Ma Mpanyin ne Mmofra Nyinaa Abusua mu Anigye Nhoma no Bi
1 Abarimaa bi a wadi mfe 11 a ofi California wɔ United States kyerɛɛ Nea Ɛde Abusua mu Anigye Ba nhoma no ho anisɔ. Ɔkyerɛwee sɛ: “M’ani sɔ, na mehyɛ mmusua foforo nkuran sɛ wɔnkenkan nhoma yi efisɛ etu mpɔn. Ɛreboa m’abusua . . . ama yɛanya asomdwoe ne anigye wɔ yɛn fie.” Ɛsɛ sɛ abofra yi suahu no hyɛ yɛn nkuran ma yɛma mpanyin ne mmofra nyinaa Abusua mu Anigye nhoma no bi. Nyansahyɛ kakra a wubetumi asɔ ahwɛ wɔ w’asɛnka adwuma mu wɔ February mu ni.
2 Sɛ wuhyia aberante anaa ababaa bi a, wubetumi aka sɛ:
◼ “Nnipa pii a wɔne wo bɔ tipɛn resusuw aware ho. Nanso ɛhe na wubetumi anya aware ho nsɛm a edi mu? [Twɛn ma ommua.] Mmerante ne mmabaa taa ka sɛ wontumi nhu sɛ wɔaso aware anaa wɔnsoe. Ma me ne wo nsusuw nea nhoma yi ka wɔ asɛm yi ho no ho.” Dan kɔ Abusua mu Anigye nhoma no kratafa 14, na kenkan nkyekyem 3. Afei twe adwene si eti no asɛmti ketewa biara so. Fa nhoma no ma, na yɛ nhyehyɛe san kɔ hɔ.
3 Sɛ wo ne ɔwofo rekasa a, wubetumi aka sɛ:
◼ “Yɛne awofo resusuw akwankyerɛ a etu mpɔn a wotumi de tete mmofra ankasa ho. Wɔaboaboa eyinom ano wɔ Nea Ɛde Abusua mu Anigye Ba nhoma yi mu.” Dan kɔ kratafa 55. Kenkan nkyekyem 10, na kenkan Deuteronomium 6:6, 7, a ɛwɔ nkyekyem 11 no. Afei dan adwene kɔ nsɛm a wɔde nkyerɛwde soronko akyerɛw a ɛwɔ nkyekyem 12 kosi 16 no so. Toa so sɛ: “Nhoma yi aboa nnipa pii ma wɔatumi atete wɔn mma yiye. M’ani begye ho sɛ mede eyi bɛma wo.”
4 Sɛ wuhyia ɔpanyin a, wubetumi aka sɛ:
◼ “Sɛ mekenkan asɛm tiawa yi wie a, mesrɛ wo kyerɛ w’adwene wɔ ho.” Bue Abusua mu Anigye nhoma no kratafa 169, na kenkan nkyekyem 17 no mu kasamu abien a edi kan no. Afei ma ɔnkyerɛ n’adwene. Wubetumi atoa so akenkan nhoma no afã horow bi ansa na wode ama, a egyina mmuae a ɔbɛma no so.
5 Sɛ wosan kɔsra obi a womaa no Abusua mu Anigye nhoma no bi a, fa yɛ wo botae sɛ wobɛbɔ mmɔden sɛ wubefi Bible adesua ase. Ahwehwɛde nhomawa no mu Adesua 8 anaa Nimdeɛ nhoma no ti 15 yɛ baabi pa a wubetumi afi ase afi. Bere a yɛreyɛ saa no, momma yɛmmɔ mmɔden mmoa mpanyin ne mmofra nyinaa mma wonnya Kristofo abusua asetra a ɛyɛ anigye.