Lek yoʼtan te Jehová yuʼun te bin ya apase

1. ¿Bin ya snopik chaʼoxtul j-abatetik yuʼun Jehová?

¡KʼAX tʼujbil snaʼel «te Jehová ya smulan te pueblo yuʼune»! (Sal. 149:4). Pero ayniwan machʼatik ya xchebaj yoʼtanik sok jich ya yalik: «Melelnix-a te tseʼel yoʼtan te Jehová ta stojol te j-abatetik yuʼun, pero ¿tseʼelbal yoʼtan ta jtojol?». Bayal j-abatetik yuʼun te Jehová ta namey kʼinal te jaʼnix jich ay wokol la yaʼiyik schʼuunel te tseʼel yoʼtan te Jehová ta stojolik (1 Sam. 1:​6-10; Job 29:​2, 4; Sal. 51:11).

2. ¿Machʼatik lek ilbilik yuʼun te Jehová?

² Te Biblia jamal ya yal te manchukme jmulawilotik ya xjuʼ te lek ya yilotik te Jehová. ¿Bin ya skʼan ya jpastik? Jaʼ te ya kakʼtik ta ilel te ay schʼuunel koʼtantik ta stojol te Jesucristo sok te ya kichʼtik jaʼ (Juan 3:16). Jich ya kakʼtik ta ilel ta komonsitil te sujtesojix koʼtantik ta swenta te jmultik sok te la kalbeytik ta jamal te Dios te ya jpasbeytik te skʼanojel yoʼtan (Hech. 2:38; 3:19). Te Jehová kʼax tseʼel yoʼtan ya yaʼiy sba te kʼalal ya jpastik spisil ini yuʼun ya kamigointik. Te Jehová lek ya yilotik sok ya yamigoinotik teme ya jpastik tulan yuʼun ya jkʼotestik ta pasel te bin jamal la kalbeytike (Sal. 25:14).

3. ¿Bintik jojkʼoyeletik ya kakʼbeytik sujtib ta artículo ini?

³ Pero, ¿bin yuʼun ay chaʼoxtul ya snopik te ma lek ya x-ilotik yuʼun te Diose? ¿Bintik-utʼil ya yakʼ ta ilel te Jehová te tseʼel yoʼtan ta jtojoltik? Sok ¿bin ya skoltayotik yuʼun ya schʼuun koʼtantik te lek ya yilotik te Jehová?

TE BIN YUʼUN AY MACHʼATIK YA YALIK TE MA LEK YA X-ILOTIK YUʼUN TE DIOSE

4, 5. ¿Bin ya skʼan ya schʼuun koʼtantik manchukme jich ya kaʼiytik te maʼyuk jkʼoplaltike?

⁴ Jteb ma jpisiltik ta jchʼiniltikto ayniwan jich kaʼiyojtik te maʼyuk jkʼoplaltike (Sal. 88:15). Jtul hermano te Adrián sbiil jich ya yal: «Spisil-ora jnopoj te maʼyuk jkʼoplal. Ya xjul ta koʼtan te kʼalal chʼinonto-a ya jkʼanbey-a te Jehová te yakuk xkuxin ta Nichimal Kʼinal te jfamilia, pero te ma snujpʼuk te ya xkuxinon tey-a te joʼone». Te Tony jich ya yal ta swenta te bin-utʼil chʼitesot yuʼun te smeʼ stat, te ma jaʼuk Testigoetik: «Maʼyuk bin-ora la yalbonik te kʼuxonik ta yoʼtan sok te tseʼel yoʼtanik ta jtojol. Jich ya kaʼiy te maʼyuk bin-ora ya xjuʼ kuʼun spasel te bin ya skʼanik ta jtojole».

⁵ Teme jich ya kaʼiytik te maʼyuk jkʼoplaltike, ya skʼan ya xjul ta koʼtantik te jaʼ la yikʼotik talel te Jehová ta lum yuʼun (Juan 6:44). Te Jehová ya yil te tʼujbil taleliletik kuʼuntik —manchukme ma jtatik ta ilel te joʼotike— sok ya snaʼ te bin-nix kileltik-ae (1 Sam. 16:7; 2 Crón. 6:30). Jich yuʼun, te kʼalal ya yalbotik te bayal jkʼoplaltike, ya skʼan ya jchʼuuntik (1 Juan 3:​19, 20).

6. ¿Bin-utʼil la yaʼiy sba te Pablo te kʼalal la snop ta swenta te muliletik la spase?

⁶ Ayniwan chaʼoxtul te joʼotik te jich ya kaʼiytik te bayalto jmultik ta swenta te bintik maba lek la jpastik te kʼalal mato jnaʼojbeytik sba-a te Jehová (1 Ped. 4:3). Ayniwan yantik hermanoetik te bayalix jaʼbil yakik ta yichʼel ta mukʼ te Jehová, pero yakikto ta spasel tulan ta stsalel te bin kʼayemik ta spasel-ae. Jaxan te jaʼate, ¿yatobal xkʼopoj awoʼtan yuʼun te amule? Teme jiche, yaniwan yakʼbat smukʼul awoʼtan te jichnix la yaʼiy sbaik-euk te j-abatetik ta namey kʼinal. Jich bitʼil te Pablo te kʼax oʼbol sba la yaʼiy ta skaj te bintik maba lek la spase (Rom. 7:24). Manchukme sujtesojix yoʼtan sok yichʼojix jaʼ-a, la yal te jaʼ pekʼelxan «ta stojol te yantik jpuk-kʼopetike» sok te jaʼ kʼaxto jmulawilxan-a te bitʼil spisil te jmulawiletike (1 Cor. 15:9; 1 Tim. 1:15).

7. ¿Bin ya xjuʼ ya schʼuun koʼtantik teme ya jsujtes koʼtantike?

⁷ Te jTatik te ay ta chʼulchan jamal yaloj te ya spasbotik perdón teme ya jsujtes koʼtantike (Sal. 86:5). Jaʼ yuʼun, teme ya jmel koʼtantik yuʼun te bintik maba lek la jpastike, ya xjuʼ ya schʼuun koʼtantik te ya spasbotik perdón te Jehová (Col. 2:13).

8, 9. ¿Bin ya xbajt skoltayotik ta yijkitayel snopel te maba tikʼuk-a te bintik ya jpastik ta stojol te Jehová?

⁸ Jpisiltik ya jkʼan ya kakʼbeytik te bin lek te Jehová. Pero maniwan ya xjuʼ kuʼuntik pasel ta skaj te ayix kaʼbilaltik o ta skaj jun tulan chamel. Jaʼ yuʼun, jichniwan ya kaʼiytik te ma tikʼuk-a te bintik ya jpastik yuʼun lek ya yilotik te Diose. Jtul hermana te Amanda sbiil jich ya yal: «Ya jnop te yuʼun lek te bin ya kakʼbey te Jehová ya skʼan te bayalxan te bin ya kakʼbey. Jaʼ yuʼun, baeltik ya jten jba ta spasel te bin ma xjuʼ kuʼune. Sok ‹te kʼalal ma xjuʼ kuʼun› spasel jich ya kaʼiy te maba tseʼel yoʼtan ta jtojol te Jehová jich te bin-utʼil maba tseʼel koʼtan ya kaʼiy jbae».

⁹ ¿Bin ya xbajt skoltayotik ta yijkitayel snopel te maba tikʼuk-a te bin ya jpastik ta stojol te Jehová? Juluk ta koʼtantik te ya xkʼot ta yoʼtan te bintik ya jpastik sok maba ya skʼanbotik te bin ma xjuʼ kuʼuntik spasel. Teme ya jpastik te ban kʼalal ya xjuʼ kuʼuntik ta stojol, chikan teme bayal o jtebnax, bayal skʼoplal ta yoʼtan. Jnop kaʼiytik ta swenta te j-abatetik ta namey te la yichʼik ta mukʼ sok spisil yoʼtanik te Jehová. Jich bitʼil te Pablo te tulan aʼtej, bayal kilómetro been sok la sjach bayal congregacionetik. Pero kʼot yorail te jelon te skuxlejal sok maba juʼix scholel skʼop Dios te bin-utʼil ta nailale. ¿Mabal tseʼelukix yoʼtan te Jehová ta swenta te jich la spase? Tseʼel yoʼtan. Te Pablo la spas te bintik ya xjuʼ yuʼun spasel sok akʼbot bendición yuʼun te Jehová (Hech. 28:​30, 31). Jaʼnix jich maba ya xjuʼ te pajal te bintik ya jpastik ta stojol te Jehová, pero te bin mukʼ skʼoplal ta yoʼtane jaʼ te bin yuʼun ya jpastike. Ta ora ini ya xbajt kiltik bintik-utʼil ya yakʼ kiltik te Jehová te tseʼel yoʼtan ta jtojoltik.

TE BINTIK-UTʼIL YA YAKʼBOTIK KILTIK TE JEHOVÁ TE TSEʼEL YOʼTAN TA JTOJOLTIK

10. ¿Bin-utʼil ya «yalbotik» te Jehová te tseʼel yoʼtan ta jtojoltike? (Juan 16:27).

¹⁰ Ta swenta te skʼop. Te Jehová ya smulan yakʼbeyel yil te j-abatetik yuʼun te kʼux ta yoʼtan sok te lek ya yiltiklane. Ta Biblia ya yalbey skʼoplal cheb buelta te banti te Jehová ya yalbey te sNichʼan te kʼux ta yoʼtan sok te lek ya yile (Mat. 3:17; 17:5). ¿Yabal amulan te ya yalbat te Jehová te tseʼel yoʼtan ta atojol-euke? Melelnix-a te Jehová maba ya skʼoponotik talel kʼalalto ta chʼulchan, pero ya skʼoponotik ta swenta te Biblia. Te kʼalal ya jkʼopontik te tʼujbil kʼopetik te la yalbey te Jesús te jnopojeletik yuʼune, jich ya kaʼiytik te jich yak yalbelotik-euk te Jehová (kʼopona Juan 16:27). Te Jesús la skʼayinbey ta lek te stalel te sTate. Jaʼ yuʼun, te kʼalal ya kiltik te Jesús la yalbey te jnopojeletik yuʼun te kʼux ta yoʼtan manchukme jmulawiletik, ya xjuʼ ya jnoptik te jaʼnix jich ya yalbotik-euk te Jehová (Juan 15:​9, 15).

11. Te kʼalal ya xkʼax pruebaetik ta jtojoltik, ¿bin yuʼun ma skʼan ya jnoptik te maba lek ya yilotikix te Diose? (Santiago 1:12).

¹¹ Ta swenta te bintik ya spas. Te Jehová ya skʼan ya skoltayotik, jaʼ yuʼun ya yakʼbotik te bin ya xtuun kuʼuntik ta jujun kʼajkʼal. Pero ay baeltik ma skom te ya xkʼaxotik ta tulan wokoliletik, jich bitʼil kʼax ta stojol te Job (Job 1:​8-11). Te kʼalal ya xkʼax pruebaetik ta jtojoltik, mame jnoptik te maba lek ya yilotikix te Diose, ya skʼan ya kakʼbeytik yil te Jehová te kʼux ta koʼtantik sok te ya smukʼulin koʼtantike (kʼopona Santiago 1:12). Sok te kʼalal yakotik ta kʼaxel ta tulan wokol,ya kiltik bin-utʼil ya skoltayotik sok ya yakʼ kiltik te skʼuxul yoʼtan yuʼun jich ya xjuʼ ya xkujch kuʼuntik te wokolile.

12. ¿Bin ya yakʼ jnoptik te bin kʼax ta stojol te Dimitri?

¹² Kiltik te bin kʼax ta stojol jtul hermano ta Asia te Dimitri sbiil. Te hermano ini chʼay te yaʼtel. Te bitʼil kʼax te uetik sok te ma la sta yaʼtel, la sta ta nopel te ya scholxan skʼop Dios yuʼun ya yakʼbey yil te Jehová te ya smukʼulin yoʼtane. Pero kʼax te uetik sok maba la sta yaʼtel, jaʼnix jich tsakot ta chamel te maba juʼix sjajchel ta swayib yuʼune. Ta patil jajch snop te maba lekil tatiluk sok te ma lekil mamalaliluk sok la snop te ma lek ya x-ilotix yuʼun te Jehová. Pero, ta jun ajkʼabal te schʼin yantsil snichʼan la spas imprimir te bin ya yal te Isaías 30:15 te jich ya yal: «Ta scuenta lamal-oʼtanil soc smucʼul-oʼtanil yac ata awipic». Ta patil la yakʼbey te spapa sok jich la yalbey: «Papi, te kʼalal ya amel awoʼtane, julukme ta awoʼtan te texto ini». Te Dimitri la sta ta ilel te jaʼnax ta swenta te Jehová te sfamilia ay skʼuʼ spakʼ, sweʼel sok te banti ya xnainik. Jich ya yal: «Te bin-nax ya skʼan ya jpase, jaʼ te lamaluk koʼtan sok te ya smukʼulin koʼtan te Diose». Teme jich yak ta kʼaxel ta atojol-euke, ya xjuʼ ya schʼuun awoʼtan te ya smel yoʼtan ta atojol te Jehová sok te ya yakʼbat awip yuʼun ya xkujch awuʼun te wokolile.

13. ¿Binxan-utʼil ya yalbotik te Jehová te lek ya yilotike?

¹³ Ta swenta te hermanoetik. Te Jehová ya xjuʼ ya stijbey yoʼtan te j-abatetik yuʼun swenta ya yalbotik kʼopiletik te ya xtuun kuʼuntik ta mero yorail. Jich kʼax ta stojol jtul hermana ta Asia. Te hermana ini chʼay te yaʼtel sok tsakot ta tulan chamel. Ta patil, te smamalal la spas tulan mulil sok la yichʼ lokʼesel ta anciano. Kʼax tulan te swokol te hermana sok jich la yal: «Ma xkʼot ta koʼtan bin yuʼun te jich yak ta kʼaxel ta jtojole. La jta ta nopel te ay bintik maba lek la jpas sok te maba lek ya yilonix te Jehová». Te hermana ini la skʼanbey te Jehová te yakuk x-akʼbot yil te kʼux aʼiybil sok jakʼbot skʼop yuʼun te Jehová. ¿Bin-utʼil? Te hermana jich la yal: «Te ancianoetik la skʼopononik sok la skoltayonik ta yilel te kʼuxon ta yoʼtan te Jehová». Ta patil la schaʼyalbey te Jehová te ya skʼan ya yil te ya xkoltayot yuʼune. ¿Bin kʼot ta pasel? Jich ya yal: «Ta kʼajkʼalnix-abi la stikunbonik jun carta te hermanoetik ta congregación. Te kʼalal la jkʼopone, jich la kaʼiy te la sjakʼbon jkʼop te Jehová». Jich te bin-utʼil ya kiltik, bayal buelta te bintik ya yalbotik te hermanoetik ya yakʼ ta ilel te lek ya yilotik te Jehová (Sal. 10:17).

14. ¿Binxan-utʼil ya stuuntes te Jehová te hermanoetik yuʼun ya yakʼ kiltik te lek ya yilotike?

¹⁴ Te Jehová jaʼnix jich ya yakʼ kiltik te lek ya yilotik te kʼalal ya stuuntes te hermanoetik yuʼun ya yakʼbotik consejo te kʼalal ya xtuun kuʼuntike. Jich bitʼil ta sbabial siglo, te Jehová la stuuntes te jpuk-kʼop Pablo yuʼun ya stsʼibay 14 cartaetik ta stojol te jchʼuunjeletik, te cartaetik-abi yichʼoj tulan consejoetik, pero jaʼnix jich ya yakʼ ta ilel kʼuxul oʼtanil. ¿Bin yuʼun te Jehová la stuuntes te Pablo ta yakʼel te consejoetik-abi? Melel te Jehová lek stalel, ay skʼuxul yoʼtan sok ya xtojobteswan «hich te bin utʼil tatil ya stojobtes te snichʼan te buen lec yoʼtan yuʼun» (Prov. 3:​11, 12). Jich yuʼun, teme ay machʼa ya yakʼbotik jun consejo sok te Biblia, mame skʼan ya jnoptik te maba lek ya yilotikix te Dios. Jich ya skʼan ya kiltik te kʼuxotik ta yoʼtane (Heb. 12:6). ¿Bintikxan ya yakʼ kiltik te lek ya yilotik te Jehová?

TE BINTIKXAN YA YAKʼ TA ILEL TE LEK YA YILOTIK TE JEHOVÁ

15. ¿Machʼatik ya yakʼbey te schʼul espíritu te Jehová, sok bin ya xjuʼ ya schʼuun koʼtantik?

¹⁵ Te Jehová ya yakʼbey te schʼul espíritu te machʼatik lek ya yile (Mat. 12:18). Ya xjuʼ jich ya jojkʼoybey jbatik: «¿Yabal kakʼ ta ilel ta jkuxlejal cheʼoxeb taleliletik yuʼun te chʼul espíritu?». Jich bitʼil, ¿yabal kakʼxan ta ilel lamal oʼtanil ta ora ini? Te kʼalal ya awil te ya awakʼ ta ilel te taleliletik yuʼun te sit te chʼul espíritu, ya xjuʼ ya schʼuun awoʼtan te tseʼel yoʼtan ta atojol te Jehová (ilawil te recuadro «Te sit te chʼul espíritu jaʼ…»).

16. Jich bitʼil ya yal 1 Tesalonicenses 2:​4, ¿machʼatik ya stuuntes te Jehová yuʼun ya scholik te lek yachʼil kʼop? Sok ¿bin yaʼiyel ya awaʼiy aba yuʼun?

¹⁶ Te Jehová ya yakʼbey schol te lek yachʼil kʼop te machʼatik lek yoʼtan ta stojole (kʼopona 1 Tesalonicenses 2:4). Te bin kʼax ta stojol jtul hermana te Jocelyn sbiil ya yakʼ ta ilel te jichnix-ae. Ta jun buelta jich la yaʼiy te maʼyuk bin ya xjuʼ ya spase. Jich ya yal: «Jich la kaʼiy te maʼyuk bin ya jkʼan ya jpas. Pero, te bitʼil ochemon ta precursora sok ya skʼan ya xlokʼon ta scholel skʼop Dios ta kʼajkʼal-abi, la jkʼopon te Jehová sok lokʼon». Ta kʼajkʼal-abi, te Jocelyn kʼopoj sok te Mary, jtul ants te lek yoʼtan te la skʼan la snop te Biblia. Cheʼoxeb u ta patil, te Mary la yalbey te Jocelyn te kʼalal kʼopoj sok ta sakubel kʼinal-abi, yak ta skʼoponel Dios-a ta skʼanel koltayel. ¿Bin la snop te Jocelyn ta swenta te bin kʼax ta stojole? Jich ya yal: «Jich la kaʼiy te la yalbon te Jehová ‹Lek koʼtan yuʼun te bin ya apase›». Melelnix-a, ma spisiluk te ants winiketik ya schʼam yaʼiyik te bin ya kalbeytike, pero ya xjuʼ ya schʼuun koʼtantik te tseʼel yoʼtan ya yaʼiy sba te Jehová te kʼalal ya yil te ya jpastik tulan yuʼun ya kalbeytik te yantik te lek yachʼil kʼop.

17. ¿Bin ya yakʼ jnoptik te bin la yal te Vicky ta swenta te stojol kolele? (Salmo 5:12).

¹⁷ Te Jehová ya yakʼbey kolel te machʼatik lek ya yile (1 Tim. 2:​5, 6). Pero, teme wokol ya kaʼiytik schʼuunel te lek ya yilotik te Jehová, manchukme ay schʼuunel koʼtantik ta swenta te stojol kolel sok te kichʼojtikix jaʼe, ya skʼan ya xjul ta koʼtantik te ma skʼan ya jchʼuuntik te bin ya yal te koʼtantik, jaʼ ya skʼan ya jchʼuuntik te bin ya yal te Jehová. Melel toj ya yil stukel te machʼa ay schʼuunel yoʼtan ta swenta te stojol kolel sok ya yakʼbey bendición (kʼopona Salmo 5:12; Rom. 3:26). Jtul hermana te Vicky sbiil bayal koltayot te la snopilan ta yoʼtan ta swenta te stojol kolel. Manchukme wokol ya yaʼiy schʼuunel te kʼux ya x-aʼiyot yuʼun te Jehová, jich la yal: «Te Jehová bayal tiempo la yakʼ ta ilel te ay slamalil yoʼtan ta jtojol [ . . . ]. Te kʼalal ay bin ma lek ya jnop, jich kʼoem te jich yakon ta yalbeyel te Jehová: ‹Ma staonix te skʼuxul awoʼtane. Te bitʼil la yakʼ sba ta lajel te aNichʼane ma tikʼuk-a yuʼun ya kichʼ pasbeyel perdón yuʼun te jmule›». Jich te bitʼil la spas te Vicky, teme ya jnopilantik ta swenta te stojol kolele, jaʼnix jich te joʼotik ya kaʼiytik te kʼuxotik ta yoʼtan te Jehová sok leknax ya yilotik.

18. ¿Bin ya skʼan ya schʼuun koʼtantik teme kʼux ta koʼtantik te jTatik te ay ta chʼulchan?

¹⁸ Manchukme ya jpastik tulan yuʼun ya jkʼotestik ta pasel te bin la jnoptikix ta artículo ini, ayniwan ya xchebaj koʼtantik sok ya jojkʼoybey jbatik teme lek ya yilotik te Jehová. Teme jich ya xkʼot ta pasel ta atojole, julukme ta awoʼtan te Dios lek ya yil «te machʼatik kʼux ya x-aʼiyot yuʼune» (Sant. 1:12). Jaʼ yuʼun noptsajanxan ta stojol te Jehová sok jaʼ xa awil te bin-utʼil ya yakʼbat awil te ay stseʼelil yoʼtan ta atojole. Sok mame xchʼay ta awoʼtan te Dios «maba namal ay ta jtojoltik ta jujuntul» (Hech. 17:27).