¿Mi jech chkiltik li yantik kʼuchaʼal chil Jeovae?
«Mu me svoqʼuilan sba li jbecʼtaltique, jech jmoj tsots scʼoplal chaʼay sba ta scotolic.» (1 COR. 12:25.)
1. ¿Kʼu yelan laj avaʼi aba kʼalal la och ta lekilal ta mantale?
¿MI XVUL ta joltik kʼu yelan laj kaʼi jbatik kʼalal laj jchʼak jbatik lokʼel li ta balumile xchiʼuk ti kʼalal lik jtsob jbatik xchiʼuk li steklumal Jeovae? Ta melel, li jmuyubaj van tajmek ti la skʼanutik li ermanoetike xchiʼuk ti la xkʼuxubinutike. ¡Toj jelel xvinaj li buchʼutik oyik ta slumal Satanase, yuʼun toj tsots stalelalik, toj chopolik xchiʼuk toj ven saʼik kʼop! Ta melel, ochemutik ta lekilal ta mantal ti bu naka lekilal xa oye xchiʼuk ti jun oyutike (Isa. 48:17, 18; 60:18; 65:25).
2. 1) ¿Kʼusi xuʼ tsokes ti kʼu yelan chkiltik li yantike? 2) ¿Kʼusi van skʼan jpastik?
2 Pe kʼelavil, kʼalal jelav xaʼox kʼuk sjalile yikʼaluk van chopol xa lik kiltik li ermanoetike. Ta skoj ti naka jpas mulilutike, yikʼaluk van jaʼ xa lik jpitanbetik lek satilal li kʼusi mu lekuk tspasike, ti jaʼ muʼyuk xa bu ta jkʼeltik li slekil talelalik ta mantale. Ta yan smelolal xkaltike, yikʼaluk van muʼyuk xa bu jech chkiltik kʼuchaʼal chil Jeovae. Mi jech chkʼot ta jtojolaltik junuk veltae, kakʼ me kipaltik sventa jechuk jkʼeltik kʼuchaʼal ch-ilatik yuʼun Jeovae (Éxo. 33:13).
¿Kʼu yelan chil Jeova li kermanotaktike?
3. ¿Kʼusi xkoʼolaj-o li stsobobbail yajtsʼaklomtak Cristo jech kʼuchaʼal chal li Tsʼibetike?
3 Li ta 1 Corintios 12:2-26, li jtakbol Pabloe tskoʼoltas ta bekʼtalil ti «ep ta chop stsacoj sba» li yajtsʼaklomtak Cristo ti chbatik ta vinajele. Jech kʼuchaʼal ti jelajtik li kʼusitik yuʼun jbekʼtaltike, jaʼ me jech ek li yajtsʼaklomtak Cristo ta tsobobbaile jelel kʼuyelanik xchiʼuk jelel ti kʼusi xtojobik spasele. Pe lek chil Jeova ti jelajtike. Li stuke skʼananoj xchiʼuk oy sbalil chil li buchʼutik ta tsobobbaile. Jaʼ yuʼun, chalbutik Pablo ti jmojuk tsots jkʼoplaltik chkaʼi jbatik jkotoltike. Akʼo mi jech, jnaʼojtik onoʼox ti vokol ta chʼunel chkaʼitik bateltik li tojobtasel taje, mas to ti kʼalal mu xkoʼolaj tajmek jtalelaltik xchiʼuk li ermanoe.
4. ¿Kʼu yuʼun skʼan van jel jtalelaltik ta sventa ti kʼu yelan chkiltik li ermanoetike?
4 Jech kʼuchaʼal laj xa kaltike, yikʼaluk van lek tajmek xkaʼitik skʼelel li kʼusi mu lekuk tspas ermanoetike. Taje jaʼ me xkoʼolaj kʼalal ta jtunestik jun kamara ti ta nopol tajmek ta jkʼeltik li jun krixchanoe: ti jutuk tajmek ta jtatik ta kʼelele. Pe li Jeovae mu jechuk tspas, jamal tajmek sat skamara tskʼel-o li krixchanoetike, sventa jech lek chil ta sjunul li krixchanoe xchiʼuk li kʼusi oy ta spat xokone. Tan yan kʼop xkaltike, yikʼaluk van jaʼ noʼox ta jkʼeltik ti kʼusi muʼyuk lek chkiltike, yan li Jeovae sjunul skʼeloj li krixchanoe, tskʼelbe li slekil talelaltak noxtoke. Jaʼ yuʼun chaʼa, kakʼbetik me yipal ta xchanbel stalelal li Jeovae, yuʼun me jaʼ jech ta jkolta jbatik ti oyuk kʼanbaile xchiʼuk ti jmojuk oyutik li ta tsobobbaile (Efe. 4:1-3; 5:1, 2).
5. ¿Kʼu yuʼun mu lekuk ti jtikʼbetik smul o jchapantik li yantike?
5 Li Jesuse snaʼoj onoʼox ti lek xkaʼitik xi jloʼiltavan li jpas mulil krixchanoutike. Jaʼ yuʼun xi tojobtasvane: «Mu me xaticʼbe smul achiʼilic, yuʼun jech mu xavichʼ ticʼbel amulic yuʼun Dios ec», xi (Mat. 7:1). Jech kʼuchaʼal chal li ta kʼop laj yichʼ tsʼibaele, li Jesuse maʼuk noʼox laj yal «mu me xaticʼbe smul achiʼilic», jech kʼuchaʼal jelubtasbil li ta Vivlia ta tsotsile. Moʼoj, yuʼun xi laj yale: «Mu xa xa tikʼbe smul achiʼilik», xi; yuʼun snaʼoj ti ep nopem xaʼi xloʼiltavanik li buchʼutik te ch-aʼibat skʼope. ¿Mi jech xa nopem xkaʼitik ek? Mi jaʼ jeche, kakʼbetik me yipal sventa jel li jtalelaltike yoʼ jech mu xkichʼtik chapanel ek. Ta melel, ¿buchʼu yakʼoj kabteltik ta xchapanel junuk ermano ti yichʼoj yabtel chtunesat yuʼun Jeovae, o ti chkaltik ti mu xa staʼo te oy ta tsobobbail junuk ermanoe? Yikʼaluk van oy jutuk xchopolil li jun ermanoe, pe ¿kʼu yuʼun ta jpʼajtik mi jech kʼanbil-o yuʼun Jeovae? (Juan 6:44.) ¿Mi yuʼun muʼyuk jchʼunojtik ti jaʼ tsbeiltas s-organisasion li Jeovae chaʼa xchiʼuk ti jaʼ tstukʼibtas ta yorail mi oy kʼusi skʼan tukʼibtasel chile? (kʼelo Romanos 14:1-4.)
6. ¿Kʼusi tskʼelbe yajtuneltak li Jeovae?
6 Li Jeovae xojtikinutik ta jujuntal ti bu xa kʼalal chʼiemutik ta mantal avie. Jech noxtok, toj labal sba ti bu to kʼalal xkʼot sate, yuʼun xil ti kʼusi spas yuʼun li yajtuneltak ta mas jelavele, jaʼ xkaltik, ti kʼusi spas kuʼuntik ta jujuntal kʼalal mi jta xaʼox jtukʼilaltik li ta achʼ balumile. Jaʼ yuʼun chaʼa, maʼuk chakʼ ta yoʼonton li kʼusi mu lekuk ta jpastike. Jech kʼuchaʼal chalbutik ta Salmo 103:12 «batsʼi nom la sjip loqʼuel ta stojol li jmultique, jech chac cʼu chaʼal nom xil sbaic li sloqʼuem cʼacʼal xchiʼuc smaleb cʼacʼale». ¡Koliyal tajmek chkalbetik ta sventa taje! (Sal. 130:3.)
7. ¿Kʼusi ta jchantik ti kʼu yelan laj yil David li Jeovae?
7 Li Tsʼibetike chalbutik ti xtojob tajmek ta yakʼel venta Jeova ti jaʼ noʼox tskʼel li kʼusitik lek tspas li krixchanoe. Jech kʼuchaʼal xi albat skʼoplal li Davide: «Li cajtunel David ti scotol yoʼnton laj xchʼun li jmantaltaque, ti jaʼ noʼox la stsʼaclinune. Puru lec cʼusitic la spas ta jtojol», xi (1 Rey. 14:8). Jech kʼuchaʼal jnaʼojtik leke, ep la spas smul li Davide. Pe laj yakʼ venta Jeova ti tukʼ li yoʼontone, vaʼun jaʼ la stsakbe ta mukʼ li slekil talelaltake (1 Cró. 29:17).
Jechuk xkiltik li ermanoetik kʼuchaʼal chil Jeovae
8, 9. 1) ¿Bu ti xuʼ jchanbetik stalelal Jeovae? 2) ¿Kʼusi xuʼ jkoʼoltastik-o, xchiʼuk kʼusi chakʼ jchantik?
8 Li voʼotike mu xkiltik li kʼusi oy ta yut oʼontonale, pe li Jeovae xil. Taje jaʼ onoʼox me jun slekil rasonal sventa mu jchapantik li jchiʼiltaktike. Li voʼotike mu jnaʼtik skotol li kʼusi oy ta yoʼonton yantike. Jaʼ yuʼun chaʼa, skʼan xkakʼ kipaltik sventa jchanbetik stalelal Jeova, ti maʼuk xkakʼ ta koʼontontik li xchoplejal krixchanoetike, yuʼun ta xchʼay batel ta sjalil. ¿Mi mu lekuk ti jech jpastike? Jaʼ me jech ta jkolta jbatik lek ti oyuk lekilal xchiʼuk li ermanoetike (Efe. 4:23, 24).
9 Jkoʼoltastik. Jnoptik ta jpʼej na ti sokem xa tajmeke: yakal xa tstsʼuj li skanalil voʼ ta jolnae, vokʼemik li sventanaile xchiʼuk ch-och xa voʼ li ta jol nae. Jutuk mu skotoluk li krixchanoetike jaʼ tskʼelik ti toj lajem xa li nae xchiʼuk tsnopik ti jaʼ lek chichʼ jinesele. Pe tal jun krixchano ti jelel tajmek snopbene. Li stuke maʼuk noʼox tskʼelbe li spat xokone, chakʼ venta ti tsotsik to li stsʼamteʼaltak xchiʼuk li yoyaltake, jaʼ yuʼun tsnop ti stakʼ to meltsanele. Vaʼun la sman li nae xchiʼuk tsots laj yakʼ yipal sventa tsmeltsanbe li spat xokon ti bu sokemike, vaʼun lek xa tajmek ta kʼelel. Kʼalal te ch-echʼ li krixchanoetike, chalik ti toj lek li nae. ¿Mi xuʼ jech jpastik kʼuchaʼal li krixchano ti laj yakʼ yipal ta smeltsanel li nae? ¿Mi xuʼ jaʼ jkʼelbetik li slekil talelal kermanotaktike xchiʼuk ti xuʼ to xchʼiik mas ta mantale, ti maʼuk ta jkʼeltik li kʼusi mu lekuk tspasike? Mi jech ta jpastike, jaʼ me chlik jkʼantik-o ti kʼupil sba stalelalik ta mantal jech kʼuchaʼal tspas Jeovae (kʼelo Hebreos 6:10).
10. ¿Kʼuxi tskoltautik li tojobtasel ta Filipenses 2:3, 4?
10 Li jtakbol Pabloe laj yakʼbe jun tojobtasel li jnaklometik ta Filipos ta sventa ti kʼuyelan xuʼ lek xil sbaik skotolik li ta tsobobbaile. Xi laj yale: «Mu me cʼusi xapasic ta sventa yuʼun chacʼan chatsalvanic, xchiʼuc ta sventa chatoy abaic. Biqʼuit xavacʼ abaic, oyuc me stu ta avoʼntonic ec li achiʼilique. Mu me jaʼuc noʼox xbat asat ta aventa atuquic, acʼo oyuc ta avoʼntonic noxtoc li yantique», xi (Fili. 2:3, 4). Kʼalal bikʼit chkakʼ jbatike jaʼ me jech lek jtalelaltik ta stojolal li kermanotaktike. Mi oyik ta koʼontontike xchiʼuk mi jaʼ ta jkʼelbetik li slekil talelalike, jaʼ me kʼun chkaʼitik ti jechuk xkiltik kʼuchaʼal chil Jeovae.
11. ¿Kʼusi ti jelem ta epal tsobobbailetike?
11 Li kʼusitik chkʼotanuk ta pasel ta spʼejel balumil li ta slajebal xa kʼakʼale, sujoj epal krixchanoetik ti akʼo xbatik ta yan balumile. Ti kʼusi kʼotem ta pasel ta jlom lum ta skoj taje, jaʼ ti oy ep krixchanoetik ti ta yantik lumetik likemike. Ep li krixchanoetik taje ayanem xa ta yoʼontonik li mantale, vaʼun yakal xa xichʼik ta mukʼ Jeova jchiʼuktik. Ta melel, jaʼ krixchanoetik ti «liquemic tal ta jujun banamil, ta jujuchop stsʼunubalic, ta jujun lum, xchiʼuc ta jujuchop cʼop» (Apo. 7:9). Ti kʼusi kʼotem ta pasel ta tsobobbaile jaʼ ti ep xa ta tos krixchanoetike.
12. ¿Kʼu yelan skʼan jtalelaltik ta stojolal li kermanotaktike, xchiʼuk kʼu yuʼun ti tsots bateltike?
12 Ta skoj ti jech taje, yikʼaluk van mas skʼan xkakʼ kipaltik ti lekuk jtalelaltik ta stojolal li kermanotaktik ta jtsobobbailtike. Mu me xchʼay ta joltik ti xi chalbutik li jtakbol Pedroe: «Jech acʼanojic xa scotol li quermanotactique mu nacauc noʼox chavalic» xchiʼuk «scotoluc me avoʼnton cʼanano aba acotolic», xi (1 Ped. 1:22, Achʼ Testamento, ta skʼop Chenalhó [ATC]). Pe ti kʼusi melele jaʼ ti vokol chkaʼitik chi jkʼanvan xchiʼuk ti lek chi j-ilvan ta melel kʼalal oy ep ta chop krixchanoetike. Yuʼun yikʼaluk van mu xkoʼolaj li kʼusitik nopem xkaʼitik xchiʼuk li kʼusi nopem xaʼiik jlom ermanoetike, jelel li stsʼunbalike, li kʼuyelan chanubtasbilike xchiʼuk ti kʼuyelan oyik ta takʼine. ¿Mi vokol chavaʼi ti kʼalal jelel kʼusi tsnopike xchiʼuk ti kʼusi tspasike? Yikʼaluk van jech chaʼiik ta atojolal ek. Kʼuk yelanil, jtekeltik xi chkichʼtik albel mantale: «Cʼanic me scotol li quermanotactique», xi (1 Ped. 2:17, ATC).
13. ¿Kʼu yuʼun ti yikʼaluk van skʼan jeltik li kʼusi ta jnoptike?
13 Yikʼaluk van skʼan jel jnopbentik sventa lek jamal koʼontontik ta skotol li kermanotaktike (kʼelo 2 Corintios 6:12, 13). Oy jlome xi chalike: «Mu yuʼunuk chopol chi kʼopoj ta stojolal, pe...», vaʼun chalik li kʼusitik staleltik onoʼox chkʼot ta pasele, ti chal noʼox la stukike jaʼ la jech tspasik jtos krixchanoetik ti yan-o stsʼunbalike. ¿Mi oy jech kʼotem ta jtojolaltik taje? Mi jeche jaʼ skʼan xal ti tsʼunul to ta koʼontontik jutuk ti chopol chi jkʼopoj ta stojolal ti buchʼu muʼyuk to kojtikinojtike. Lek ti xi jakʼbe jbatike: ¿Mi chkakʼ persa ti akʼo xkojtikin mas li krixchanoetik ti yan-o kʼusi nopem xaʼiike? Mi jech ta jkʼel lek ti kʼuyelan li koʼontontike, yikʼaluk van mas kʼun chkaʼitik ti jchʼamtik li ermanoetik ti yan-o kʼusi nopem xaʼiike xchiʼuk ti akʼo jkʼantike.
14, 15. 1) Albo skʼoplal li krixchanoetik ti la sjel snopbenik ta stojolal yantike. 2) ¿Kʼuxi xuʼ jchanbetik li stalelalike?
14 Li ta Vivliae ta jtabetik ep skʼoplal krixchanoetik ti la sjel snopbenike. Jvules ta joltik li jtakbol Pedroe. Ta skoj ti jaʼ judioe, mi jaʼuk onoʼox van bu oy ta yoʼonton stuk ti ch-och ta sna junuk krixchano ti maʼuk judioe. Jnoptik noʼox avaʼi kʼuyelan laj yaʼi sba kʼalal laj yichʼ albel ti akʼo xbat svulaʼan Cornelioe, ti maʼuk judío xchiʼuk ti muʼyuk yichʼoj sirkunsisione. Akʼo mi jech, la sjel snopben kʼalal laj yakʼ venta ti jaʼ jech tskʼan Dios ti stekeluk krixchanoetik x-ochik li ta tsobobbaile (Hech. 10:9-35). Li Saulo ti ikʼot ta jtakbol Pabloe, la sjel li snopben eke xchiʼuk ti chchopol kʼopta toʼox li buchʼu mu xojtikine. Laj yakʼ venta stuk ti la spʼaj toʼox ta jyalel li yajtsʼaklomtak Cristo kʼalal muʼyuk toʼox jeleme, jaʼ yuʼun xi chale: «Toj echʼem toʼox laj cutsʼinta li steclumal Diose; oy ta coʼnton chcules ox scotol», xi. Pe kʼalal laj yichʼ tukʼibtasel yuʼun li Kajvaltik Jesuse, toj ep kʼusitik jel ta stalelal xchiʼuk lik xchʼunbe smantal li buchʼutik toʼox chutsʼintae (Gál. 1:13-20).
15 Ta melel, stakʼ jel jnopbentik ta skoltaobba xchʼul espiritu Jeova. Jaʼ yuʼun chaʼa, mi chkiltik ti ta to jchopol kʼoptatik li buchʼu muʼyuk to kojtikinojtike, kakʼ kipaltik sventa jlokʼes ta koʼontontik taje, vaʼun «jech chac cʼu chaʼal la [spasutik] ta jun li Chʼul Espiritue junuc [koʼontontik] ta sventa ti lijpasutic xa ta jun jcotoltique» (Efe. 4:3-6). Xi chal li Vivliae: «Oyuc ta avoʼntonic o li cʼanvaneje, yuʼun jaʼ mero jpasvanej ta jun», xi (Col. 3:14).
Jechuk jtalelaltik kʼuchaʼal Jeova li ta chol mantale
16. ¿Kʼusi tskʼan Jeova ta sventa li krixchanoetike?
16 Xi la stsʼiba li jtakbol Pabloe: «Li Diose muc tʼujbiluc noʼox tspas», xi (Rom. 2:11). Li kʼusi tskʼan Jeovae jaʼ ti x-ichʼat ta mukʼ yuʼun li krixchanoetik ta skotol li balumile (kʼelo 1 Timoteo 2:3, 4). Jaʼ yuʼun laj yal ti akʼo yichʼ cholel li «Lequil Aʼyej sventa sbatel osil [...] ta jujun banamil, ta jujuchop stsʼunubalic, ta jujuchop cʼop, xchiʼuc ta jujun lum» (Apo. 14:6). Xi laj yal li Jesús eke: «Li osile jaʼ scotol li banamile», xi (Mat. 13:38). ¿Kʼusi skʼan xal ta atojolal xchiʼuk ta stojolal avutsʼ avalal li kʼusi laj kaltike?
17. ¿Kʼuxi xuʼ jkoltatik skotol li jeltos krixchanoetike?
17 Mu jtekeltikuk xuʼ kuʼuntik xi jbat ta namal balumil sventa chbat jcholtik li lekil aʼyej sventa Ajvalilal yuʼun Diose. Pe yikʼaluk van xuʼ xbat kalbetik lekil aʼyej li krixchanoetik ti likemik talel ta yantik balumil ti te nakalik bu ta jcholtik mantale. ¿Mi ta onoʼox jcholbetik mantal skotol li jeltos krixchanoetik ti kʼalal staʼo chkiltike, ti maʼuk noʼox li buchʼu ta onoʼox jcholbetik mantal leʼ xa tal jayibuk jabile? ¿Kʼu yuʼun mu xbat jsaʼtik li buchʼutik muʼyuk to yichʼojik lek cholbel mantale? (Rom. 15:20, 21.)
18. ¿Kʼuxi laj yakʼ ta ilel Jesús ti skʼanoj li krixchanoetike?
18 Li Jesuse oy onoʼox tajmek ta yoʼonton chcholbe mantal skotol li krixchanoetike, jaʼ yuʼun mu ta junuk noʼox lum la xchol. Jech kʼuchaʼal chal jun loʼil ta Vivliae «ixanov ta scotol lumetic xchiʼuc ta jujun tsobtsobnaetic». Jech noxtok «cʼalal laj yil Jesús ti ep cristianoetic te stsoboj sbaique, toj abul sbaic laj yil» xchiʼuk laj yal ti skʼanik koltaele (Mat. 9:35-37).
19, 20. ¿Kʼu yelan chkakʼbetik yil stekel krixchanoetik ti kʼanbilik yuʼun Jeova xchiʼuk Jesuse?
19 ¿Kʼuxi xuʼ xkakʼtik ta ilel ek li kʼanelal taje? Oy jlom jchol mantaletike yakal chcholik mantal ti bu mu nopolikuk chichʼ cholel mantal li ta yosilal chol mantal yuʼunike, jech kʼuchaʼal liʼe, ta pʼolmajebaletik, ta parke, ta terminal o ta yochebal mukʼtik naetik ti bu vokol xuʼ xi j-oche. Li yantik noxtoke yakʼoj yipalik xchanel yan kʼop sventa chalbeik mantal li krixchanoetik ti yan-o stsʼunbalik ti te nakalik bu chcholik mantale, o jaʼ li buchʼutik muʼyuk to yichʼojik lek cholbel mantale. Chkakʼtik ta ilel ti oyik tajmek ta koʼontontik li krixchanoetik kʼalal ta jkʼopontik ta skʼop stukike, manchuk mi jpʼel-chaʼpʼel noʼox ti kʼusi xkalbetike. Melel onoʼox ti mu jtekeltikuk xchan kuʼuntik yan kʼope, pe ¿mi stakʼ van jpatbetik yoʼonton li ermanoetik ti buchʼutik yakalik xchanele? Li kʼusi mu stakʼ jpastik ta jyalele jaʼ ti jchibajesbetik yoʼontonike o ti jakʼilantik kʼu yuʼun tskʼan chcholbeik mantal li krixchanoetik ti yan lum bu likemik tale. Kʼux chaʼibe xkuxlejal stekel krixchanoetik li Jeovae, jaʼ yuʼun jaʼ jech skʼan jpastik ek (Col. 3:10, 11).
20 Mi jech chkiltik li krixchanoetik kʼuchaʼal chil Jeovae, ta me xkalanbetik mantal, kʼuuk yelanil ti xkuxlejalike o ti kʼusi chkʼot ta pasel ta xkuxlejalike. Parejo ta jcholbetik mantal, ta jtsaktik ta venta li buchʼutik chʼabal snaike, li buchʼutik mu lekuk ta kʼelel spat xokone o ti buchʼu ojtikinbil kʼuchaʼal jmulivajele. Jech xtok, mi oy junuk buchʼu chopol kʼusi tspasbutike muʼyuk me chkaltik ti jech yelan skotol li krixchanoetik ti bu slumal o stsʼunbal li buchʼu chopol kʼusi la spasbutike. Jlom krixchanoetike chopol kʼusi la spasbeik li Pabloe, pe muʼyuk bu xikta xcholbel mantal li krixchanoetik ti te likemik talel eke (Hech. 14:5-7, 19-22). Spatoj yoʼonton ti ta onoʼox xaʼiik jlomuk krixchanoetik li mantale.
21. ¿Kʼusi sbalil chatabe ti jech chavil li yantik kʼuchaʼal chil Jeovae?
21 Ta melel, skʼan me lek xkiltik skotol li ermanoetike, mi ta jlumaltik likemik o mi moʼoj: skʼan jech xkiltik kʼuchaʼal chil Jeovae. Kʼalal mas ta jchanbetik ta sventa taje, mas me ta jkolta jbatik ti oyuk lekilale xchiʼuk ti jmojuk oy li tsobobbaile. Jaʼ me jech skʼan jkʼeltik ek li krixchanoetik bu ta jcholtik mantale. Jaʼ me jech lek chapalutik sventa jkoltatik ti akʼo skʼanik Jeova, li Dios ti «muʼyuc tstʼuj bochʼo chcʼuxubin[e]» xchiʼuk ti lek chil skotol krixchanoetike. Oy ta yoʼonton skotol li krixchanoetike, «yuʼun jaʼ spasoj scotol» (Job 34:19).
¿Kʼusi cha takʼ?
• ¿Kʼusi ti xuʼ chopol xlik kiltik ta stojolal li ermanoetike?
• ¿Kʼu yelan xuʼ xkiltik li ermanoetik jech kʼuchaʼal chil Jeovae?
• ¿Kʼusi laj achan ta sventa ti kʼu yelan skʼan jnopbentik ta stojolal li ermanoetik ti yan-o balumil likemik tale?
• ¿Kʼu yelan xuʼ xkiltik li krixchanoetik bu ta jcholtik mantal jech kʼuchaʼal chil Jeovae?
[Lokʼol ta pajina 26]
¿Kʼuxi xuʼ xkojtikintik lek li krixchanoetik ti yan-o kʼusi nopem xaʼiike?
[Lokʼol ta pajina 28]
¿Kʼusi xuʼ jpastik sventa xaʼiik ep krixchanoetik li lekil aʼyeje?
[Lokʼol ta pajina 29]