Nea Ɛbɛma Yɛatu Mpɔn wɔ Asɛnka Mu—Wo ne Nkurɔfo Nni Nkɔmmɔ na Fa So Di Wɔn Adanse

Nea Enti a Ɛho Hia: Sɛ yɛkɔ afie afie asɛnka a, yɛntaa nto nnipa pii wɔ fie. Nanso yetumi ne wɔn hyia wɔ kar mu, ayaresabea, bere a yɛregye yɛn ahome wɔ adwumam anaa sukuu mu ne mmeae a ɛtete saa. Yehowa pɛ sɛ obiara te Ahenni asɛm no. (1 Tim. 2:3, 4) Mpɛn pii no, sɛ yebetumi adi adanse a, ɛsɛ sɛ yefi ase ne wɔn di nkɔmmɔ.

Ɔkwan a Wobɛfa so Ayɛ:

Hwehwɛ nnipa a wubetumi ne wɔn abɔ nkɔmmɔ. Wohwɛ onipa no a, n’ani begye ho sɛ ɔne wo bɛbɔ nkɔmmɔ? Tebea no betumi ama moabɔ nkɔmmɔ? Nea adawurubɔfo bi yɛ ne sɛ, wɔhwɛ onipa no anim serew kyerɛ no. Sɛ onipa no nso serew a, wɔbɔ mmɔden sɛ wɔne no bɛbɔ nkɔmmɔ.
Sɛ ɛyɛ den ma wo sɛ wo ne obi bɛkasa a, bɔ mpae tiawa wɔ wo tirim.—Neh. 2:4; Aso. 4:29.
Wubetumi aka asɛm bi a ɛbɛma obi asɔ so anaa wubetumi de nkyia afi ase. Bere a Yesu ne Samariani bea no rekasa no, wamfa Ahenni no ho asɛm amfi nkɔmmɔ no ase. (Yoh. 4:7) Ɛtɔ da a, asɛm a yɛbɛka de akamfo obi betumi akɔfa nkɔmmɔ ba. Wubetumi aka sɛ: “Wo mma no bu ade paa!” Yebisa asɛm a, ɛno nso tumi kɔtwetwe nkɔmmɔ ba. Yebetumi abisa sɛ: “Nnɛra anwummere wotee asɛm a esii no?”
Sɛ munya fi nkɔmmɔ ase a hwehwɛ hokwan a ɛbɛma woadi no adanse, nanso mpere wo ho. Tɔ wo bo ase ma nkɔmmɔ no nsɔ. Wubetumi aka asɛm bi a ɛbɛma no abisa wo asɛm. Fa no sɛ morebɔ abusua asetena ho nkɔmmɔ. Wubetumi aka biribi te sɛ, “M’akenkan asɛm bi a ɛboa awofo ma wotumi tete wɔn mma yiye.” Sɛ asɛm bi a asi na moreka ho asɛm a, wubetumi aka sɛ, “Nnansa yi metaa kenkan biribi a ɛma m’ani gye paa.” Sɛ nkɔmmɔbɔ no ankɔ sɛnea worehwehwɛ na woantumi anni no adanse a, mma w’abam mmu.
Fa nkratawa anaa nhoma bi hyɛ wo ho na sɛ obi kyerɛ asɛm no ho anigye a, wode ama no.

Sɔ Eyi Hwɛ wɔ Ɔsram Yi Mu:

Nnawɔtwe biara fa yɛ wo botae sɛ wo ne obi bedi nkɔmmɔ na wonam so adi no adanse.