomanimfo. Nanso, wɔwɔ atetesɛm a agye ntini kɛse a ɛkyerɛ sɛ bere pa wɔ hɔ ma biribiara a wɔbɛyɛ no. Wɔ Japan no bere a ɛsɛ sɛ wɔyɛ biribiara anaasɛ ɛnsɛ sɛ wɔyɛ wɔ hɔ. Ɔkwan bɛn so na bere ho nsusuwii kyenkyenenn ne gyidi hunu a ɛte saa no fii ase? Ɛka nnɛyi Japanfo asetra no kodu he? Na ɔkwan bɛn so na asɛm no mu ntease ho bɛba yɛn mfaso?

Japanfo Atetesɛm Kalenda No

Ɛwom sɛ wɔde Atɔe famfo kalenda di dwuma pii wɔ Japan de, nanso wɔtaa de tete kalenda bi a wɔfɛm fii China wɔ 604 Y.B. mu no di dwuma ka ho. Saa mmerebu nhyehyɛe yi gyina nneɛma 60 kyinhyia bi a wɔde mfonini abien a wɔfrɛ no ɔsoro nnua 10 ne asase so mman 12 akontaabu ne nkekabom na ahyehyɛ so.

Wɔ Japanfo de no mu no, wɔde nea edi kan (nnua du no) gyina sɛnea Japanfo susuw sɛ amansan no te no so a wɔkyerɛ sɛ nneɛma anum na ɛka bom​—duasin, ogya, asase, dade, ne nsu​—na ade no biara wɔ afã abien: yang (ɔbarima, anaasɛ su ahorow te sɛ ɔhyerɛn, ɔhyew, ɔyow, adeyɛ) ne yin (ɔbea, anaa su bɔne ahorow te sɛ esum, onwini, ɛfɔw, asɛm a ɛmfa obi ho) . Wɔde mmoa ahorow 12 a wodidi so yi na egyina hɔ ma asase so mman 12 no​—okisi, afurum, ɔsebɔ, adanko, ɔtweaseɛ, ɔwɔ, ɔpɔnkɔ, oguan, ɔsoroboa, akokonini, ɔkraman, ne batafo.

Kyinhyia no de dua a edi kan ne baa a edi kan a ɛne duasin-yang okisi no nkekabom na efi ase. Nea edi hɔ ne dua a ɛto so abien ne baa a ɛto so abien anaasɛ duasin-yin afurum no. Afei ogya-yang ɔsebɔ, ogya-yin adanko, ne afoforo didi so. Nkekabom no nyinaa wɔ saa kwan yi so no yɛ 60, enti na ɛyɛ nneɛma 60 kyinhyia no. Wobu nnafua, asram ne mfe nyinaa wɔ saa kyinhyia 60 koro no ara so. Afe 604 Y.B. no na efii kyinhyia a edi kan no ase. Kyinhyia foforo fii ase ɛno akyi mfirihyia 60 biara. Mprempren kyinhyia no fii ase wɔ 1984 mu. Enti dɛn na 1988 bɛyɛ? Esiane sɛ ɛne afe a ɛtɔ so anum wɔ kyinhyia no mu nti, ɛyɛ asase-yang-ɔtweaseɛ afe.

Mmerebu Pon a “Ɛhyehyɛ Mmere”

Esiane nsoromma mu hwɛ a ɛda adi sɛ ɛwom no nti, ankyɛ na wɔde gyidi hunu ntease horow batabataa mfonini ahorow a ɛwɔ kyinhyia no mu no ho. Akyiri yi wotintim gyidi hunu nsusuwii ahorow ne nnadi yi wɔ afe afe mmerebu pon bi so. Ɛnnɛ mpo, Japanfo pii da so hwɛ mmerebu pon no so de hu nna pa ne nna bɔne, nkonimdi anaa nkogudi, wɔ da biara da asetra mu dwumadi ahorow nyinaa mu.

Sɛ nhwɛso no, nnipa pii a wɔwɔ Japan da so gye di sɛ obi a wɔwo no afe bi fa aboa a saa afe no nkekabom gyina hɔ ma no no su ahorow. Sɛ nhwɛso no, wɔka sɛ wɔn a wɔwo wɔn wɔ okisi sɛnkyerɛnne ase no ntumi ntra faako na wɔyɛ ayamɔnwene; wɔn a wɔwo wɔn afurum afe no mu no wɔ ntoboase na wɔyɛ nyaa; ɔsebɔ, amunamuna ne katee; ɔwɔ, ɔde anibɔne hwɛ afoforo na ontumi ne wɔn mmɔ. ‘Oo, wɔwoo no ɔwɔ afe mu​—enti na ɔte saa no!’ Wɔtaa te nsɛm a ɛte saa wɔ Japan.

Sɛnea mmerebu pon no kyerɛ no, wosusuw sɛ mmea a wɔwo wɔn wɔ ogya-yang-ɔpɔnkɔ afe (kyinhyia no mu nea ɛto so 43) no mu no tirim yɛ den titiriw a wobetumi akum wɔn kununom mpo. Ne saa nti, nkurɔfo, titiriw wɔn a wɔwɔ Japan nkuraase no kwatii mmofra a wɔbɛwo wɔn wɔ saa afe no mu, na nea ɛde aba ne sukuufo a wɔn so tew kɛse. Enti, wɔ October 1985 mu no atesɛm krataa Asahi Shimbun kyerɛkyerɛɛ mu wɔ asɛmti “Sukuu Ahorow a Wɔkyere so Kabɔ Rekɔ Soro” no ase sɛ wɔ 1966 (a na ɛyɛ ogya-yang-ɔpɔnkɔ afe) mu no, na awo ba fam araa yiye sen sɛnea anka ɛsɛ sɛ ɛyɛ wɔ Japan, na mmofra a wɔwoo wɔn saa afe no mu na na ɛsɛ sɛ ɛyɛ nea wɔwɔ sukuu mu wɔ 1984 ne 1985 mu.

Kyinhyia no mu nnafua bi wɔ hɔ a wosusuw sɛ ɛyɛ nna pa, na afoforo nso yɛ n’abirabɔ tee. Nea edi akyiri no bi ne Gomunichi, anaa adamoa anum da a wɔ emu no ɛnsɛ sɛ wɔhaw asase no anaasɛ wotutu no. Nnipa pii de ahwɛyiye kwati eyi yɛ saa nna yi, efisɛ obiara mpɛ sɛ ebewie no adamoa anum, kyerɛ sɛ ne nnipa baanum bewuwu. Sɛnea ɛbɛyɛ a wobehu no yiye no, ansa na wɔbɛyɛ biribi titiriw biara no, ɛsɛ sɛ wɔhwɛ mmerebu pon no so.

Kalenda no ne mmerebu pon no di dwuma titiriw a ɛho hia wɔ aware mu. Ɛwom sɛ nnansa yi awarefo du biara mu baasia ka sɛ wɔn de no yɛ “ɔdɔ aware” de, nanso aware a wɔhyehyɛ da so yɛ nea abu so wɔ Japan, na hyia a wɔne wɔn ho hyia a wɔbɛhyɛ ho nkɔm no yɛ asɛm a pii ani gye ho. Ɛnyɛ sɛ mmerebu pon no de mmere pa a eye sɛ wɔware ma nko, na mmom ɛkyerɛ nipa ko a wɔne wɔn hyia nso. Sɛ nhwɛso no, obi a wɔwoo no wɔ okisi afe (1948, 1960, 1972) mu no ne obi a wɔwoo no wɔ ɔtweaseɛ afe (1952, 1964, 1976) , ɔsoroboa (1956, 1968, 1980) , anaa afurum (1949, 1961, 1973) mu no behyia titiriw. Wɔ “ɔdɔ aware” mu mpo no, abusuafo taa de nhyɛso ba obi so sɛ ɔnware obi a ɔne no awo afe “hyia.”

Nea Nhyehyɛe a “Wɔahyehyɛ” no Saa no de Ba

Nea wonnim ho hu ne tiade akyidi nyaa tete Japanfo asetra kwan so nkɛntɛnso kɛse. Nanso sɛnea gyidi hunu mu yɛ den no so ntewee ahe biara wɔ nnɛyi Japan a nhomasua a akɔ anim a ɛkame ayɛ sɛ obiara anya bi ne mfiridwuma mu nkɔanim no mfa ho.

1950 mu nhwehwɛmu bi a Nhomasua Asoɛe no yɛe no hui sɛ wɔ mpanyimfo 6,373 a wɔkyerɛɛ wɔn adwene mu no, ɔha biara mu 33 kyerɛe sɛ nna pa ne nna bɔne ho adwene no “yɛ nokware kann” na ɔha biara mu 44 kae sɛ “ebetumi ayɛ nokware.” Ɛdefa aware mu a wɔne wɔn ho hyia ho nkɔmhyɛ ho no, ɔha biara mu 23 buae sɛ “ɛyɛ nokware kann” na ɔha biara mu 36 buae sɛ “ebetumi ayɛ nokware.” Sɛ́ anka ɛbɛyɛ ade a atwam no, efi nnipa a wɔyɛɛ nhwehwɛmu wɔ wɔn mu no mu fã so kosi anan mu nkyem abiɛsa so no da so kura gyidi hunu nsusuwii ahorow a ɛtete saa mu. Sɛnea nhoma Japanese Religion ka no, “Ɛyɛ nnipa no asetra fã.”

Nanso gyidi ahorow a ɛtete saa no ka nnipa no dɛn? Ade biako ne sɛ, ɛdenam gyidi hunu nsusuwii a wodi akyi kyenkyenenn saa so no, obi betumi afi ase ahwere tumi a ɔwɔ sɛ odwen na osusuw ade ho wɔ nsɛm a ɛfa ne ho mu no. Mmerebu pon no so nsɛm, afotu, ne akwankyerɛ no benya nea ɔpaw ne nea ɛsɛ sɛ ɔyɛ wɔ asetra mu no so nkɛntɛnso a ɛmfa ho sɛ ntease nnim ahe biara no. Ɛrenkyɛ, obehu sɛ ontumi nsi gyinae biara a ɔnkɔhwɛ mmerebu pon no so.

“Mmere a wɔahyehyɛ” ne tiade ho gyidi no nso ma wonya asetra ho adwene a edi awu. Sɛ dwumadi bi di huammɔ anaasɛ biribi nkɔ yiye a, ɛyɛ mmerɛw sɛ wobenunu tiade anaasɛ bere a enye. Sɛ anka wɔbɛhwehwɛ nea ɛde huammɔdi no bae ankasa mu no, wopia so kɔ anim a wɔwɔ anidaso sɛ wobenya ti pa. Sɛ eyi de abasamtuw pii ba a, afei onii no gyaw ne ho mu ma nokwasɛm a ɛyɛ sɛ ɛnyɛ ne de sɛ obedi nkonim koraa. Kyinhyia bɔne a ɛte saa no de nkurɔfo yɛ nkoa bere nyinaa wɔ gyidi hunu ne ehu mu.

So anidaso bi wɔ hɔ? Yiw., ebi wɔ hɔ. Yehowa Adansefo bɛboro 125,000 a wɔwɔ Japan no anya Bible bɔhyɛ yi mu osuahu dedaw: “Mubehu nokware, na nokware no ayɛ mo adehye.” (Yohane 8:32) Nea ɛka eyi ho ne gyidi hunu nkoasom mu ahofadi. Bible no sua ama wotumi dwen ade ho yiye, wɔanya wɔn ankasa ho mu ahotoso a anya nkɔanim, daakye a ɛyɛ anigye ho anidaso, ne anigye a efi mu ba no.

[Kratafa 16 mfoni]

Wɔtaa hwɛ mmerebu pon no so de paw aware mu ahokafo ne ayeforohyia nna