Yɛ Fakaa Wɔ Ɔkwan a Wofa So Di Adanse no Mu

Sɛ yɛwɔ nnipa ho anigye a, ɛbɛka yɛn ma yɛabɔ mmɔden ahu wɔn ahiade na yɛakyerɛ wɔn sɛnea Ahenni no bedi ɔhaw ahorow a wohyia no ho dwuma koraa. (Filip. 2:4) Ɔkwan a etu mpɔn a adawurubɔfo pii fa so dannan wɔn nsɛm mu ne sɛ wɔma ofiewura no ka biribi fa Paradise ho mfonini a ɛwɔ yɛn nhoma ahorow mu no ho, te sɛ nea ɛsã so wɔ wo nsa nifa so wɔ kratafa yi mu no. Ebia wubetumi de nnianim nsɛm a edidi so yi ayɛ saa:

◼ “Wususuw sɛ bere bi bɛba a adesamma abusua no benya asetra a wɔayɛ ho mfonini wɔ ha yi?”

◼ “Yɛn nyinaa pɛ sɛ yɛn mma nya asetra wɔ wiase bi a wɔayɛ ho mfonini wɔ ha yi mu. Wususuw sɛ dɛn na ɛbɛma asetra a ɛte sɛɛ aba?”

◼ “Eyi yɛ mfonini a ɛrekyerɛ sɛnea asetra bɛyɛ wɔ asase so bere a Onyankopɔn apɛde yɛ hɔ wɔ ha sɛnea ɛyɛ wɔ soro no. So wuhu biribi a ɛyɛ soronko wɔ sɛnea asetra te nnɛ no ho?”

◼ “Wobɛpɛ sɛ wotra ase wɔ tebea horow a wɔayɛ ho mfonini wɔ ha yi mu? [Twɛn ma ommua.] Wususuw sɛ eyi bɛba wɔ yɛn bere yi so?”

Tie onipa no mmuae yiye, na afei bisa no asɛm biako anaa nsɛm abien fa hu n’adwene. Sɛ nnipa binom ka sɛ wɔmpɛ sɛ wɔtra tebea horow a wɔayɛ ho mfonini no mu anaa wonnye nni sɛ ebetumi aba saa a, nka ntɛm ara sɛ wɔn ani nnye asɛm no ho. Fa anifere bisa wɔn hu nea enti a wosusuw saa no. Ebia nsɛm a wɔbɛka no bɛma ada adi sɛ ɔhaw ahorow a adesamma hyia a ayɛ sɛ obiara ntumi nni ho dwuma no haw wɔn yiye.—Hes. 9:4.

Bere a woahu nea ɛhaw wo fiewura no, dan wo nsɛm no kɔ ɛno so. Twe n’adwene si Ahenni nkrasɛm no fã a ɛka ne haw no ho asɛm tẽẽ no so. Kyerɛ no kyerɛw nsɛm biako anaa abien a ɛfa ne haw no ho. (Hwɛ nyansahyɛ a wɔde ama wɔ nifa so ha no.) Ma n’ankasa nhu nea Onyankopɔn Asɛm no ka. Sɛ ɔkyerɛ asɛm no ho anigye a, fa nhoma no ma no na yɛ nhyehyɛe san kɔ hɔ bio. Kɔtoa anigye a onyae wɔ nkɔmmɔbɔ a edi kan ho no so.

[Adaka wɔ kratafa 6]

Paradise Ho Mfonini Ahorow No Bi

Creation nhoma: kratafa 237, 243, 251

Ɔkyerɛkyerɛfo nhoma: kratafa 251-4

Nimdeɛ nhoma: kratafa 4-5, 188-9

Ahwehwɛde nhomawa: kratafa 11, 13

True Peace nhoma: kratafa 98

Som Nyankopɔn nhoma: kratafa 92-3

[Adaka wɔ kratafa 6]

Nsɛm a Ɛhaw Nkurɔfo

Adan, sikasɛm mu ahokyere

Yesaia 65:21, 22

Aduankɔm, aduanpa a yennya nni

Dwom 72:16;

Yesaia 25:6

Adwenemhaw

Dwom 34:8;

Yesaia 65:17-19

Mmoa a wɔyɛ wɔn ayayade

Mmebusɛm 12:10

Nnipa ho adwemmɔne, nsisi

Yesaia 11:3-5;

Asomafo no Nnwuma 10:34, 35

Nniso bɔne

Dwom 146:3, 4;

Daniel 2:44

Nsɛmmɔnedi, basabasayɛ

Dwom 37:10, 11;

Mmebusɛm 2:21, 22

Ohia, nhyɛso

Dwom 72:12-14;

Ɔsɛnkafo 8:9

Owu, awerɛhodi

Yesaia 25:8;

Adiyisɛm 21:3, 4

Ɔbrasɛe

2 Timoteo 3:1-5

Ɔko, amumɔyɛsɛm

Dwom 46:8, 9;

Mika 4:3, 4

Ɔporɔw, ntɛnkyea

Yesaia 9:6, 7;

2 Petro 3:13

Sɛe a wɔresɛe asase no

Adiyisɛm 11:18

Yare, dɛmdi

Yesaia 33:24; 35:5, 6