Mmofra Bisa Sɛ . . .

Asetra Akwan Abien—Hena na Ɛsɛ sɛ Ohu?

Robert gye tom sɛ: “Ná Maame ne Paapa de me kɔ Kristofo nhyiam, na na minim nea ɛteɛ ne nea ɛnteɛ. Nanso mepɛe sɛ mmofra afoforo pɛ m’asɛm na wogye me tom wɔ sukuu. Nea ɛbɛyɛ na m’atipɛnfo agye me atom na magye din nti, mifii ase nom sigaret bere a na mewɔ sukuu afe a ɛtɔ so asia no. Na mifii ase de LSD dii dwuma wɔ afe a ɛtɔ so ason mu na menom wii. Wɔ afe a ɛtɔ so awotwe mu no, mifii ase de aduru bi a wɔfrɛ no speed wɔɔ me ho paane. Medaadaa obiara—nanso me werɛ howee.”

ƐNNƐ mmofra pii—a wɔn a Kristofo awofo tete wɔn ka ho—wɔ asetra akwan abien. Ɛnyɛ wɔn nyinaa na wɔde nnuru di dwuma ɔkwammɔne so sɛnea Robert yɛe no. Nanso mmofra bi wia wɔn ho ne wɔn a ɛsono wɔn bɔbeasu yɛ nhyehyɛe fi adi, nom mmosa, hyɛ ntade basaa, tie nnwom a ɛmfata, kɔ apontow a wɔyɛ dede wɔ ase, na wɔde wɔn ho hyɛ nneyɛe afoforo a wɔn awofo ani nnye ho anaasɛ wokyi mu. So wo nso wonam asetra kwan a ɛte saa so?

Sɛ saa a, ebia wunim sɛ nea woreyɛ no nteɛ. Te sɛ Robert no, ebia w’ahonim haw wo. (Romafo 2:15) Nanso, ebia ɛyɛ wo den sɛ wobɛka wo nneyɛe bɔne no ho asɛm akyerɛ w’awofo. Na sɛ wususuw nea ebefi saa a wobɛyɛ no mu aba ho a, ebia wobɛfa no sɛ nyansa wɔ asɛm a wɔka a ɛne sɛ ‘Biribi a m’awofo nnim no renhaw wɔn’ no mu. Nanso ebetumi apira wo.

Nsusuwii a Ɛnteɛ

Sɛ nhwɛso no, ebia wobɛte nka sɛ w’awofo yɛ nneɛma bi a enye. Ebia ɛte saa. Nanso sɛ w’awofo ayɛ wo so katee a ntease nnim, wɔne wo nni nkitaho, anaasɛ wɔyɛ nhyɛso mpo a, so ɛno kyerɛ sɛ ɛsɛ sɛ woyɛ asoɔden? Onyankopɔn Asɛm nkyerɛ saa; etu fo sɛ: “Muntie mo awofo asɛm ade nyinaa ho, na eyi na ɛsɔ Awurade ani.” (Kolosefo 3:20) Na sɛ wote nka sɛ wowɔ ntease pa a enti ɛsɛ sɛ wo bo fuw w’awofo nso ɛ? So nyansa wom sɛ wubewia wo ho abu Onyankopɔn gyinapɛn ahorow a ɔde ama so de ada w’abufuw adi? Sɛ saa a, ɛnde na woreyɛ ade ma ayɛ sɛ nea wo “koma huru hyɛ [Yehowa].” (Mmebusɛm 19:3) Nea ɛfata sɛ woyɛ ne sɛ wobɛkɔ w’awofo nkyɛn na wo ne wɔn aka nea ɛhaw wo ho asɛm bɔkɔɔ.—Mmebusɛm 15:22.

Ɛnteɛ nso sɛ wubesusuw sɛ komm a wobɛyɛ a worenkasa no bɛbɔ w’awofo ho ban na wɔanni yaw. Abarimaa bi a wadi mfe 16 kae sɛ: “Ná menka biribi a ɛbɛma [m’awofo] ahaw nkyerɛ wɔn.” Ɛha nso, nsusuwii a ɛnteɛ a ɛte saa no yɛ nnaadaa. Sɛnea Bible ka no, ɛyɛ ade a obi yɛ de ‘bu ne ho, na wanhu n’amumɔyɛ na wakyi.’ (Dwom 36:2) Sɛ wudwen w’awofo nkate ho ankasa a, nea edi kan koraa no, wobɛkwati asoɔdenyɛ. Nea ɛka ho bio no, ebia mmɔden biara a wobɛbɔ sɛ wode nneɛma besie w’awofo no renyɛ yiye, efisɛ akyinnye biara nni ho sɛ afoforo pii nim nea woyɛ no sum ase no ho nsɛm dedaw.

Biribiara Nni Hɔ a Ahintaw

Tete Israelfo huu eyi bere a wɔbɔɔ mmɔden sɛ wɔbɛkwati wɔn bɔne ho asotwe no. Odiyifo Yesaia bɔɔ wɔn kɔkɔ sɛ: “Wonnue, wɔn a wɔde agyinatu hintaw [Yehowa] fee, na wɔn nneyɛe wɔ esum mu, na wɔka sɛ: Hena na ohu yɛn, anaa, hena na onim yɛn?” (Yesaia 29:15) Israelfo no werɛ fii sɛ Onyankopɔn huu wɔn nneyɛe bɔne no. Wɔ bere a ɛsɛ mu no, ɔma wonyaa wɔn bɔne ho asotwe.

Ɛbae saa wɔ Kristofo bi a na wɔwɔ afeha a edi kan asafo no mu fam. W’ankasa kenkan Anania ne ne yere Safira ho asɛm wɔ Asomafo no Nnwuma 5:1-11. Bere a woyii tow soronko bi de boaa Kristofo a na ahia wɔn no, Anania kɔtɔn asase bi na ɔde akokoduru kae sɛ sika no nyinaa na ɔde bae. Nanso, nokwarem no, na Anania ayi ‘eti ade no bi de asie’ ama ɔno ankasa yiyeyɛ. So wɔnam atoro ayamye yi so tumi daadaa Onyankopɔn? Dabida. Ɔsomafo Petro kae sɛ: “Ɛnyɛ nnipa na woadi atoro akyerɛ wɔn, na ɛyɛ Onyankopɔn. Na Anania tee nsɛm yi no, ɔhwee ase wui.” Ɛno akyi bere tiaa bi no, Safira a na ɔyɛ ne bɔne no boafo no nso hwee fam wui. Wɔn baanu nyinaa werɛ fii sɛ Onyankopɔn ‘nim komam ahintasɛm.’—Dwom 44:21.

Ɛte saa ara nnɛ, sɛ wutumi de wo nneyɛe bɔne sie w’awofo koraa a, wuntumi mfa nsie Yehowa Nyankopɔn a n’ani hu ade nyinaa no. Hebrifo 4:13 ka sɛ: “Enni abɔde biara a ɛnna adi n’anim, na ade nyinaa ho da hɔ, na ɛso abue, nea yɛne no wɔ asɛm no anim.” So ebetumi aba sɛ wo nso wo ho betumi ada hɔ asen saa? Bere a bere kɔ so no, wo nneyɛe bɔne no bɛda adi ma afoforo ahu. Mmebusɛm 20:11 ka sɛ: “Abofra po, wɔde ne nneyɛe na ehu no, sɛ n’adeyɛ bɛyɛ yiye na ateɛ.” Abebusɛm foforo ka sɛ: “Nea ɔkata ne mmarato so no, ɔrenkyẽ ade.”—Mmebusɛm 28:13.

Ababaa bi a wɔfrɛ no Tammy huu nokware a eyi yɛ bere a na ɔyɛ abofra no. Ɛwom sɛ Kristofo awofo na ɛtetee no de, nanso ofii ase nom sigaret, ne nsã, na ɔne mmarimaa a wonnye nni yɛɛ nhyehyɛe fii adi. Tammy bɔɔ mmɔden sɛ ɔde ne nneyɛe bɔne no besie, nanso ɔka sɛ: “M’awofo huu nsakrae bi wɔ me ho. Mebɛyɛɛ otuatewfo na mepɛe sɛ minya ahofadi. Sɛ obi nam asetra akwan abien so a, ɛnkyɛ na ada adi. Me de no de, ɛdaa adi ntɛm dodo. Me papa huu me sɛ merekohyia m’adamfo abarimaa bi wɔ sukuu bi a ɛbɛn yɛn fie mu.”

Sɛnea Yehowa Te Nka

Enti, nea w’awofo nnim no betumi—na ebia—apira wɔn bere bi. Nanso nea ehia kɛse no, so woabisa wo ho sɛ, ‘Yehowa te nka dɛn wɔ wɔn a wɔde atoro tra ase no ho?’ Dwom 5:5, 6 bua sɛ: ‘Yehowa tan wɔn a wɔkɔ so yɛ amumɔyɛde nyinaa; ɔbɛsɛe wɔn a wɔka atosɛm. Yehowa kyi onipa sisifo.’ Nnaadaa wo ho nsusuw sɛ wonam Kristofo asafo nhyiam horow a wokɔ na woboapa yɛ wo ho sɛ woresom no so betumi asɔ Onyankopɔn ani. Onim bere a nnipa de ‘wɔn ano na edi no ni, na wɔn koma atwe afi ne ho kɔ akyirikyiri’ no.—Marko 7:6.

Enti abofra bi a wɔfrɛ no Ricardo, a ɔde ne ho hyɛɛ nna mu nneyɛe bɔne mu kae sɛ: “Obi nya nkate a ɛyɛ hu bere a onim sɛ wahow Yehowa werɛ no.” Nanso so ebetumi aba sɛ obi bɛhow Yehowa werɛ—a ɛkyerɛ sɛ, ɛbɛma wadi yaw ampa? Nokwarem no, ɛte saa! Bere a tete Israel man no gyaw Onyankopɔn Mmara so di no, ‘wɔmaa Israel kronkronni no dii yaw.’ (Dwom 78:41, New World Translation) Ɛyaw bɛn ara na odi nnɛ, bere a mmofra a ‘wɔayɛn wɔn Yehowa kasakyerɛ ne nyansakyerɛ mu’ wia wɔn ho yɛ nneɛma bɔne no!—Efesofo 6:4.

Awofo a Wopira Wɔn

Enti, hu sɛ wuntumi mfa nneɛma nsie daa. Wowɔ asodi wɔ Onyankopɔn ne w’awofo anim sɛ woka nea woreyɛ wɔ sum ase no kyerɛ wɔn. Yegye tom sɛ eyi a wobɛyɛ no betumi ahyɛ wo aniwu na ebia ɛde asotwe bi a emu yɛ den aba wo so. (Hebrifo 12:10, 11) Sɛ woakɔ so ada atoro ne nnaadaa adi a, woasɛe wo mu ahotoso a w’awofo wɔ. Enti mma ɛnyɛ wo nwonwa, sɛ ɛba sɛ wɔde anohyeto a emu yɛ den sen biara ma wo a.  Tammy ka sɛ: “Bere a wohuu sɛ merekohyia m’adamfo abarimaa no, me papa ho dwiriw no. Afei ohui sɛ ontumi nnye me nni bio. Ɔde n’ani sii me so yiye.” Nanso Tammy hui sɛ na ɔretwa nea wagu.—Galatifo 6:7.

Wubetumi ahwɛ kwan sɛ w’awofo bɛhaw na wɔn bo afuw nso. Wɔn din asɛe. (Fa toto Genesis 34:30 ho.) Sɛ wo papa yɛ Yehowa Adansefo no mu biako a, ebia ɛho behia sɛ ɔde n’asɛyɛde ahorow a ɔwɔ wɔ asafo no mu to hɔ. (Tito 1:5-7) Yiw, sɛnea Mmebusɛm 17:25 ka no, abofra otuatewfo betumi ahyɛ “n’agya awerɛhow ne ne na a ɔwoo no amutew.”

Nhoma kyerɛwfo Joy P. Gage de yaw kaa sɛnea awofo bi te nka bere a wɔn ba bi tew atua no ho asɛm. Ose: “Ebinom su gu wɔn yam. Ebinom su teɛteɛm. Ebinom su wɔ kokoam. Ebinom su wɔn kan asetra. Wosu efisɛ wonni daakye anidaso biara bio. Wosu wɔ nea anka ɛsɛ sɛ ɛba ho. Wosu wɔ nea ɛbɛba ankasa ho. Wɔde abufuw su. Wɔde abasamtu su.” Ntease wom, ɛnyɛ mmerɛw sɛ wubehyia tebea a ɛte sɛɛ, sɛ́ wobɛma nnipa baanu a wɔdɔ wo sen biara wɔ wiase adi awerɛhow a ɛte saa. Tammy ka sɛ: “Mibu kɔmpɔ hwɛ m’akyi, na mete nka sɛ mihui a anka manyɛ ma me papa ne me maame anni awerɛhow saa.”

Nanso, wuntumi nsakra nea aba atwam no. Na akyinnye biara nni ho sɛ, ɛyaw ne den a ɛyɛ nyinaa akyi no, ɛyɛ asɛyɛde sɛ wobɔ mmɔden siesie nsɛm tebea no. (Fa toto Yesaia 1:18 ho.) Nea ɛno kyerɛ ne sɛ wobɛka nokware akyerɛ w’awofo, agye yaw a wodi ne wɔn bo a afuw no atom, na woapene asotwe biara a wɔde bɛma wo no so. Nokware a wobɛka no betumi ayɛ adeyɛ a edi kan a ɛbɛma w’awofo ne Yehowa Nyankopɔn koma ani agye, na saa ara na ɛbɛma w’ankasa woanya ahonim a emu da hɔ mu anigye.—Mmebusɛm 27:11; 2 Korintofo 4:2.

Nanso ɔkwan bɛn so na ɛsɛ sɛ wofa ka kyerɛ w’awofo? Wobɛyɛ dɛn atumi akwati akwan abien mu asetra? Wɔbɛka saa nsemmisa abien yi ho asɛm wɔ Nyan! a edi hɔ a ɛbɛba no mu.

[Kratafa 19 mfonini]

Nokware a wobɛka no betumi de akomatɔyam abrɛ wo ne w’awofo