Adawurubɔfo A Wɔnkɔ Asɛnka Daa A Wɔbɛboa Wɔn
1 Yesu kae sɛ: “Obiara a ɔte me nsɛm yi na ɔyɛ no, mede no mɛto ɔbadwemma a ɔtoo n’aban ɔbotan so no ho.” (Mat. 7:24) Yesu asɛm yi mu ntease a obi benya na akanyan no ɔkwan pa so no bɛma wasow aba pa a asɛmpa no ka ka ho. Saa osetie a efi nkanyan a eye mu yi ma wonya fapim a ɛte sɛ ɔbotan a ɛrentumi mmu ngu wɔ amanehunu a ɛte sɛ asorɔkye mu.
2 Ɛyɛ ntease pa nti na yɛpɛ sɛ yɛboaboa yɛn ho yɛn ho na yenya asɛnka adwuma no mu kyɛfa kɛse sɛnea yɛn ankorankoro nsɛm tebea bɛma kwan no. Yɛn mu binom yɛ adawurubɔfo a wɔnkɔ asɛnka daa, na eyi haw adwene kɛse. Dɛn na ebetumi aka obi ma ɔsram mũ atwam a ɔrennya asɛnka ne asuafoyɛ adwuma a ɛho hia no mu kyɛfa?
3 Ebia na ebinom yare kɛse, na ebia ebinom nso twentwɛn asɛnka ase de kosii bere a ɔsram no reyɛ awu a nea wohui ara ne sɛ tebea horow a wɔnhwɛ kwan siw wɔn kwan ma wɔantumi amfa wɔn ho anhyɛ ɔsom no mu. Ebia ebinom nso nni anisɔ mma ɔsom adwuma no sɛ ɔsom mu ademude a ɛsɛ sɛ wɔde di biribiara kan. (2 Kor. 4:7) Nhyɛso a efi ɔhokafo a onnye nni anaasɛ abusuafo afoforo nkyɛn ayɛ nea ebu abaw mu mmere bi. Obi ankasa adesua ho su pa a wonkura mu ne nhyiam horow a wɔnkɔ daa aka afoforo nso, ma enti wonhu gye a Satan wiase no awiei a abɛn no gye ntɛmpɛ no. (2 Pet. 3:11, 12) Biribi aka wɔn koma. Enti biribi nkanyan wɔn mma womfi nea ayɛ koma no ma abu so no mu nkasa. (Mat. 12:34) Nea enti a ɛte saa biara no, yɛpɛ sɛ yɛboa wɔn.
NEA MPANYIMFO BETUMI AYƐ
4 Ɛsɛ sɛ mpanyimfo bɔ mmɔden sɛ wobehu wɔn a wɔwɔ asafo no mu nyinaa tebea ne wɔn ahiade ahorow sɛnea ɛbɛyɛ a wobetumi de mmoa a efi ɔdɔ mu ama. Ɛsɛ sɛ mpanyimfo no susuw wɔn a ebia wɔabɛyɛ adawurubɔfo a wɔnkɔ asɛnka daa no ho wɔ wɔn nhyiam horow ase na wosi nea obetumi aboa wɔn ne ɔkwan a wɔbɛfa so ayɛ saa no ho gyinae. Wobetumi aka asɛnnennen no ho asɛm nso bere a wɔredi asafo mu ahiade ho dwuma. Wɔ Ɔsom Nhyiam ase no, ɛsɛ sɛ ɔkyerɛwfo no hyɛ adeyɛ biara a ɛreyɛ ama obi ayɛ nea ɔnkɔ asɛnka daa no nsow bere a ɔrehyehyɛ Asafo Adawurubɔfo Kyerɛwtohɔ no.
NEA NHOMA ADESUA SO AHWƐFO BETUMI AYƐ
5 Ɛsɛ sɛ ɔkyerɛwfo no de wɔn a wɔammu asɛnka adwuma ho akontaa no din ma Asafo Nhoma Adesua so ahwɛfo no ɔsram biara sɛnea ɛbɛyɛ a wobetumi de mmoa ama ntɛm ara. (Hwɛ August 1984 Yɛn Ahenni Som, kratafa 1.) Ɛsɛ sɛ adesua sohwɛfo no fi ayamye mu kɔ wɔn a wɔnkɔ asɛnka daa no nkyɛn na ohu nea esiw wɔn kwan no ne mmoa a obetumi de ama. (Mmeb. 27:23) Wɔn a wɔnkɔ asɛnka daa no mu pii bɛkyerɛ mmoa ho anisɔ. Bere a adesua sohwɛfo no ahu onii no nsɛm tebea mu no, ɛsɛ sɛ ɔyɛ nhyehyɛe ma ɔne n’ankasa yɛ adwuma anaasɛ ɔma ɔdawurubɔfo foforo a ne ho akokwaw anaasɛ ɔkwampaefo bi yɛ saa. Nyansahyɛ pa a ɛfa nhyehyɛe a ɛne ankorankoro nsɛm tebea hyia ho a wɔde bɛma wɔn a wɔnkɔ asɛnka daa nso betumi aboa. So wobetumi ayɛ nhyehyɛe anya asɛnka mu kyɛfa Kwasida a edi kan ɔsram biara anaasɛ Memeneda a ɛto so abien ne nea ɛto so anan no mu? Sɛ lɔre akatua yɛ asɛnnennen anaasɛ wohia sɛ wɔboa wɔn wɔ wɔn mmofra nkumaa ho a, adesua sohwɛfo no betumi ama adawurubɔfo afoforo a wɔwɔ ɔpɛ aboa.
6 Sɛ ɔsom adwuma sohwɛfo rekɔsra nhoma adesua akuw horow no a, obetumi ayɛ nhyehyɛe na ɔne adesua sohwɛfo no akɔsra wɔn a wɔnkɔ asɛnka daa no. Wɔ saa kwan no so no anuanom baanu a wɔn ho akokwaw betumi abom de afotu ama na afei wɔaboa. Wɔn a wɔte saa no ma wɔato fapim a ɛte sɛ ɔbotan de ayɛ osetie wɔ Kristo ahyɛde a ɛne sɛ yɛnka asɛm na yɛnyɛ asuafo no ho. Eyi betumi aboa wɔn ma wɔde asɛnka adwuma no adi kan wɔ wɔn nneɛma a ehia wɔn no mu. (Rom. 10:10) Momma yɛnyere yɛn ho wɔ saa kwan yi so mfa nkyerɛ ɔdɔ a yɛwɔ ma “gyidi fifo” no.—Gal. 6:10.