Chapano xa noʼox aba yoʼ x-epaj li avabtele
1. ¿Kʼusi xuʼ xkakʼtik ta ilel li ta yorail Snaʼobil slajel Cristoe, xchiʼuk bakʼin xuʼ jchapan jbatik ta sventa taje?
1 Li ta jujun yorail Snaʼobil slajel Cristoe xuʼ xi xkaltik eke: «Mu xlaj o coʼnton ta stojbel ta vocol [li] Mucʼul Dios[e]» (Sal. 109:30). ¿Mi chavepajes avabtel sventa chavakʼ ta ilel ti chatojbe ta vokol Jeova ti laj yakʼ li matanal pojelale? Jaʼ xa me yorail chachapan aba (Pro. 21:5).
2. ¿Kʼusi la spasik yantik ti laj yichʼ jutukajesel ti kʼuyepal chichʼ kʼanel sventa li prekursor auksiliar ta avrile? ¿Kʼusi la apas li voʼote?
2 Prekursor auksiliar. Li echʼ jabile, li tsobobbailetike, toj lek laj yaʼiik ti jutukaj ti kʼuyepal chichʼik kʼanbel li prekursor auksiliaretik ta avrile. Xi laj yal jun kereme: «Ta skoj ti oyun to ta preparatoriae muʼyuk to ochemun ta prekursor regular. Pe sventa li avrile ta jtikʼ jsolisitud sventa ti jaʼ xa noʼox 30 ora chichʼ kʼanele, akʼo mi jech, chkakʼ persa ta jtsʼakubtas li 50 orae. Jun ermana ti sjunul kʼakʼal ch-abteje, laj yal: «¡Kʼun noʼox ta tael maʼ 30 orae!». Kʼalal laj yichʼ alel li aʼyej taje, xi laj yal jun ermano ti mas xa ta 80 sjabilale xchiʼuk ti tun toʼox ta prekursore: «¡Taje jmalaoj xa onoʼox tajek! ¡Li Jeovae snaʼoj lek ti la jkʼupin tajek ta jkuxlejal li prekursorale!» Jlom ermanoetik ti muʼyuk xuʼ yuʼunik tunik ta prekursor auksiliar li echʼ avrile jaʼ noʼox mas la xcholik mantal.
3. ¿Kʼu yuʼun lek sta-o jnoptik chij-och ta prekursor auksiliar li ta marso, avril xchiʼuk mayoe?
3 Li xtal marsoe xuʼ jnoptik xij-och ta prekursor auksiliar yuʼun jaʼ noʼox chichʼ kʼanel 30 o 50 ora xtok. Jech xtok, li ta sabado 17 yuʼun marsoe chlik jun kampanya sventa ta jtaktik ta ikʼel krixchanoetik ti akʼo xbatik li ta Snaʼobil slajel Cristo ta 5 yuʼun avrile. Ta melel, ep buchʼutik ta jkʼupintik tajek li abtelal ta prekursor auksiliar ta marsoe, jech oxal, xuʼ van jech ta jkʼan chijtun xtok li ta avril xchiʼuk mayoe, jaʼ noʼoxe 50 ora chichʼ kʼanel.
4. ¿Kʼuxi xuʼ mas xij-abtej ta cholmantal, xchiʼuk kʼusi xuʼ chkʼot ta pasel yuʼun?
4 ¿Kʼu yuʼun mu xaloʼiltaik kʼuyelan xuʼ xavepajesik ta jujuntal li avabtelik ta cholmantal li xtal Akʼobal sventa Yichʼel ta Mukʼ Jeova ta Kutsʼ Kalaltike? (Pro. 15:22.) Kʼanbo Jeova ti akʼo yakʼbe bendision li kʼusitik chapase (1 Juan 3:22). Mi chavepajes li avabtel ta cholmantale, maʼuk noʼox chakʼupil kʼopta li Jeovae, moʼoj, mas chamuyubaj ek (2 Cor. 9:6).