Gyidi a Yɛbɛma Wɔanya wɔ Adesamma Bɔfo No Mu
1 Nnipa dodow no ara anya nea ɛyɛe a nkwa bae no ho adwene bi. Nea ɛyɛ awerɛhow ne sɛ wɔadaadaa nnipa pii ma wɔagye atom sɛ nkwa nam adannandi so na ɛbae. Creation nhoma no ka n’afã abien no nyinaa ho asɛm kɔ akyiri na ɛde adanse a ɛboro so ma de gyina Bible no akyi. Yɛbɛyɛ dɛn atumi aboa nnipa komapafo a wɔada no adi sɛ wɔpɛ sɛ wotie no? Ɛdenam sankɔhwɛ ahorow so. Sɛ yɛsan kɔ hɔ a, ɛyɛ papa bere nyinaa sɛ yebenya biribi pɔtee a ɛbɛma wɔanya Yehowa mu gyidi sɛ yɛn Bɔfo wɔ yɛn adwenem a yɛbɛka.
2 Sɛ onipa no kyerɛɛ Bible no mu gyidi a, asɛm yi a yɛbɛka no betumi atu mpɔn wɔ nkɔmmɔbɔ a yebefi ase no mu:
◼ “Yesaia 45:18 ka nea ɛyɛe a amansan no bae ho asɛm bi a tumi wom; Mepɛ sɛ mihu w’adwene wɔ ho. [Kenkan na twɛn ma ɔnkasa.] Yehowa da ne ho adi sɛ ɔne ɔsoro ne asase Bɔfo. Na nkwa a ɛwɔ asase yi so nso ɛ? Yesaia 42:5 ka sɛ ɔno na ɔbɔɔ ɛnonom nso. [Kenkan.] Sɛ nea Bible ka no yɛ nokware a, ɛnde na adannandi yɛ atoro. So wote nka sɛ wubetumi de wo ho ato Bible no so?” Bue Creation nhoma no ti 17, na twe adwene si nneɛma afoforo nti a ɛsɛ sɛ yegye di sɛ Yehowa ne Ɔbɔadeɛ no.
3 Wubetumi de biribi te sɛ eyi nso afi wo nkɔmmɔbɔ no ase:
◼ “Wɔ me nsrahwɛ a etwa to no mu no, mibisae sɛ, Daakye bɛn na ɛwɔ hɔ ma onipa ne asase no? Hwɛ sɛnea nhoma a mede maa wo no bua saa asemmisa no.” Bue Creation nhoma no nkratafa 234-5 na hyɛ no nkuran sɛ ɔnkenkan nkyekyem 6 ne 7. Sɛ ɔkɔ so kyerɛ ho anigye a, wubetumi abisa sɛ: “Nsɛm a ɛyɛ nwonwa bɛn na wususuw sɛ ebesisi wɔ asase no so?” Sɛ ɛfata a, mubetumi asusuw asɛm yi ho saa bere no ara anaasɛ wɔ wo nsrahwɛ a edi hɔ no mu denam Creation nhoma no ti koro no ara no nkyekyem afoforo a mubesusuw ho no so.
4 Sɛ ɛda adi sɛ ɛte sɛ nea ofiewura no pɛ nyamesom a, wubetumi abisa sɛ:
◼ “So woahu sɛ nnipa a wɔwɔ hɔ nnɛ no mu pii hyɛ obi a onni nipasu anaasɛ obi a wɔfrɛ no Odomankoma anuonyam? [Gyina ma ommua.] Bible no ma yehu Ɔbɔadeɛ no ankasa pefee. Kenkan Adiyisɛm 4:11. Sɛ wokenkan kyerɛwsɛm no wie a, ofiewura no betumi akyerɛ n’adwene. Afei wubetumi atwe adwene asi asɛm pɔtee biako anaa abien a efi Creation nhoma no ti 11 no so, na ebia woasi Ɔbɔadeɛ no atirimpɔw a ɛne sɛ ɔbɛma asase no nyinaa adan paradise wɔ Kristo Ahenni ase no so dua.
5 Ɔkwan fofro a wubetumi afa so afi sankɔhwɛ no ase ne sɛ wobɛka sɛ:
◼ “Nsɛmmɔnedi nti, adesamma adi yaw ne awerɛhow pii. Yehowa, asase yi Bɔfo, ahyɛ bɔ sɛ tebea horow yi bɛba awiei. [Bue kratafa 196, na kenkan Mmebusɛm 2:21, 22.] Wɔn a wogye no tom sɛ wɔn Bɔfo na wɔyɛ n’apɛde no betumi ahwɛ nhyira horow a ɛyɛ anigye kwan.” Sɛ ɛfata saa bere no a, montoa so nsusuw Adiyisɛm 21:4, ne 5 ho wɔ nkratafa 197-8.
6 Adawurubɔfo a wɔn ho akokwaw ahu sɛ ɛyɛ papa sen biara sɛ wɔbɛhyehyɛ mmere pɔtee ama sankɔhwɛ ahorow. Nhyehyɛe pɔtee a yɛbɛyɛ ama adwuma yi bɛboa yɛn ma yɛasan akɔsra anigyefo ntɛm ara. Hu bere a eye sen biara ma wo ne asasesin no mu nnipa. Ɛdenam adwuma yi a wubenya mu kyɛfa daa so no, wubenya anigye wɔ ahyɛde a ese ‘yɛnyɛ asuafo’ a wɔbɛma abam no mu.—Mat. 28:19, 20.