Jinsi Yehova Anavyotusaidia Kuvumilia kwa Shangwe

1-2. (a) Tutachunguza maswali gani? (b) Ni nini kinachoonyesha kwamba Yehova anatamani kutusaidia?

YEHOVA anaweza kutusaidia tukabiliane na changamoto katika maisha yetu na kupata shangwe katika utumishi wetu mtakatifu. Anatusaidia kupitia njia gani? Na tunawezaje kunufaika kikamili kutokana na msaada ambao Yehova anatupatia? Maswali hayo yatajibiwa katika makala hii. Hata hivyo, kabla ya kuyajibu, acheni kwanza tuchunguze swali linalohusiana na jambo hilo: Je, kweli Yehova yuko tayari kutusaidia?

² Neno fulani ambalo mtume Paulo alitumia katika barua yake kwa Waebrania linaweza kutusaidia kupata jibu. Paulo aliandika hivi: “Yehova ni msaidizi wangu; sitaogopa. Mwanadamu atanifanya nini?” (Ebr. 13:6) Marejeo fulani ya Biblia yanasema kwamba neno “msaidizi,” kama lilivyotumiwa kwenye mstari huo, linarejelea mtu anayechukua hatua upesi ili kumsaidia mtu anayelilia msaada. Mwazie Yehova akiharakisha kwenda kumsaidia mtu anayetaabika. Bila shaka utakubali kwamba ufafanuzi huo unaonyesha utayari wa Yehova, naam, kwamba anatamani, kuwa Msaidizi wetu. Yehova akiwa upande wetu, tunaweza kuvumilia majaribu yetu kwa shangwe.

3. Ni njia gani tatu ambazo Yehova hutusaidia kuvumilia majaribu yetu kwa shangwe?

³ Ni baadhi ya njia gani ambazo Yehova hutusaidia kuvumilia majaribu yetu kwa shangwe? Ili kupata jibu, acheni tuchunguze kitabu cha Isaya. Kwa nini? Unabii mwingi ambao Isaya aliongozwa na roho takatifu kuandika unawahusu watumishi wa Mungu leo. Isitoshe, mara nyingi Isaya anamfafanua Yehova kwa kutumia maneno ambayo tunaweza kuyaelewa kwa urahisi. Kwa mfano, fikiria Isaya sura ya 30. Hapo, akitumia lugha inayotokeza picha akilini mwetu, Isaya anafafanua jinsi Yehova anavyotusaidia tukiwa watu wake (1) kwa kusikiliza kwa makini na kujibu sala zetu, (2) kwa kutuandalia mwongozo, na (3) kwa kutupatia baraka sasa na wakati ujao. Acheni tuchunguze kwa undani zaidi njia hizo tatu ambazo Yehova anatusaidia.

YEHOVA HUTUSIKILIZA

4. (a) Yehova aliwafafanuaje Wayahudi katika siku za Isaya, na mwishowe aliruhusu wapatwe na jambo gani? (b) Yehova aliwapatia tumaini gani watu waaminifu? (Isaya 30:18, 19)

⁴ Katika maneno ya ufunguzi ya Isaya sura ya 30, Yehova anawafafanua Wayahudi kuwa “wana wakaidi” ambao ‘waliongeza dhambi juu dhambi.’ Anaendelea kusema hivi: “Wao ni watu waasi, . . . wasiotaka kusikia sheria ya Yehova.” (Isa. 30:1, 9) Kwa kuwa watu walikataa kusikiliza, Isaya alitabiri kwamba Yehova angeruhusu wapatwe na msiba. (Isa. 30:5, 17; Yer. 25:8-11) Na kwa kweli, Wababiloni waliwapeleka utekwani. Hata hivyo, kulikuwa na baadhi ya watu waaminifu miongoni mwa Wayahudi, na Isaya aliwatangazia ujumbe wa tumaini. Aliwaambia kwamba siku moja Yehova angewaonyesha tena kibali chake. (Soma Isaya 30:18, 19.) Na hivyo ndivyo ilivyotokea. Yehova aliwaweka huru kutoka utekwani Babiloni. Hata hivyo, hawakukombolewa papo hapo. Maneno “Yehova anangoja kwa subira ili kuwaonyesha kibali,” yalionyesha kwamba muda fulani ungepita kabla ya watu wake waaminifu kukombolewa. Kwa kweli, Waisraeli walikaa miaka 70 uhamishoni huko Babiloni kabla ya baadhi yao kuruhusiwa kurudi Yerusalemu. (Isa. 10:21; Yer. 29:10) Watu hao waliporudi katika nchi yao, machozi ya huzuni ambayo walilia wakiwa utekwani yalibadilika na kuwa machozi ya shangwe.

5. Tunapata uhakika gani katika Isaya 30:19?

⁵ Leo, tunaweza kupata faraja kutokana na maneno haya: “Kwa hakika atawaonyesha kibali mara tu atakaposikia kilio chenu cha kuomba msaada.” (Isa. 30:19) Isaya anatuhakikishia kwamba Yehova atasikiliza kwa makini tunapomlilia, naye atachukua hatua haraka ili kujibu maombi yetu. Isaya anaongezea hivi: “Atawajibu mara tu atakaposikia kilio chenu.” Maneno hayo yenye kufariji yanatukumbusha kwamba Baba yetu yuko tayari, naam, anatamani kuwasaidia wale wanaomwomba msaada. Kujua jambo hilo hutusaidia kuvumilia kwa shangwe.

6. Maneno ya Isaya katika lugha ya awali ya Kiebrania yanaonyeshaje kwamba Yehova anasikiliza sala za kila mmoja wa watumishi wake?

⁶ Tunapata uhakikisho gani zaidi kuhusu sala zetu kutokana na mstari huo? Yehova husikiliza kwa makini sala ya kila mmoja wetu. Kwa nini tunaweza kusema hivyo? Katika sehemu ya kwanza ya Isaya sura ya 30, Yehova anatumia kiwakilishi kinachoonyesha wingi anapozungumza na watu wake wakiwa kikundi. Hata hivyo, kwenye mstari wa 19, katika Kiebrania cha awali, kiwakilishi kinachotumiwa kinarejelea mtu mmojammoja. Isaya aliandika hivi: “[Hutalia] kamwe”; “kwa hakika [atakuonyesha] kibali”; “[atakujibu].” Akiwa Baba mwenye upendo, Yehova hawezi kamwe kumwambia mwana au binti yake aliyevunjika moyo, “Unapaswa kuwa imara kama ndugu au dada yako.” Badala yake, anashughulika nasi tukiwa mtu mmojammoja na anasikiliza kwa makini sala za kila mmoja wetu.​—Zab. 116:1; Isa. 57:15.

7. Isaya na Yesu wanaonyeshaje umuhimu wa kuendelea kusali?

⁷ Tunaposali kwa Mungu kuhusu jambo linalotuhangaisha, mwanzoni huenda Yehova akajibu kwa kutupatia nguvu tunazohitaji ili kuvumilia hali hiyo. Na ikiwa jaribu letu halitaisha haraka kama tulivyotarajia, huenda tukahitaji kumwomba Yehova tena na tena atupe nguvu za kuvumilia. Anatukaribisha tufanye hivyo. Hilo linaonekana katika maneno haya ya Isaya: “Msiache kamwe [Yehova] apumzike.” (Isa. 62:7) Hilo linamaanisha nini? Tunapaswa kuendelea kusali kwa Yehova bila kuacha kana kwamba hatumwachi Yehova apumzike. Maneno ya Isaya yanatukumbusha mfano wa Yesu kuhusu sala kwenye Luka 11:8-10, 13. Katika andiko hilo, Yesu anatutia moyo ‘tuendelee’ kusali na ‘tuendelee kuomba’ roho takatifu. Pia, tunaweza kumsihi Yehova atupatie mwongozo tunaohitaji ili tufanye maamuzi mazuri.

YEHOVA HUTUONGOZA

8. Maneno ya Isaya 30:20, 21, yalitimizwaje nyakati za kale?

⁸ Soma Isaya 30:20, 21. Jeshi la Babiloni lilipolizingira Yerusalemu kwa mwaka mmoja na nusu, watu walipata taabu hivi kwamba wakaizoea kama mkate na maji. Lakini kulingana na mstari wa 20 na 21, Yehova aliwaahidi Wayahudi kwamba ikiwa wangetubu na kubadili tabia yao, angewakomboa. Akimrejelea Yehova kuwa ‘Mfundishaji wao Mkuu,’ Isaya aliwaahidi watu hao kwamba Yehova angewafundisha jinsi ya kumwabudu kwa njia inayokubalika. Maneno hayo yalitimizwa Wayahudi walipowekwa huru kutoka utekwani. Yehova alithibitika kuwa Mfundishaji wao Mkuu, na kwa kufuata mwongozo wake, watu wake walifanikiwa kurudisha ibada safi. Leo, tumebarikiwa kwa sababu Yehova ndiye Mfundishaji wetu Mkuu.

9. Taja mojawapo ya njia tunayopokea mwongozo wa Yehova leo.

⁹ Akiendelea kutumia lugha ya mfano, Isaya anatufafanua sisi kuwa wanafunzi wanaofundishwa na Yehova katika njia mbili. Kwanza, Isaya anasema hivi: “Nawe utamwona Mfundishaji wako Mkuu kwa macho yako mwenyewe.” Katika mfano huo, picha inayotokezwa ni ya Mfundishaji akiwa amesimama mbele ya wanafunzi wake. Leo, tuna pendeleo la kunufaika kutokana na mafundisho yake. Yehova anatufundishaje? Anafanya hivyo kupitia tengenezo lake. Tunashukuru sana kwa sababu tunapata mwongozo ulio wazi kutoka kwenye chanzo hicho! Maagizo tunayopewa kwenye mikutano yetu ya kutaniko, makusanyiko na pia kupitia machapisho yetu, JW Broadcasting^®, na njia nyingine nyingi hutusaidia kuvumilia kwa shangwe tunapokabili hali ngumu.

10. Ni katika njia gani tunasikia “neno nyuma [yetu]”?

¹⁰ Isaya anataja njia ya pili ambayo Yehova anatufundisha anaposema hivi: “Masikio yako mwenyewe yatasikia neno nyuma yako.” Hapa nabii huyo anamfafanua Yehova kama mfundishaji aliye makini ambaye anatembea nyuma ya wanafunzi wake, akiwaelekeza kwenye njia wanayopaswa kwenda na kuwapa mwongozo. Leo, tunasikia sauti ya Mungu nyuma yetu. Jinsi gani? Maneno ya Mungu yaliyoongozwa na roho yaliandikwa katika Biblia zamani sana, wakati ambao uko nyuma yetu kwa mbali sana. Basi, tunaposoma Biblia, ni kana kwamba tunasikia sauti ya Mungu kutoka nyuma yetu.​—Isa. 51:4.

11. Ili kuvumilia kwa shangwe, tunahitaji kuchukua hatua gani, na kwa nini?

¹¹ Tunawezaje kunufaika kikamili kutokana na mwongozo ambao Yehova anatupatia kupitia tengenezo lake na Neno lake? Ona kwamba Isaya alitaja mambo mawili. Kwanza, “hii ndiyo njia.” Pili, “tembeeni ndani yake.” (Isa. 30:21) Haitoshi tu kujua “njia.” Tunapaswa pia ‘kutembea ndani yake.’ Kupitia Neno la Yehova, kama linavyofafanuliwa na tengenezo lake, tunajifunza mambo ambayo Yehova anataka tufanye. Pia, tunajifunza jinsi ya kutumia mambo tunayofundishwa. Ili tuvumilie kwa shangwe katika utumishi wetu kwa Yehova, tunahitaji kuchukua hatua hizo mbili. Ikiwa tutafanya hivyo, tunaweza kuwa na uhakika kwamba tutapata baraka za Yehova.

YEHOVA HUTUBARIKI

12. Kulingana na Isaya 30:23-26, Yehova angewabariki watu wake jinsi gani?

¹² Soma Isaya 30:23-26. Unabii huu ulitimizwaje kwa Wayahudi waliorudi katika nchi ya Israeli baada ya kutoka utekwani Babiloni? Walipata baraka nyingi sana​—za kimwili na za kiroho. Yehova aliwabariki watu wake kwa kuwapa chakula kingi sana cha kimwili. Ingawa hivyo, jambo muhimu zaidi ni kwamba aliwabariki kwa kuwapatia chakula kingi cha kiroho ibada safi iliporudishwa hatua kwa hatua. Baraka za kiroho ambazo watu wa Mungu walifurahia wakati huo zilizidi kwa mbali jambo lolote ambalo walikuwa wamejionea kabla ya hapo. Kama inavyoonyeshwa kwenye mstari wa 26, Yehova aliongeza kwa wingi nuru yao ya kiroho. (Isa. 60:2) Baraka za Yehova ziliwasaidia watumishi wake waendelee kumtumikia kwa shangwe wakiwa imara “kwa sababu ya hali nzuri ya moyo.”—Isa. 65:14.

13. Unabii kuhusu kurudishwa umetimizwaje katika siku zetu?

¹³ Je, unabii kuhusu kurudishwa kwa ibada safi unatuhusu leo? Bila shaka! Jinsi gani? Tangu 1919 W.K., mamilioni ya watu wamewekwa huru kutoka kwenye utekwa wa Babiloni Mkubwa, milki ya ulimwenguni pote ya dini za uwongo. Wameongozwa kwenda mahali bora zaidi kuliko Nchi ya Ahadi ya Israeli. Wameongozwa kwenda kwenye paradiso ya kiroho. (Isa. 51:3; 66:8) Paradiso hiyo ya kiroho ni nini?

14. Paradiso ya kiroho ni nini, na ni nani wanaokaa humo leo? (Tazama Ufafanuzi wa Maneno.)

¹⁴ Tangu 1919 W.K., watiwa-mafuta wamefurahia kuishi katika paradiso ya kiroho.b Kadiri ambavyo muda umepita, wale walio na tumaini la kuishi duniani, “kondoo wengine,” wameingia pia katika nchi hiyo ya kiroho, nao wanafurahia baraka nyingi za Yehova.—Yoh. 10:16; Isa. 25:6; 65:13.

15. Paradiso ya kiroho inapatikana wapi?

¹⁵ Leo, nchi ya kiroho au paradiso inapatikana wapi? Waabudu wa Yehova wanapatikana katika sehemu zote za dunia. Kwa hiyo, paradiso ya kiroho pia inapatikana ulimwenguni pote. Basi, hata iwe tunaishi wapi duniani, tunaweza kuwa sehemu ya paradiso ya kiroho iwapo tu tunaunga mkono ibada ya kweli kwa bidii.

16. Tunawezaje kuendelea kuona umaridadi wa paradiso ya kiroho?

¹⁶ Ili tuendelee kuwa katika paradiso ya kiroho, kati ya mambo mengine, ni lazima tudumishe uthamini wenye kina kuelekea kutaniko la Kikristo la ulimwenguni pote. Tunafanyaje hivyo? Kwa kukazia fikira sifa nzuri, bali si udhaifu wa wale walio katika paradiso hiyo. (Yoh. 17:20, 21) Kwa nini hilo ni muhimu sana? Fikiria ulinganifu ufuatao. Unapotembelea msitu au bustani maridadi, unatarajia kuona miti ya aina mbalimbali. Vivyo hivyo, paradiso ya kiroho iliyo katika makutaniko leo, imepambwa na watu wa aina mbalimbali ambao wanalinganishwa na miti. (Isa. 44:4; 61:3) Tunapaswa kuhakikisha kwamba tunaendelea kukazia fikira umaridadi wa “msitu,” bali si kasoro zilizo kwenye “mti” mmoja ulio karibu nasi. Hatuwezi kuruhusu hali yetu ya kutokamilika au ya wengine kutanikoni itukengeushe kuona umaridadi wa kutaniko la Kikristo la ulimwenguni pote lenye umoja.

17. Kila mmoja wetu anaweza kufanya nini ili kuchangia umoja katika kutaniko?

¹⁷ Sisi binafsi tunahusikaje katika kuchangia umoja huo? Kwa kufanya amani. (Mt. 5:9; Rom. 12:18) Kila mara tunapochukua hatua ya kwanza ili kuendeleza uhusiano wenye amani pamoja na wengine kutanikoni, tunachangia umaridadi wa paradiso ya kiroho. Tunakumbuka kwamba Yehova amemvuta kila mtu aliye katika paradiso ya kiroho kwenye ibada safi. (Yoh. 6:44) Wazia jinsi Yehova anavyofurahi anapoona tukijitahidi sana kuimarisha amani na umoja kati ya wale anaowaona kuwa wenye thamani, yaani, watumishi wake!​—Isa. 26:3; Hag. 2:7.

18. Tunapaswa kutafakari kuhusu nini mara kwa mara, na kwa nini?

¹⁸ Tunawezaje kunufaika kikamili kutokana na baraka tunazopokea tukiwa watumishi wa Mungu? Tunaweza kufikiria kwa undani kuhusu mambo tunayojifunza katika Neno la Mungu na katika machapisho yetu yanayotegemea Biblia. Kujifunza na kutafakari kwa njia hiyo kutatusaidia kusitawisha sifa za Kikristo ambazo zitatuchochea kuonyesha “upendo wa kindugu” na “upendo mwororo kwa mtu na mwenzake” kutanikoni. (Rom. 12:10) Tunapotafakari baraka tulizo nazo sasa, tunaimarisha uhusiano wetu pamoja na Yehova. Na kutafakari kuhusu baraka ambazo Yehova ameahidi kutupatia wakati ujao, kutafanya tumaini letu la kumtumikia Yehova milele liwe halisi zaidi kwetu. Mambo hayo yote yatatusaidia kumtumikia Yehova tukiwa na shangwe zaidi.

TUMEAZIMIA KUVUMILIA

19. (a) Kulingana na Isaya 30:18, tunaweza kuwa na uhakika kuhusu nini? (b) Ni nini kitakachotusaidia tuvumilie kwa shangwe?

¹⁹ Yehova “atainuka” kwa ajili yetu atakapokomesha uovu katika ulimwengu huu. (Isa. 30:18) Tuna uhakika kwamba Yehova—“Mungu wa haki”​—hataruhusu ulimwengu wa Shetani uendelee kuwepo hata siku moja zaidi ya muda unaohitajika. (Isa. 25:9) Tunangoja kwa subira pamoja na Yehova siku hiyo ya ukombozi ifike. Tunaposubiri, tumeazimia kuendelea kuthamini pendeleo la kusali, kujifunza na kutumia maishani Neno la Mungu, na kutafakari baraka tulizo nazo. Tunapofanya hivyo, Yehova atatusaidia tuvumilie kwa shangwe tunapoendelea kumwabudu.