Mfa Bible Ho Nhoma Mma Obiara Kɛkɛ

Yesu kae sɛ: “Munyaa no kwa, momfa mma kwa.” (Mt 10:8) Yɛde Yesu asɛm no yɛ adwuma, enti sɛ yɛde Bible anaa Bible ho nhoma ma nkurɔfo a, yentwa bo nto so. (2Ko 2:17) Onyankopɔn Asɛm mu nokware a ɛsom bo na ɛwɔ yɛn nhoma ahorow yi mu. Egye adwumaden na yɛatintim saa nhoma no de akɔma asafo ahorow a ɛwɔ wiase nyinaa; ɛho ka nso dɔɔso. Enti, sɛ yɛrekɔfa nhoma no bi a, ɛsɛ sɛ yɛfa nea yehia nko ara.

Sɛ wode nhoma rema nkurɔfo a, da nhumu adi. Sɛ baguam adansedi mpo na woreyɛ a, fa nhumu yɛ adwuma. (Mt 7:6) Mfa nhoma no mma obiara a ɔretwam kɛkɛ, mmom wo ne no mmɔ nkɔmmɔ na hwɛ hu sɛ n’ani gye ho ansa na wode ama no. Hwɛ nsɛmmisa a ɛwɔ adaka a ɛka ho no mu, sɛ wutumi bua baako anaa nea ɛboro saa sɛ yiw a, ebetumi akyerɛ sɛ onipa no ani gye ho. Sɛ wuntumi nhu sɛ n’ani gye ho a, ɛnde ma no kratawa. Nanso sɛ ɔka sɛ ɔpɛ nsɛmma nhoma anaa nhoma foforo biara a, fa ma no.​—Mme 3:27, 28.