Usiiache Kamwe Paradiso ya Kiroho

1. Paradiso ya kiroho ni nini, na tunapaswa kuazimia kufanya nini?

LEO, kuna paradiso hapa duniani iliyojaa watu wengi wanaofanya mambo mema. Paradiso hiyo imejaa mamilioni ya watu wanaofurahia amani ya kweli. Wale ambao tayari wako kwenye paradiso hiyo wameazimia kutoiacha kamwe. Pia, wanataka watu wengi iwezekanavyo wajiunge nao katika mazingira au hali hiyo ya pekee. Ni hali gani hiyo? Ni paradiso ya kiroho!a

2. Ni jambo gani lililo la pekee kuhusu paradiso ya kiroho?

² Kwa njia ya pekee, Yehova ameandaa mazingira matulivu yenye amani katika ulimwengu ambao Shetani ameugeuza kuwa mahali hatari, palipojaa chuki na uovu. (1 Yoh. 5:19; Ufu. 12:12) Mungu wetu mwenye upendo anaona jinsi mfumo huu unavyowadhuru watu, lakini anawafanya watumishi wake wahisi wakiwa salama ili wasitawi kiroho. Neno lake linaifafanua paradiso ya kiroho kuwa “kimbilio” na “bustani iliyonyweshwa maji vizuri.” (Isa. 4:6; 58:11) Kwa msaada wa Yehova, wale wanaoishi katika paradiso hiyo wanaweza kuwa na shangwe na kuhisi wakiwa salama katika siku hizi za mwisho zilizo ngumu.—Isa. 54:14; 2 Tim. 3:1.

3. Unabii wa Isaya sura ya 65 ulitimizwaje katika Israeli la kale?

³ Kupitia nabii Isaya, Yehova alifafanua jinsi ambavyo hali ingekuwa kwa wale ambao wangeishi katika paradiso ya kiroho. Unaweza kupata ufafanuzi huo katika Isaya sura ya 65, ambapo unabii huo ulitimizwa kwa mara ya kwanza mwaka wa 537 K.W.K. Wakati huo, Wayahudi waliotubu waliachiliwa kutoka utekwani Babiloni na walirudi katika nchi yao. Yehova aliwabariki watu wake na kuwasaidia walifanye jiji lililoharibiwa la Yerusalemu liwe maridadi tena, nao walijenga upya hekalu ambalo lilikuwa kituo cha ibada safi nchini Israeli.—Isa. 51:11; Zek. 8:3.

4. Unabii wa Isaya sura ya 65 umetimizwaje katika siku zetu?

⁴ Utimizo wa pili wa unabii wa Isaya ulianza mwaka wa 1919 W.K., waabudu wa Yehova wa siku zetu walipowekwa huru kutoka katika utekwa wa Babiloni Mkubwa. Kisha, paradiso ya kiroho ilianza kuenea duniani kote. Wahubiri wa Ufalme wenye bidii walianzisha makutaniko mengi na walionyesha sifa za Kikristo. Wanaume na wanawake ambao mwanzoni walikuwa wakatili na wenye maadili mapotovu, ‘wakavaa utu mpya ulioumbwa kupatana na mapenzi ya Mungu.’ (Efe. 4:24) Bila shaka, baraka nyingi ambazo Isaya anazifafanua zitatimizwa kihalisi wakati ujao katika ulimwengu mpya, lakini hata sasa tunanufaika kwa njia nyingi kwa sababu tuko katika paradiso ya kiroho. Acheni tuchunguze jinsi paradiso hiyo inavyotunufaisha na kwa nini kamwe hatupaswi kuiacha.

HALI WANAZOFURAHIA WALE WALIO KATIKA PARADISO YA KIROHO

5. Kama ilivyoahidiwa kwenye Isaya 65:​13, tunafurahia nini ndani ya paradiso ya kiroho?

⁵ Wanalishwa vizuri na kuburudishwa. Unabii wa Isaya unaonyesha tofauti kubwa iliyo wazi kati ya wale wanaoishi ndani ya paradiso ya kiroho na wale wanaoishi nje ya paradiso ya kiroho. (Soma Isaya 65:13.) Yehova anatosheleza kwa wingi mahitaji ya kiroho ya waabudu wake. Yehova ametupatia roho yake takatifu, Neno lake, na chakula kingi cha kiroho ambacho tunaweza ‘kula, kunywa, na kushangilia.’ (Linganisha Ufunuo 22:17.) Kinyume na hilo, wale walio nje ya paradiso ya kiroho wana ‘njaa, kiu, na wanaona aibu.’ Mahitaji yao ya kiroho hayatoshelezwi.—Amo. 8:11.

6. Yoeli 2:​21-24 inafafanuaje maandalizi yetu ya kiroho, na maandalizi hayo yanatunufaishaje?

⁶ Yoeli, alitumia bidhaa muhimu kama vile nafaka, divai, na mafuta ya zeituni katika unabii wake ili kuonyesha jinsi Yehova anavyowaandalia watu Wake mahitaji yao kwa ukarimu, kutia ndani chakula cha kiroho. (Yoe. 2:​21-24) Anafanya hivyo kupitia Biblia, machapisho yetu yanayotegemea Biblia, tovuti yetu, pamoja na mikutano yetu, makusanyiko ya mzunguko, na makusanyiko ya eneo. Tunaweza kutumia maandalizi hayo ya kiroho kila siku, na matokeo ni kwamba tutahisi tumelishwa vizuri na kuburudishwa.

7. Ni mambo gani yanayotupatia “hali nzuri ya moyo”? (Isaya 65:14)

⁷ Wana furaha na wameridhika. Watu wa Mungu wanaweza ‘kupiga vigelegele kwa shangwe’ kwa sababu wanamshukuru sana Yehova. (Soma Isaya 65:14.) Kweli zinazojenga, na tumaini imara linalotegemea dhabihu ya Kristo, pamoja na ahadi zenye kufariji zinazopatikana katika Neno la Mungu zinatupatia “hali nzuri ya moyo.” Kuzungumzia mambo hayo pamoja na waabudu wenzetu kunatufanya tuwe na furaha sana!—Zab. 34:8; 133:​1-3.

8. Ni sifa gani kuu mbili za paradiso ya kiroho?

⁸ Upendo na umoja wa watu wa Yehova ni sifa kuu mbili za paradiso ya kiroho. ‘Kifungo hicho cha muungano’ kinatupatia picha ya jinsi maisha yatakavyokuwa katika ulimwengu mpya, ambapo watumishi wa Yehova watafurahia upendo na umoja zaidi kuliko ilivyo leo. (Kol. 3:14) Dada mmoja Mkristo anaeleza alichojionea kwa watu wa Yehova alipokutana nao kwa mara ya kwanza, anasema hivi: “Sikujua jinsi ya kuwa mwenye furaha, hata katika familia yangu. Nilijionea upendo wa kweli kwa mara ya kwanza nilipokutana na Mashahidi wa Yehova.” Yeyote anayetaka kuwa na furaha ya kweli na kuridhika, anahitaji kuwa katika paradiso yetu ya kiroho. Hata ulimwengu ufikiri nini kuhusu watumishi wa Yehova, wana jina na sifa nzuri machoni pa Yehova na machoni pa wote wanaomwabudu yeye.—Isa. 65:15.

9. Isaya 65:​16, 17 inaahidi nini kuhusu maumivu na mateso tunayokabili leo?

⁹ Wamestarehe na wana utulivu. Isaya 65:14 inasema kwamba wale wanaochagua kuwa nje ya paradiso ya kiroho ‘wanalia kwa sababu ya maumivu ya moyo na wanaomboleza kwa sababu ya roho iliyovunjika.’ Lakini vipi kuhusu mambo yote yanayowasababishia watu wa Mungu maumivu na kuwafanya wateseke? Hatimaye, mambo hayo ‘yatasahauliwa na kufichwa machoni pa Mungu.’ (Soma Isaya 65:​16, 17.) Yehova ataondoa matatizo yetu, na baada ya muda mfupi maumivu yanayosababishwa na kumbukumbu hizo mbaya yataondolewa kabisa.

10. Kwa nini unahisi ni baraka kushirikiana na ndugu na dada zako Wakristo? (Tazama pia picha.)

¹⁰ Hata sasa, tunafarijika tunapokuwa kwenye mikutano yetu ya Kikristo, mahali ambapo tunaweza kutulia na kutokazia fikira mahangaiko ya mfumo huu mwovu wa mambo. Tunachangia utulivu wa mazingira yetu ya kiroho tunapoonyesha upendo, shangwe, amani, fadhili, na upole, sifa ambazo ni sehemu ya tunda la roho takatifu ya Mungu. (Gal. 5:​22, 23) Ni baraka kubwa kushirikiana na tengenezo la Mungu! Wale wanaobaki katika paradiso ya kiroho wataona utimizo kamili wa ahadi ya Mungu kuhusu “mbingu mpya na dunia mpya.”

11. Kulingana na Isaya 65:​18, 19, paradiso ya kiroho ambayo Yehova ametokeza inatuchochea kufanya nini?

¹¹ Wana shukrani na shangwe. Isaya anaendelea kueleza kwa nini tuna kila sababu ya kuendelea ‘kufurahi na kushangilia’ katika paradiso ya kiroho. Paradiso hiyo ya mfano imetokezwa na Yehova. (Soma Isaya 65:​18, 19.) Hivyo, haishangazi kwamba Yehova anatutumia kuwasaidia watu watoke katika mashirika ya ulimwengu huu ambayo hayafundishi ukweli kumhusu Mungu, na waingie katika paradiso yetu maridadi ya kiroho! Tunafurahia baraka nyingi kwa sababu tuko katika kweli, na hilo linatuchochea kuwaambia wengine kuhusu kweli hizo.—Yer. 31:12.

12. Ahadi zinazotajwa kwenye Isaya 65:​20-24 zinakufanya uhisije, na kwa nini?

¹² Pia, tunashukuru sana na tunashangilia kwa sababu ya tumaini tulilo nalo tukiwa wakaaji wa paradiso ya kiroho. Fikiria kuhusu mambo tutakayoona na kufanya katika ulimwengu mpya wa Mungu! Biblia inaahidi hivi: “Hakutakuwemo tena . . . mtoto mchanga anayeishi siku chache tu, wala mzee asiyetimiza siku zake.” Tutatajenga “nyumba na kuishi ndani yake [na tutapanda] mashamba ya mizabibu na kula matunda yake.” Hatutafanya “kazi ya bure” kwa sababu tutakuwa “watu waliobarikiwa na Yehova.” Yehova anatuahidi maisha yenye usalama, yanayoridhisha, na yenye kusudi halisi. “Hata kabla hawajaita,” atajua mahitaji ya kila mmoja wao na “kutosheleza tamaa ya kila kitu kilicho hai.”—Isa. 65:​20-24; Zab. 145:16.

13. Isaya 65:25 inafafanuaje mabadiliko ambayo watu wanafanya maishani wanapoanza kumtumikia Yehova?

¹³ Wana amani na usalama. Kwa msaada wa roho ya Mungu, watu wengi ambao zamani walikuwa wakatili, wakali, na wasio wanyoofu wamefanya mabadiliko makubwa maishani mwao. (Soma Isaya 65:25.) Wamebadili mwenendo wao mbaya wa zamani. (Rom. 12:2; Efe. 4:​22-24) Bila shaka, watu wa Mungu si wakamilifu, hivyo tutaendelea kufanya makosa. Hata hivyo, Yehova amewaunganisha “watu wa namna zote” katika kifungo kisichoweza kuvunjika cha upendo na amani. (Tito 2:11) Huu ni muujiza ambao ni Mungu Mweza-Yote tu anayeweza kuufanya!

14. Andiko la Isaya 65:25 limethibitikaje kuwa la kweli katika kisa cha ndugu mmoja?

¹⁴ Je, kweli watu wanaweza kubadili utu wao? Fikiria mfano huu. Kijana ambaye kufikia umri wa miaka 20 alikuwa amefungwa gerezani mara nyingi, na alikuwa amejihusisha sana katika vitendo vya ukatili na mwenendo mpotovu kiadili; pia, alikuwa amefungwa gerezani kwa sababu ya wizi wa magari, uporaji, na uhalifu mwingine mkubwa. Alikuwa tayari kupigana na mtu yeyote. Aliposikia kweli za Biblia kwa mara ya kwanza na kuanza kuhudhuria mikutano ya Mashahidi wa Yehova, alisadiki kwamba amepata kusudi la maisha—kumwabudu Yehova katika paradiso ya kiroho. Baada ya kubatizwa na kuwa Shahidi wa Yehova, mara nyingi alitafakari jinsi Isaya 65:25 inavyomhusu. Alibadilika kutoka kuwa kama simba, yaani, mtu mkatili, na kuwa kama kondoo, yaani, mtu anayefanya amani.

15. Kwa nini tunataka kuwaalika wengine wajiunge nasi katika paradiso ya kiroho, na tunawezaje kufanya hivyo?

¹⁵ Andiko la Isaya 65:13 linaanza kwa tangazo hili: “Bwana Mwenye Enzi Kuu Yehova anasema hivi.” Mstari wa 25 unamalizia kwa maneno haya “asema Yehova.” Sikuzote ahadi zake hutimia. (Isa. 55:​10, 11) Paradiso ya kiroho ni halisi. Yehova ameanzisha familia ya waabudu wake ambayo ni ya pekee sana. Kwa sababu sisi ni sehemu ya familia hiyo, tunaweza kupata amani ya kadiri sasa na kujihisi tukiwa salama katika ulimwengu huu wenye ukatili. (Zab. 72:7) Kwa sababu hizo, tunataka kuwasaidia watu wengi iwezekanavyo wajiunge na familia yetu ya Kikristo. Tunaweza kufanya hivyo kwa kukazia fikira kazi ya kufanya wanafunzi.—Mt. 28:​19, 20.

JINSI YA KUWASAIDIA WENGINE WAJIUNGE NASI KATIKA PARADISO YA KIROHO

16. Watu wanavutwa jinsi gani katika paradiso ya kiroho?

¹⁶ Kila mmoja wetu ana jukumu muhimu la kufanya ili wengine wavutiwe kujiunga nasi katika paradiso ya kiroho. Tunaweza kutimiza jukumu hilo ikiwa tutamwiga Yehova. Halazimishi watu wajiunge na tengenezo lake. Badala yake, kwa upole ‘anawavuta’ watu waje kwake. (Yoh. 6:44; Yer. 31:3) Watu wenye mioyo minyoofu wanaojifunza kuhusu sifa nzuri za Yehova na kuvutiwa na utu wake, wanavutwa kwake. Tunawezaje kuwasaidia wengine wajiunge nasi katika paradiso ya kiroho kupitia sifa na mwenendo wetu mzuri?

17. Tunawezaje kuwasaidia wengine wavutiwe na paradiso ya kiroho?

¹⁷ Njia moja inayoweza kuwasaidia watu wavutiwe na paradiso ya kiroho ni kwa kuwatendea kwa upendo na fadhili waabudu wenzetu. Watu wapya wanapohudhuria mikutano yetu ya kutaniko, tungependa wafikie mkataa uleule ambao watu wasioamini katika jiji la kale la Korintho huenda walifikia walipohudhuria mikutano. Walitangaza hivi: “Kwa kweli Mungu yupo kati yenu.” (1 Kor. 14:​24, 25; Zek. 8:23) Hivyo, ni lazima tuendelee kufuata ushauri wa ‘kudumisha amani miongoni mwetu.’—1 The. 5:13.

18. Ni nini kinachoweza kufanya watu wavutiwe na tengenezo letu?

¹⁸ Sikuzote tunapaswa kujitahidi kuwaona ndugu na dada zetu Wakristo kama Yehova anavyowaona. Tunafanya hivyo kwa kukazia fikira sifa zao nzuri, na si hali yao ya kutokamilika ambayo hatimaye itaondolewa. Tunaweza kusuluhisha tofauti zozote tulizo nazo katika njia ya upendo kwa ‘kutendeana kwa fadhili, huruma nyororo, tukisameheana kwa hiari.’ (Efe. 4:32) Kisha, watu wanaopenda kutendewa kwa njia hiyo ya upendo watavutiwa kujiunga nasi katika paradiso ya kiroho.b

BAKI NDANI YA PARADISO YA KIROHO

19. (a) Kama inavyoonyeshwa katika sanduku “Walitoka na Kurudi Kwenye Paradiso ya Kiroho,” baadhi ya watu wamesema nini baada ya kurudi katika paradiso ya kiroho? (b) Tunapaswa kuazimia kufanya nini? (Tazama pia picha.)

¹⁹ Tunashukuru sana kwa kuwa na paradiso ya kiroho! Ni maridadi sana, na imejaa waabudu wengi wa Yehova kuliko wakati mwingine wowote. Tungependa kuendelea kuwa wenye shukrani sikuzote kwa sababu ya paradiso ambayo Yehova ametutayarishia. Yeyote anayetaka kuburudishwa, kuridhika, kupata utulivu na usalama, ni lazima aingie katika paradiso ya kiroho na asitoke kamwe. Hata hivyo, uwe makini kwa sababu Shetani anajitahidi kadiri awezavyo kututoa katika paradiso hiyo. (1 Pet. 5:8; Ufu. 12:9) Hatupaswi kumruhusu ashinde. Acheni tujitahidi kulinda umaridadi, usafi, na amani ya paradiso ya kiroho.