Kuw Adansedi De Anigye Ba
1 Bere a Yesu resoma asuafo 70 sɛ wɔnkɔka asɛm no, ɔkyerɛɛ wɔn nea wɔnka, ɔkyekyɛɛ wɔn baanu baanu, na ɔkyerɛɛ wɔn asasesin a wɔnyɛ mu adwuma. Eyi ma wonyaa anigye kɛse. (Luka 10:1-17) Saa ara na nnɛ, kuw adansedi boa siesie Onyankopɔn nkurɔfo, hyehyɛ wɔn, na ɛhyɛ wɔn nkuran ma asɛnka adwuma no.
2 Mpanyimfo Di Anim: Mpanyimfo yɛ adwuma titiriw de boa obiara ma onya asɛnka adwuma no mu kyɛfa daa. Ɔsom adwuma sohwɛfo no di anim yɛ nhyehyɛe ma dapɛn mfinimfini adansedi. Ɛyɛ nhoma adesua sohwɛfo biara asɛyɛde sɛ ɔbɛyɛ nhyehyɛe ama ne kuw, titiriw wɔ dapɛn awiei. Sɛ edu bere bi na sɛ asafo mũ no nyinaa hyiam kɔ asɛnka te sɛ Ɔwɛn-Aban adesua bi akyi a, ɛsɛ sɛ nhoma adesua sohwɛfo biara di n’ankasa kuw ahiade ho dwuma.
3 “Fɛfɛɛfɛ Wɔ Ano Wɔ Ano”: Ɛsɛ sɛ onua a wɔpaw no sɛ ɔnhwɛ asɛnka nhyiam so no fi ase wɔ bere ano na ɛnsɛ sɛ ɔma nhyiam no di boro simma 10 anaa 15. Ɛbɛyɛ papa sɛ ɔbɛkyekyɛ kuw no mu ama wɔn asasesin (gye sɛ nhoma adesua so ahwɛfo no na wobedi eyi ho dwuma, sɛnea yɛaka dedaw no) ansa na wɔde mpaebɔ awie. Eyi mma ɛho mmehia sɛ adawurubɔfo no bɛbom ahyiam wɔ asasesin no mu, ade a ebetumi abrɛ nidi a yɛn adwuma no wɔ ase no. Ɛne ɔsomafo Paulo afotu no hyia nso sɛ: “Wɔnyɛ ade nyinaa fɛfɛɛfɛ wɔ ano wɔ ano.” (1 Kor. 14:40) Ɛsɛ sɛ wɔn a wɔkɔ nhyiam yi nyinaa boa ma nhyehyɛe no kɔ so yiye denam du a wobedu hɔ bere ano, ne nea ɔredi anim no bɛyɛ biako koraa, na wɔafi hɔ ntɛm akɔ asasesin no mu bere a wɔawie nhyiam no ara pɛ no so.
4 Ɛde Biakoyɛ Ba: Kuw adansedi nhyehyɛe no ma yenya hokwan a ɛkyɛn so de hu afoforo wɔ asafo no mu. Bere a ɛnyɛ mfomso sɛ yebedi kan ne obi ayɛ nhyehyɛe sɛ yɛbɛyɛ adwuma abom no, ebetumi ayɛ nhyira nso sɛ yɛbɛkɔ asɛnka nhyiam ahorow a yenni kan ne obi nyɛ nhyehyɛe biara. Wobetumi ama yɛne obi a yennim no yiye anantew, na yɛnam so atumi ‘atrɛw’ yɛn dɔ mu.—2 Kor. 6:11-13.
5 Kuw adansedi hyɛ yɛn nkuran na ɛka yɛn bom sɛ ‘yɔnko adwumayɛfo ma nokware no.’ (3 Yoh. 8) Ɛmmra sɛ yebenya mu kyɛfa akosi ase!