Akwaaba Ba “Onyankopɔn Suro” Ɔmantam Nhyiam no Ase!

YIW, ɛbere a wɔde bɛyɛ Yehowa Adansefo 1994 ɔmantam nhyiam horow no rebɛn. Efi June 1994 kosi January 1995 no, wɔbɛyɛ nnansa nhyiam no wɔ nkurow a ɛwɔ wiase aman pii mu mu—nea edi kan wɔ Amerika Kusuu Fam, afei Europa Apuei ne Atɔe Fam, Asia, Amerika Mfinimfini ne Kusuu Fam, Afrika, Australia, ne nsupɔw ahorow so.

Hwɛ sɛnea asɛmti no kanyan adwene—“Onyankopɔn Suro”! Eyi nyɛ ehu kɛse a ɛka obi a ne nkwa da asiane mu, na mmom Onyankopɔn suro, osuro a ɛma abotɔyam ne anigye. Bible mu abebusɛm no se: “Nea edi ahobrɛase ne [Yehowa] suro akyi ne ahonyade ne anuonyam ne nkwa.” (Mmebusɛm 22:4) Ɔkwan bɛn so na Onyankopɔn suro betumi de “ahonyade ne anuonyam ne nkwa” aba? Ɛno bɛda adi bere a wɔkyerɛkyerɛ nhyiam no asɛmti no mu wɔ nnansa a wobenya ɔkasa ahorow, nkɔmmɔbɔ, ɔyɛkyerɛ, ne drama biako no mu.

Ɔsomafo Paulo kyerɛwee sɛ ɛnsɛ sɛ ‘yegyae yɛn ho yɛn ho nhyiam.’ (Hebrifo 10:25) Yehowa Adansefo fa saa asɛm no aniberesɛm, na wohyiam mprɛnsa dapɛn biara ma asafo adesua ne ɔsom. Nanso, ɔmantam nhyiam a wɔyɛ no afe afe no yɛ ade soronko. Wɔde ahopere kɛse hwɛ kwan, na sɛ wɔyɛ wie a, wɔka ho asɛm asram pii. Yɛde anigye to nsa frɛ wo sɛ ɛmfa ho ɔsom ko a wowom no, kɔka wɔn ho wɔ wɔn nhyiam no ase na woanya Kristofo fekubɔ a ɔdɔ wom ne nsɛm a ehia a efi honhom mu. Obi a ɔwɔ Yehowa Adansefo asafo a ɛwɔ mo mpɔtam hɔ mu ani begye sɛ ɔbɛka beae ne bere a wɔbɛyɛ ɛhɔnom nhyiam no akyerɛ wo.