Asɛmpa A Wɔbɛka Akyerɛ—Wɔ Nsasesin A Wɔntaa Mfa Nyan! Nyɛ Mu Adwuma Mu
1 Yɛn Awurade Yesu Kristo kae sɛ ɛsɛ sɛ ‘wɔka asɛmpa no wiase NYINAA . . . ’ (Mat. 24:14) Eyi nti na ɛsɛ sɛ yɛbɔ mmɔden boa nnipa a wɔtete asasesin a wɔntaa nyɛ mu adwuma mu no. So yebetumi ama wɔanya hokwan pii ate asɛm no na wɔanya nkwa.—Rom. 10:13, 14.
2 Ebia mo asafo no wɔ asasesin a ɛwɔ akyiri a wɔntaa nyɛ mu adwuma. Wɔhyɛ nkuran sɛ ɛsɛ sɛ yɛyɛ asasesin biara mu adwuma, anyɛ yiye koraa no pɛnkoro wɔ afe mu. Sɛ mo asafo no ntumi nyɛ saa a, so asafo foforo bi a ɛbɛn hɔ betumi aboa? Ɔmansin sohwɛfo no nim nea muhia esiane mo asasesin kyerɛwtohɔ no mu a ɔhwehwɛ bere a wabɛsra mo no nti. Ɔbɛyɛ nea obetumi de ayɛ nhyehyɛe ma asafo horow a ɛbemmɛn hɔ no aboa.
3 Bio nso, so asafo no asasesin afa horow bi a enni akyiri wɔ hɔ a ɛnsow aba te sɛ afoforo? Eyinom betumi ayɛ nea adefo atrae a nkurɔfo ntaa ntie asɛm no wɔ mfe ahorow a atwam mu no ka ho. Nea ɛka eyi ho no nso betumi ayɛ baabi a nyamesomfo a wɔsɔre tia asɛm no titiriw te. Nanso, ɛwom sɛ, efi bere a wɔde Kristofo asafo no sii hɔ wɔ afeha a edi kan no mu no, “adehye pii” nnye ntoom de, nanso ebinom ayɛ saa. Yudafo asɔfo no mu binom mpo gye toom. Enti, yɛmpɛ sɛ yɛboapa bu yɛn ani gu asasesin bi so. Yɛpɛ sɛ yɛka asɛm no kyerɛ nnipa nyinaa.—1 Kor. 1:26; Aso. 6:7. (Hwɛ Aso. 16:6-10; 18:9-11 nso.)
AKWAN A YEBETUMI AFA SO AYƐ EYI
4 Ɔsom adwuma so ahwɛfo betumi ahyɛ nkuran na wɔaboa ma wɔayɛ nhyehyɛe de Nyan! nsɛmma nhoma no ayɛ asafo no asasesin nyinaa mu adwuma. Asafo binom ayɛ dapɛn mfinimfini ne dapɛn awiei kuw adansedi ho nhyehyɛe ma wɔayɛ adwuma titiriw wɔ asasesin a wɔntaa nyɛ mu adwuma mu. Sɛ ɛsɛ sɛ mutu kwan tenten a, ebia mubehu sɛ fi a mubefi ase ntɛm no bɛboa. Ebinom yɛ nhyehyɛe de aduan a wobedi awiabere kɔ na wɔde nnɔnhwerew pii anaasɛ da mũ nyinaa yɛ asɛnka adwuma.
5 Mubetumi de ahyɛ adawurubɔfo kuw bi a wɔnnɔɔso nsa na wɔasan akɔ wɔn a wɔanto wɔn wɔ ofie no nkyɛn na wɔayɛ asasesin a nnipa pii nni mu nɔ mu adwuma. Eyi mma wɔnsɛe bere, na ɛma kuw no mufo nyinaa keka wɔn ho a wɔnsɛe bere pii mfa ntwɛn afoforo. Sɛ nkurɔfo nni fie wɔ nsasesin yi mu a, mubetumi asusuw ho ahwɛ sɛ ebia ɛfata sɛ mugyaw nhoma bi wɔ ofie hɔ. Momma ɛntra mo adwenem sɛ ɛsɛ sɛ wɔde nhoma no hyɛ baabi a obi a ɔretwam ntumi nhu.
6 Ɛho wɔ mfaso sɛ musiesie mo asɛnka no ma ɛne asasesin a mobɛyɛ mu adwuma no hyia. Yɛ hyew, nya adamfofa su na nya adwempa bere nyinaa. Sɛ worekɔ adefo nkyɛn a, ma nea wɔn ani begye ho ntra wo adwenem. Ɛsɛ sɛ wususuw wo atadehyɛ ne wo ahosiesie nyinaa ho yiye. Yɛmpɛ sɛ ‘yɛto hintidua, na wɔanka yɛn som ho asɛmmɔne.’—2 Kor. 6:3.
7 Sɛ moahyia ɔsɔretia wɔ bere a atwam no mu a, momma eyi ntra mo adwenem wɔ nnianim nsɛm ne kyerɛwnsɛm a mode bedi dwuma wɔ mo asɛnka mu no mu, ne nhoma a mode bɛma no mu. Yɛn ani gye sɛ ‘yebegye ebinom.’ Momma yensiesie yɛn ho na yɛatumi de mmoa a ɛfata biara ama wɔ eyi mu.—1 Kor. 9:19-23.
8 Ɔpɛ a yɛwɔ sɛ yɛbɛyɛ Yehowa adwuma ne nokware dɔ a yɛwɔ ma nnipa ahorow nyinaa no bɛka yɛn ma yɛaka asɛmpa no wɔ asasesin a wɔntaa nyɛ mu adwuma mu. (Mat. 5:43-48) Sɛ ɔdɔ ne nokwaredi da adi wɔ yɛn abrabɔ ne yɛn kasa mu wɔ nsasesin yi mu a, ebia ebinom begye asɛm no atom na ahyɛ Yehowa yɛn Nyankopɔn anuonyam.—Mat. 5:16.