Asɛmmisa Afã

◼ Bible nnyinasosɛm bɛn na yebetumi de ayɛ adwuma wɔ sɛnea yɛde mobile fon di dwuma bere a yɛwɔ Kristofo nhyiam ase anaa asɛnka mu?

“Biribiara Wɔ Ne Bere a Wɔahyɛ Ato Hɔ.” (Ɔsɛnk. 3:1): Nkurɔfo tumi kyerɛw nsɛm gu mobile fon so de mena afoforo na wotumi nso de frɛ nkurɔfo bere biara. Nanso ɛtɔ bere bi a, ɛnsɛ sɛ Kristofo ma wɔn fon twetwe wɔn adwene. Sɛ nhwɛso no, sɛ yɛkɔ Kristofo nhyiam a, saa bere no yɛsom Yehowa, yegye honhom fam akwankyerɛ, na yɛhyehyɛ yɛn ho yɛn ho nkuran. (Deut. 31:12; Dw. 22:22; Rom. 1:11, 12) So yebetumi adum yɛn fon bere a yɛadu nhyiam ase no, na yɛkɔ fie a yɛahwɛ nsɛm a nkurɔfo akyerɛw abrɛ yɛn no? Sɛ tebea bi a yɛyɛ ho hwee a ɛnyɛ yiye nti ɛnsɛ sɛ yedum yɛn fon a, ɛsɛ sɛ yɛde to baabi a ɛremmɔ nhaw afoforo adwene.

“Asɛmpa no Nti na Meyɛ Ade Nyinaa.” (1 Kor. 9:23): Ɛtɔ bere bi a tebea bi bɛma ɛho behia sɛ obi de mobile fon di dwuma wɔ asɛnka mu. Sɛ nhwɛso no, onua a odi asɛnka adwuma anim no betumi de afrɛfrɛ anuanom a wɔreyɛ adwuma wɔ asasesin no fã bi mu no. Adawurubɔfo nso tumi frɛfrɛ anigyefo anaa Bible asuafo ansa na wɔakɔ wɔn nkyɛn, titiriw bere a saafo no te akyiri no. Sɛ yɛne ofiewura bi rekasa na yɛn fon no hyɛ yɛn ho a, ɛsɛ sɛ yɛyɛ ahwɛyiye na ansɛe nkɔmmɔbɔ no. (2 Kor. 6:3) Sɛ yɛretwɛn afoforo a, sɛ́ anka yɛbɛfrɛ yɛn adamfo bi wɔ fon so anaa yɛbɛkyerɛw nsɛm de amena no no, yebetumi de yɛn adwene asi asɛnka no anaa wɔn a yɛne wɔn nam no so.

Dwen Afoforo Ho. (1 Kor. 10:24; Filip. 2:4): Ɛnsɛ sɛ yɛde yɛ yɛn su da sɛ bere nyinaa yɛbɛka akyi wɔ asɛnka nhyiam ase na yɛasusuw sɛ yebetumi afrɛ obi anaa yɛbɛkyerɛw biribi de amena no abisa asasesin ko a kuw no reyɛ mu adwuma. Mpɛn pii no, sɛ yɛka akyi a, na ɛho abehia sɛ wɔsan kyɛ kuw no foforo. Ɛwom, ɛtɔ bere bi a tebea bi a yentumi nyɛ ho hwee bɛma yɛaka akyi. Nanso sɛ yɛde yɛ yɛn su sɛ yɛbɛkɔ asɛnka nhyiam ase ntɛm a, na yɛreda no adi sɛ yɛwɔ obu ma Yehowa nhyehyɛe, na yedwen onua a ɔrehwɛ asɛnka no so ne yɛn nuanom ho.