¿Mi yakal chavichʼik makʼlinel «ti cʼalal yorail» ta xaveʼike?

KUXULUTIK ta jun kʼakʼal ti toj tsots ta ichʼel batel li kuxlejale, taje muʼyuk jech ilbil-o (2 Tim. 3:1-5). Ta skoj li kʼanelal oy kuʼuntik ta stojolal li Jeovae xchiʼuk ti jpʼel koʼontontik jech chijkuxiutik kʼuchaʼal chal li tukʼil mantaletik yuʼune, jaʼ chakʼutik ta preva jujun kʼakʼal. Li Jesuse yaloj xa onoʼox ta sventa li kʼakʼal ti tsots ta ichʼel batele, xchiʼuk laj yalbe yajtsʼaklomtak ti tstaik patbel yoʼontonik sventa xkuch yuʼunik kʼalal to ta slajebal li kʼakʼale (Mat. 24:3, 13; 28:20). Sventa tstsatsubtasbe yoʼontonike la stʼuj jtsop krixchanoetik sventa «smacʼlin xchiʼiltac ta abtel ti cʼalal yorail ta xveʼique» (Mat. 24:45, 46).

Kʼalal jaʼo laj yichʼ akʼbel yabtel ta 1919 kʼalal to avi li j-abtel ti tukʼ yoʼontone, ta smiyonal xa noʼox «xchiʼiltac ta abtel» ti jeltos skʼopojelike stsoboj xa sbaik talel ta s-organisasion Dios xchiʼuk yakal chichʼik makʼlinel ta mantal (Mat. 24:14; Apoc. 22:17). Pe akʼo mi jech, mu skotoluk oy ta skʼopik li vunetike, xchiʼuk mu skotoluk krixchanoetik xuʼ skʼelik li vunetik ti jaʼ noʼox xuʼ skʼelik ta komputadora o ta yan kʼusitike. Jech kʼuchaʼal liʼe, ep chʼabal videoetik yuʼunik xchiʼuk li kʼusitik yichʼoj lokʼesel ta jpajinatik ta jw.org ti jaʼ noʼox te chichʼ taele. ¿Mi jaʼ van skʼan xal ti oy junantik mu staik veʼlil ta mantal sventa lekuk oyike? Sventa lekuk xtakʼ kuʼuntike, jkʼeltik stakʼobiltak li chanib sjakʼobiltak liʼe.

1. ¿Kʼusi li mas tstunes Jeova sventa chakʼbutik li veʼlil ta mantale?

Kʼalal laj yakʼ ta preva Jesús li Satanás sventa skʼatajes ta vaj li tonetike xi laj yal li Jesuse: «Muc ta vajuc noʼox ta xcuxi li cristianoe. Jaʼ ta xcuxi ta sventa scotol li scʼop chlocʼ ta ye Diose» (Mat. 4:3, 4). Li kʼusi chal li Jeovae te tsakal ta Vivlia (2 Ped. 1:20, 21). Jaʼ yuʼun, li kʼusi mas tstunes sventa tsmeltsan li jveʼeltik ta mantale jaʼ li Vivliae (2 Tim. 3:16, 17).

Li s-organisasion Jeovae spasoj li Traducción del Nuevo Mundo de las Santas Escrituras ti oy xa pasbil ta sliklejal o jvokʼ noʼox ta mas ta 120 kʼopetik xchiʼuk jujun jabil mas xa chichʼ pasel. Jech xtok, yichʼoj lokʼesel yan Vivliaetik, ta sbiyonal xa noʼox lokʼesbil skopiail ti oy xa pasbil ta sliklejal o jvokʼ noʼoxe xchiʼuk ta smilal xa noʼox kʼopetik lokʼem. Li kʼusi labal sba chkʼot ta pasele jaʼ jech kʼuchaʼal tskʼan li Jeovae: «Yuʼun li stuque tscʼan ti acʼo coluc scotol cristianoetique, xchiʼuc ti acʼo lic yotquinic li cʼusi melele» (1 Tim. 2:3, 4). Ta skoj ti «muʼyuc cʼusi pasbil ti xuʼ nacʼal chcom» ta stojolal li Jeovae, jnaʼojtik lek ti jaʼ chikʼ talel Jeova li krixchanoetike xchiʼuk ti jaʼ chakʼbe li kʼusi «chtun yuʼunik [ta] mantale» (Heb. 4:13; Mat. 5:3, TNM; 5:6; Juan 6:44; 10:14).

2. ¿Kʼusi yabtel tspas li jvuntik ta sventa li yakʼel veʼlil ta mantale?

Sventa xchʼi lek xchʼunel yoʼonton li jun krixchanoe, maʼuk noʼox skʼan skʼel li Vivliae, yuʼun skʼan xaʼibe smelolal li kʼusi yakal tskʼele xchiʼuk ti xakʼ ta xkuxlejal li kʼusi yakal chchane (Sant. 1:22-25). Jun eunuco vinik ti likem ta Etiopiae toj tsots skʼoplal laj yil taje. Li stuke jaʼo yakal tskʼel Skʼop Dios kʼalal xi jakʼbat yuʼun li Felipee: «¿Me chavaʼibe smelol li cʼusi chaqʼuele?». Xi takʼav li eunucoe: «¿Cʼuxi xuʼ chcaʼibe smelol, yuʼun muʼyuc bochʼo chiyalbun caʼay?» (Hech. 8:26-31). Li Felipee la skolta eunuco sventa oyuk lek yojtikinobil yuʼun ta sventa li Skʼop Diose. Li eunucoe jaʼ tijbat yoʼonton li kʼusi la xchane, jaʼ yuʼun laj yichʼ voʼ (Hech. 8:32-38). Jaʼ jech ek li vunetik lokʼemik ta Vivliae tskoltautik ta yaʼiel smelolal li kʼusitik melel chal ta Vivliae. Kʼotem ta koʼontontik xchiʼuk stijoj koʼontontik sventa xkakʼ ta jkuxlejaltik li kʼusi la jchantike (Col. 1:9, 10).

Koliyal li vunetike, li yajtuneltak Jeovae ep kʼusitik slajesik xchiʼuk chuchʼik ta sventa mantal (Is. 65:13). Jech kʼuchaʼal Li Jkʼel osil ta toyole oy xa mas ta 210 kʼopetik yichʼoj lokʼesel, te chal albil kʼopetik ta Vivlia, te chakʼ kaʼitik yaʼiobil kuʼuntik meleletik ta mantal ti tsotsik ta aʼiele xchiʼuk tstij koʼontontik ti xkakʼ ta jkuxlejaltik li beiltaseletik ta Vivliae. Li revista ¡Despertad!, te van ta 100 kʼopetik yichʼoj lokʼesel, chakʼ kojtikintik mas ta sventa li kʼusitik spasojan li Jeovae xchiʼuk chakʼbutik ta ilel kʼuxi xuʼ xkakʼ ta jkuxlejaltik li tojobtaseletik ta Vivliae (Prov. 3:21-23; Rom. 1:20). Li j-abtel ti tukʼ yoʼontone, ¡chakʼ vunetik ti lokʼemik ta Vivlia ti mas xa ta 680 kʼopetike! ¿Mi chachʼakbe yorail jujun kʼakʼal sventa chakʼel li Vivliae? ¿Mi chakʼel skotol li achʼ revistaetik chlokʼe xchiʼuk li achʼ vunetik chlokʼ jujun jabil ta akʼope?

Maʼuk noʼox vunetik tslokʼes, yuʼun li s-organisasion Jeovae chchapan mantaletik ti lokʼemik ta Vivlia sventa xichʼ alel li ta jtsobajeltike xchiʼuk li ta mukʼtik tsobajeletike. ¿Mi chakʼupin yaʼiel li mantaletik, li dramaetik, ti chichʼ akʼel ta ilel skʼelobil cholmantal xchiʼuk li buchʼutik chichʼ jakʼbel sloʼilik li ta tsobajeletik taje? ¡Melel onoʼox ti epal veʼlil ta mantal chakʼbutik li Jeovae! (Is. 25:6.)

3. Mi chʼabal ta akʼop skotol li vunetik yichʼoj lokʼesele, ¿mi jaʼ van skʼan xal ti chavil avokol ta viʼnale?

Taje mu jechuk. Mu me labaluk sba xkiltik ti junantik yajtuneltak Jeovae xuʼ van jaʼ mas oy ep veʼlil ta mantal yuʼunik, ti jaʼ mu sta li yantike. ¿Kʼu yuʼun? Jnoptik ta stojolal li jtakboletike. Li stukike laj yichʼik mas chanubtasel ti jaʼ mu sta li yan yajtsʼaklomtak Cristo ta baʼyel sigloe (Mar. 4:10; 9:35-37). Akʼo mi jech, li yan yajtsʼaklomtak Cristoe muʼyuk laj yil svokolik ta viʼnal ta mantal, yuʼun akʼbatik li kʼusitik chtun yuʼunike (Efes. 4:20-24; 1 Ped. 1:8).

Lek ti jkʼeltik xtok ti ep li kʼusitik laj yal xchiʼuk la spas Jesús liʼ ta Balumile, muʼyuk laj yichʼ tsʼibael komel li ta Evanjelioetike. Li jtakbol Juane xi la stsʼibae: «Oy to cʼusitic yan ep la spas li Jesuse. Ti xquechetuc laj yichʼ tsʼibael ta vun scotole, ta jnop ti mu xlaj ochuc ta banamil yepal vunetic ti jechuque» (Juan 21:25). Akʼo mi mas ep kʼusitik snaʼojik ta stojolal Jesús li yajtsʼaklomtak ta baʼyel sigloe, maʼuk skʼan xal ti mu kʼusi jnaʼtike. Li Jeovae skʼeloj lek ti lekuk jnaʼojtik ta sventa Jesús yoʼ jtsʼaklitik batel li kʼusi la spase (1 Ped. 2:21).

Jnoptik xtok ta sventa li kartaetik la stakik batel jtakboletik ta tsobobbailetik li ta baʼyel sigloe. Te van junuk karta ti la stsʼiba li Pabloe muʼyuk te laj yichʼ tikʼel li ta Vivliae (Col. 4:16). ¿Mi ta van xkil-o jvokoltik ta mantal ta skoj noʼox ti muʼyuk laj yichʼ tikʼel ta Vivlia li karta taje? Moʼoj. Li Jeovae snaʼoj li kʼusi chtun kuʼuntike xchiʼuk jaʼ chakʼbutik li kʼusitik mas chijtsatsub-o yuʼun ta mantale (Mat. 6:8).

Li avie, oy junantik jtsop yajtuneltak Jeova ti mas ep veʼlil yuʼunike ti jaʼ mu sta li yantike. ¿Mi chakʼopoj ta yan kʼop ti jutuk tajek li vunetik ta akʼope? Mi jaʼ jeche, pato avoʼonton ti oyot ta yoʼonton li Jeovae. Chano li vunetik ti oy ta akʼope xchiʼuk mi xuʼ avuʼune, batan ta tsobajeletik ta junuk kʼop ti xavaʼi leke. Naʼo me ti tskoltaot Jeova sventa tsotsukot-o li ta mantale (Sal. 1:2; Heb. 10:24, 25).

4. Mi chʼabal avuʼun bu xakʼel li kʼusitik yichʼoj lokʼesel li ta pajina jw.org, ¿mi ta van xakʼunib ta mantal ta skoj taje?

Li ta jpajinatike yichʼoj akʼel skopiail revistaetik xchiʼuk yan vunetik ti jaʼ sventa jchan-o Jvivliatike. Li pajina ta Internete yichʼoj tal mantaletik sventa skolta nupultsʼakaletik, chex kerem tsebetik xchiʼuk li buchʼutik bikʼit to yalab xnichʼnabike. Ta me stabeik sbalil utsʼ alaliletik mi la xchanik li ta Yichʼel ta Mukʼ Jeova ta Kutsʼ Kalaltike. Li ta jpajinatik xtoke te chal tsobajeletik ti tsotsik skʼoplal echʼeme, jech kʼuchaʼal li Chanob vun ta Galaade xchiʼuk li yaʼyejal ta sventa li tsobajel ti chichʼ pasel jujun jabile, xchiʼuk te chichʼ alel kʼusitik chkʼotanuk ta pasel ta spʼejel Balumil ta sventa mi oy kʼusi tsots kʼot ta pasel ta skoj nojelal ta voʼ, nikel o yan kʼusitik, xchiʼuk li kʼusitik yichʼoj chapanel ta stojolal ajvalil li ta steklumal Jeovae (1 Ped. 5:8, 9). Li jpajinatik xtoke jaʼ jun lekil abtejebal ta sventa li cholmantale, ti jaʼ xuʼ te xaʼiik lekil aʼyej li ta lumetik ti mu x-akʼbat xcholik mantale.

Pe akʼo mi jech, xuʼ me lek tsots oyot ta mantal, akʼo mi xuʼ xa-och li ta jpajinatike o mi muʼyuk. Li j-abtel ti tukʼ yoʼontone tsots ch-abtej sventa oyuk ta vun li veʼlil ta mantal yoʼ lekuk makʼlinbil ta jujuntal li xchiʼiltak ta abtele. Jaʼ yuʼun, mu me sujbiluk xa xavaʼi ti xaman junuk a selular, akomputadora o yan kʼusitik sventa cha-och li ta pajina ta jw.org. Junantike xuʼ van tsnop tspasik imprimir jaylikuk noʼox jvuntik ti te oy ta jpajinatik ta Internete xchiʼuk jaʼ chakʼbeik li buchʼutik muʼyuk bu xuʼ x-ochik ta Internete, akʼo mi muʼyuk jech chkʼanbatik ta tsobobbail ti jech spasike.

Ta jtojbetik ta vokol Jesús ti chakʼbutik onoʼox li veʼlil ta mantale. Kʼalal yantik xa xijnopajutik ta slajebal li kʼakʼale mas xa anil chtal slajeb, ta skoj ti toj tsotsik xa kʼusitik chkʼot ta pasel li avi kʼakʼale jnaʼojtik lek ti Jeovae chakʼbe ta «yorail» noʼox sveʼel li yajtuneltake.