Mmofra Bisa Sɛ . . .

Mɛyɛ Dɛn Atumi Akwati Asetra Akwan Abien?

Anna ka sɛ: “Ná mimmu biribiara a m’awofo ka. Ná meyɛ otuatewfo, na mifii ase dii atoro kyerɛɛ wɔn. Ná meka kyerɛ wɔn sɛ merekodi gua, nanso na ɛyɛ abarimaa bi nkyɛn na mekɔ.”

NÁ ANN nam asetra akwan abien so, ankyɛ na ofii ase buu n’ani guu n’awofo kasakyerɛ ne n’ahonim a na ɔde Bible atete no nso so. Wunim, ná Ann wia ne ho ne n’adamfo abarimaa no nya nna mu kyɛfa. Ɔka sɛ: “Mebɔɔ mmɔden sɛ mɛma me werɛ afi Yehowa koraa.” Nanso, ankyɛ na ohyiaa nokwasɛm a anibere wom yi sɛ ‘nea nnipa gu biara no, ɛno ara na wobetwa.’ (Galatifo 6:7) Ann nyinsɛnee. Ɔka sɛ: “Mifi me koma nyinaa mu dɔ me ba no, nanso ɛnsɛ sɛ obiara ma saa tebea yi bi to no. Ɛnyɛ bere a wonwaree. Ɛnyɛ bere a wo nkutoo na ɛsɛ sɛ wohwɛ abofra no.”

So asetra akwan abien asum wo afiri—kyerɛ sɛ wode sɛnea wote ankasa sie w’awofo ne wo mfɛfo Kristofo? Ebia nea woyɛ ara ne sɛ wone wo sukuufo nnamfo bi a wunim sɛ w’awofo ani rennye ho sɛ wone wɔn bɛbɔ fekuw rebɔ. Anaasɛ ebia wode wo ho ahyɛ nneyɛe bɔne bi a anibere wom mu te sɛ, sigaretnom, mmosa a wɔnom tra so, anaa ɔbarima ne ɔbea nna a edi aware anim mu. Sɛnea na ɛte wɔ Ann fam no, ɛnkyɛ na woatwa so aba.b

Nokwasɛm yi mpo mmɔ mmofra bi hu koraa mma wɔntwe wɔn ho mfi wɔn atuatew kwan a wɔnam so no so. Wɔte sɛ onipa a ɔhwɛ ne ho wɔ ahwehwɛ mu na “ntɛm ara na ne werɛ afi su ko a okurae.” (Yakobo 1:23, 24) Yɛwɔ awerɛhyem sɛ wode wonte saa. Ebia woafi ase dedaw rehwehwɛ wo ho mu yiye—na w’ani nnye nea wuhu no ho. Wopɛ sɛ wosakra. Wuhu hia a ɛho hia sɛ wosakra. Asɛm no ne sɛ, ɔkwan bɛn na wubetumi afa so asakra?

Adwensakra—Adeyɛ a Edi Kan

Nea edi kan, ɛsɛ sɛ wusi gyinae sɛ wobɛsakra. Asomafo no Nnwuma 3:19, 20 hyɛ yɛn sɛ: “Enti monsakra mo adwene, na monnan mo ho, na wɔapopa mo bɔne, na ɛyɛ a, ahodwo nna afi [Yehowa] anim aba.” Nanso, adwensakra sen biribi a adwene tumi yɛ ara kwa. Sɛ́ obi bɛsakra no kyerɛ sɛ “obedi yaw, anu ne ho, anaa n’ahonim bebu no fɔ wɔ nea wayɛ ho.” Bible kyerɛwfo Yakobo tuu fo sɛ: “Munni nkɔmmɔ, na mo werɛ nhow, na munsu! Mo serew nnan awerɛhow, na mo anigye nnan anito! Mommrɛ mo ho ase [Yehowa] anim.” (Yakobo 4:9, 10) Ɛbɛyɛ dɛn na woatumi adi yaw wɔ biribi a woanya mu anigye de besi nnɛ ho? Susuw bɔne a ɛyɛ no ho. Susuw sɛnea ahaw Onyankopɔn no ho. Susuw nsɛnnennen a wo kokoam asetra no de aba wo so ne atoro a ama woadi na wode akata so no ho. Kae sɛ Onyankopɔn kyi nnaadaa! (Dwom 5:6) Nokwasɛm ahorow yi a wubesusuw ho betumi aboa wo ma wode w’adwene ne wo nkate nyinaa apow nnebɔne.

Nanso, nea woreyɛ no ho yaw kɛkɛ a wubedi no ara nnɔɔso. Aberante bi a wɔfrɛ no Robert, a na ɔde nnuru di dwuma ɔkwammɔne so gye tom sɛ: “Na midi awerɛhow. Ná minim papa ne bɔne. Nanso, mekɔɔ so ara nantew asetra akwan abien so.” Enti ade a wɔyɛ no akokoduru so ho hia! Wɔ 2 Beresosɛm 7:14 no, Onyankopɔn kae sɛ sɛ abɔnefo ‘bɛbrɛ wɔn ho ase na wɔabɔ mpae, na wɔahwehwɛ n’anim na wɔasan afi wɔn kwammɔne no so a, ɛnde ɔno ankasa fi soro betie na ɔde wɔn bɔne afiri wɔn.’

Nea ‘Onyankopɔn anim a wɔhwehwɛ’ kyerɛ ne sɛ wobɛkɔ n’anim wɔ mpaebɔ mu, aka wo bɔne akyerɛ no, na woasrɛ bɔne fafiri. Ebia eyiyɛ renyɛ mmerɛw, nanso akyinnye biara nni ho sɛ wobɛte ahotɔ nka bere a woayɛ saa no. Odwontofo no kae sɛ: “Mimuaa m’ano no, me nnompe gurowee, m’apini a misii daa nyinaa nti. Na awia ne anadwo wo nsa yɛɛ me so duru, . . . Mekaa me bɔne mekyerɛɛ wo, na mankora m’amumɔyɛ so.”—Dwom 32:3-5.

W’awofo a Wobɛka Akyerɛ Wɔn

Onipa foforo nso wɔ hɔ a ɛho hia sɛ ohu wo haw ahorow no. Ɔne hena? Abofra bi a wɔfrɛ no Brian ka sɛ: “Mfomso kɛse a midii ne sɛ mekɔkaa me haw ahorow kyerɛɛ wɔn a wose wɔyɛ me nnamfo sen sɛ anka mɛka akyerɛ me maame a ɔyɛ Kristoni no. Nanso esiane nea misusuwii sɛ ɔbɛyɛ nti, na misuro sɛ me ne no bedi nkitaho, enti mekɔɔ me nnamfonom nkyɛn na wɔmaa metwee me ho fii nokware no ho koraa.” Nni mfomso koro no ara. Fa wo koma ma w’awofo a wosuro Onyankopɔn no. (Fa toto Mmebusɛm 23:26 ho.) Ɛfata sɛ wohu nea woreyɛ. Nyansahyɛ ahorow pii a ɛfa sɛnea wode nsɛm a ɛtete sɛɛ bɛto w’awofo anim ho wɔ nhoma Questions Young People Ask—Answers That Work mu wɔ ti 2.c

Nea ɛte biara no, ɛnsɛ sɛ wohwɛ kwan sɛ wɔn ani begye atoro a woadi akyerɛ wɔn no ho. Nanso awofo wɔ ɔdɔ a emu yɛ den ma wɔn mma. Ɔkyerɛwfo Clayton Barbeau ka sɛ: “Ɛnyɛ nea wɔbɛpow wo esiane sɛ woadi mfomso anaasɛ wode wo ho akɔto amane bi mu nti. Mmofra anyinsɛn, anya nna mu nyarewa, ahyia nsɛnnennen a mmosa anaa nnuru a wɔde di dwuma ɔkwammɔne so de aba wɔn so anaasɛ wɔatɔ amane foforo mu ma wɔaka sɛ wɔn awofo te a, nea ebesi nye. Nanso sɛ wɔka kyerɛ wɔn awofo a, wohu sɛ wɔbam wɔn anaa wɔde wɔn nsa to wɔn kɔn mu, ka kyerɛ wɔn sɛ, ‘Asɛm ato wo ankasa, nanso ma yɛnhwɛ nea yebetumi ayɛ de ayi wo afi ɔhaw no mu.’” Yiw, sɛ wɔn ahodwiriw ne abufuw a wonya mfiase no ano dwudwo a, awofo bebree bɔ mmɔden de mmoa ma. Na hwɛ sɛnea eyi yɛ nokware bere a awofo no yɛ nkurɔfo a wosuro Onyankopɔn no! Ɛnsɛ sɛ wɔma wo anim ase a wobegu anaa pira a wobepira wo no yɛ nea ɛho hia wɔn kɛse, na mmom sɛ wɔbɛhwɛ atoto nneɛma yiye. (Fa toto Yesaia 1:18 ho.) Wɔ eyi mu no, ebia wɔbɛyɛ nhyehyɛe ama wo ne asafo mu mpanyimfo no akasa.—Yakobo 5:14, 15.

Ampa, ebia w’awofo de asotwe bi a ɛfata ne ebia anohyeto ahorow bi a emu yɛ den bɛma wo. Nanso eyi betumi aboa w’ankasa ma woakwati sɛ wobɛsan akɔfa w’akwan dedaw no so. Afei nso, ebia ka a wobɛka ho asɛm akyerɛ w’awofo na woahu ɔdɔ mu a wofi susuw wo ho no bɛsakra wɔn ho adwene a wowɔ no kɛse. Ɛde besi saa bere no, ebia na wowɔ wɔn mmara ne anohyeto ahorow ho adwemmɔne. Abeawa bi a wɔfrɛ no Paulette gye tom sɛ: “Ɛyɛ den sɛ yebegye afotu ne akwankyerɛ ahorow a yɛn awofo de ma yɛn no atom. Nanso mabehu sɛ yɛn ankasa nya mfaso ne daa anigye fi mu.”

Wo Fekubɔ a Wobɛsakra No

Ɛyɛ den sɛ abofra bi ankasa bɛfa asetra akwan abien so. Ebia w’atipɛnfo hyɛɛ wo nkuran wɔ w’atuatew no mu! Nea ɛbɛyɛ na woakwati esum ase asetra no, ɛho behia sɛ wosakra wo fekubɔ. Odwontofo no kae sɛ: “Me ne nnipa huhuw antra, na me ne nyaatwomfo anhyia mu.” (Dwom 26:4) Nnamfo dedaw a wone wɔn bɛtetew mu no nyɛ mmerɛw. Te sɛ odwontofo no, ebia ɛho behia sɛ wobɔ mpae sɛ: “Gye me fi okontomponi ne omimfo nsam.” (Dwom 43:1) Yɛ biribi a ɛne mpaebɔ yi hyia denam wo nnamfo dedaw no a wobɛka akyerɛ wɔn sɛ woasakra na woasi wo bo sɛ wobɛyɛ nea ɛteɛ no so. Sɛ́ anka wobɛyɛ Yesu suani a ɔnna ne ho adi no, ka wo gyidi kyerɛ afoforo. (Fa toto Yohane 19:38 ho.) Nea ɛtaa ba ne sɛ, nnamfo bɔne no kɔhwehwɛ nnamfo afoforo ntɛm ara.

Nea edi hɔ no, ɛsɛ sɛ wunya nnamfo a wɔfata de hyɛ nnamfo bɔne no ananmu. So wunnya mmofra a wosuro Onyankopɔn ne wɔn mmɔ? Ɛnde susuw odiyifo Yeremia a ɔkaa eyi no ho: “Mantra aserewfo guabɔ mu manni ahurusi; wo nsa nti me nko na metrae.” (Yeremia 15:17) Ɛbɛyɛ ama wo sɛ wo nko wobɛtra asen sɛ wode wo ho bɛbɔ mmofra a wɔbɛma woayɛ mmerɛw honhom mu. Mmom no, nea ɛtaa ba ne sɛ, sɛ woyere wo ho a, wubetumi anya nnamfo pa. Sɛ́ nhwɛso no, Tammy fii ase ne ne sewaa ba bi a na ɔyɛ daa ɔsɛmpakafo bɔe. Tammy ka sɛ: “Yɛbɛn yɛn ho ara yiye. Da a mankɔ sukuu no, na me ne no kɔ asɛnka. Eyi boaa me ma meyɛɛ nsakrae wɔ m’asetram.”

Nanso, Germanni abofra bi ka sɛ, “ahobammɔ a eye sen biara ne ahonim pa a wonya fi Yehowa Nyankopɔn a wɔbɛn no kɛse mu no.” Abeawa kumaa bi a ɔde ne ho hyɛɛ asetra akwan abien mu gye tom sɛ: “Me ne M’agya, Yehowa annya abusuabɔ a ɛbɛn da.” Ɛdenam mpaebɔ ne kokoam adesua so no, ofii ase yɛɛ nsakrae. Ɔde anigye ka sɛ: “Afei me ne Yehowa wɔ abusuabɔ a obiara ntumi nnye mfi me nsam.” Wo nso wubetumi ne Onyankopɔn anya adamfofa a ɛbɛn saa. Ɔbɛkyerɛ wo kwan na woaboa wo, sɛ sakra a wobɛsakra w’akwan dedaw no yɛ den ma wo mpo a. Dwom 37:24 ka Onyankopɔn somfo nokwafo bi ho asɛm sɛ: “Sɛ ɔhwe ase a, ɔremmea fam koraa, efisɛ [Yehowa] kura ne nsam.” Yiw, ɛdenam Yehowa mmoa so no, wubetumi ade wo ho afi asetra akwan abien ho.

[Ase hɔ nsɛm]

[Asɛm a wɔafa aka wɔ kratafa 24]

“Mebɔɔ mmɔden sɛ mɛma me werɛ afi Yehowa koraa”

[Asɛm a wɔafa aka wɔ kratafa 24]

Ɛsɛ sɛ wusi gyinae ankasa sɛ wobɛsakra

[Kratafa 25 mfonini]

Kyerɛkyerɛ mu kyerɛ wo nnamfo dedaw no sɛ woasakra na wone wɔn nkɔ so nyɛ nneɛma bɔne no bio