Nea Ɛbɛma Yɛatu Mpɔn wɔ Asɛnka Mu—Nnipa a Wɔnka Yɛn Kasa a Yɛbɛdi Wɔn Adanse

Nea Enti a Ɛho Hia: Yehowa pɛ sɛ nnipa a wɔwɔ “ɔman biara mu” bɛsom no. (Aso. 10:34, 35) Wei nti na Yesu kaa sɛ n’asuafo bɛka asɛmpa no “asase so nyinaa” na wɔadi “amanaman nyinaa” adanse. (Mat. 24:14) Sakaria hyɛɛ nkɔm sɛ nnipa a wɔka “amanaman no kasa hodoɔ nyinaa” bɛgye nokware no atom na wɔabɛsom Yehowa. (Sak. 8:23) Ɔsomafo Yohane nso nyaa anisoadehu bi sɛ wɔn a wɔbɛtwa ahohiahia kɛse no fi “amanaman ne mmusuakuo ne nnipa ne kasa nyinaa mu.” (Adi. 7:9, 13, 14) Enti sɛ yɛreyɛ asɛnka adwuma na yɛhyia nnipa a wɔnka yɛn kasa a, ɛsɛ sɛ yɛbɔ mmɔden di wɔn adanse.

Ɔkwan a Wobɛfa so Ayɛ:

Siesie wo ho bere nyinaa. Hwɛ sɛ wowɔ Good News for People of All Nations nwomawa no bi wɔ w’asɛnka bag mu. Asɛm bi a wɔato din “How to Help Those Who Speak Another Language” (Nea Wobɛyɛ Aboa Nnipa a Wɔnka Wo Kasa) wɔ nwomawa no mfiase pɛɛ. Bɔ mmɔden sɛ wobɛkenkan ate ase. Sɛ wohwɛ asasesin no mu a, nnipa ahorow bɛn saa na wobɛhyia wɔn? Ma wei ntena w’adwenem na twe video anaa nwoma a ɛwɔ saa kasa no mu fi jw.org gu w’afidie so. Bio nso, wobɛtumi de JW Language app no asua nsɛm ntiatia bi wɔ kasa ahorow mu. Sɛ mo ne asafo a wɔka kasa ahorow yɛ adwuma wɔ asasesin koro mu a, ɛnneɛ momfa nwoma a ɛwɔ mo kasa mu nko ara nyɛ afie afie adwuma no. Nanso sɛ moreyɛ badwam adansedi adwuma no na nnipa a wɔwɔ mpɔtam hɔ ka kasa ahorow pii a, ɛnneɛ mobɛtumi de nwoma a ɛwɔ wɔn kasa mu ayɛ adwuma.
Sɛ wohyia obi a ɔnka wo kasa a, boa no ma ɔnhu “Onyankopɔn nneɛma akɛseɛ” ho ade wɔ ne kasa mu. (Aso. 2:11) Wobɛtumi akyerɛ no jw.org na wakɔkenkan nwoma wɔ ne kasa mu. Sɛ wohu sɛ n’ani gye asɛm no ho a, ntɛm ara hyehyɛ Please Follow Up (S-43) fɔɔm no ma w’asafo mu kyerɛwfo. Kɔ so ara ne no mmɔ nkɔmmɔ kɔsi sɛ ɔbɛnya ɔdawurubɔfo a ɔka ne kurom kasa.

Sɔ Wei Hwɛ Bosome Yi Mu:

Abusua Som a ɛdi hɔ no, mobɛtumi ayɛ ɔyɛkyerɛ de ahwɛ ɔkwan a mobɛfa aso adi obi a ɔnka mo kasa adanse.