Trɔk a Yɛde Di Adanse

Nnansa yi, ɔkwan baako a yɛfa so di adanse ne sɛ yɛbɛhyehyɛ nwoma wɔ trɔk anaa pon so wɔ mmɔnten, baabi a nnipa pii di akɔneaba. Wei atwe nkurɔfo bebree aba nokware no mu. (Yoh. 6:44) Enti Yehowa ahyehyɛde no hyɛ asafo mu mpanimfoɔ nkuran sɛ wɔnhwɛ wɔn asasesin no baabi a nnipa taa fa na wɔmfa pon anaa trɔk yi bi nsi hɔ. Wei nyɛ apata bi a yɛrekɔbɔ asi baabi, enti mpɛn pii no ɛnhia sɛ yɛkɔsrɛ kwan fi aban mpanimfoɔ hɔ. Ɛnneɛ, adawurubɔfo bɛn na yɛbɛtumi de wɔn ayɛ adwuma yi? Ɛyɛ wɔn a wɔn adwenem da hɔ, wɔdi wɔn ho ni, na wɔnim nkɔmmɔbɔ. Sɛ adwuma yi bɛsow aba a, ɛhia sɛ adawurubɔfo hu nea ɛsɛ sɛ wɔyɛ ne nea ɛnsɛ sɛ wɔyɛ. Wei ho nyansahyɛ kakra na ɛdidi so yi.

Nea ɛsɛ sɛ woyɛ:

Te w’anim na nkurɔfo atumi abɛn wo. Nea adawurubɔfo bi yɛ ni: Nkurɔfo retwam a, wɔte wɔn anim sere kyia wɔn fɛfɛɛfɛ. Sɛ obi dan n’ani hwɛ nwoma a moahyehyɛ no a, wobɛtumi aka sɛ, “Sɛ w’ani gye ho a, wobɛtumi ayi bi.”
Gyina baabi a ɛfata. Mmeae bi wɔ hɔ a, adawurubɔfo gyina bɛn pon no, na wei ma nkurɔfo ba ho. Nanso baabi wɔ hɔ a, sɛ wɔbɛn pon no pii a, nkurɔfo ntumi mma ho. Enti wɔtwe wɔn ho kɔ akyi kakra. Sɛ wohu sɛ obi rebɛn pon no a, ka biribi fa fi nkɔmmɔbɔ ase. Ebia wobɛtumi abisa no sɛ, “Woasusu asɛmmisa yi ho pɛn?”
Fa Bible no di dwuma yie; hokwan biara a wobɛnya no, wo ne nkurɔfo nsusu emu nsɛm ho.
Sɛ obi yi nwoma te sɛ Bible Kyerɛkyerɛ no a, kyerɛ no sɛnea yɛne afoforo yɛ nhyehyɛe sua Bible. Afei ka kyerɛ no sɛ wopɛ sɛ wobɔ video a wɔato din Adɛn Nti na Ɛsɛ sɛ Wusua Bible? kyerɛ no.
Obi kyerɛ asɛm no ho anigye a, wobɛtumi agye ne din ne n’address. Sɛ ɔnte mo asasesin mu a, ɛnneɛ hyehyɛ Please Follow Up (S-43) kratasin no fa ma mo asafo mu kyerɛwfo ntɛm.