Lekubuk batel mas ti kʼu yelan xijtojob ta cholmantale: oyuk ta koʼontontik li krixchanoetike

Kuʼ yuʼun tsots skʼoplal. Li Jesuse laj yakʼ ta yoʼonton li krixchanoetike. Oy jun velta ti bat xpoxta jun vinik ti pakʼchikine, pe ta skoj ti laj yakʼ venta ti chiʼ li vinike stuk noʼox laj yikʼ lokʼel sventa mu xilik li yan krixchanoetike (Mar. 7:31-35). Tstsak ta venta li yajtsʼaklomtake xchiʼuk muʼyuk bu chchʼajubtas ta epal mantal, yuʼun snaʼoj ti bu noʼox kʼalal xuʼ yuʼunike (Juan 16:12). Li avi eke jech-o oy ta yoʼonton krixchanoetik akʼo mi te xa oy ta vinajel (2 Tim. 4:17). Li melel yajtsʼaklomutik Cristo eke chkakʼtik persa xchanbel stalelal li Jesuse (1 Ped. 2:21; 1 Juan 3:16, 18). Sventa lek kʼusi chkʼot ta pasel kuʼuntik li ta cholmantale skʼan oyuk ta koʼontontik li krixchanoetike, jtsaktik ta venta li kʼusi chkʼot ta xkuxlejalike, li kʼusi oy ta yoʼontonike xchiʼuk li kʼusi tsvul-o yoʼontonike. Mas me oy ta yoʼonton chchikintabutik kʼalal chakʼik venta ti yuʼun oy ta koʼontontik li krixchanoetike, ti maʼuk noʼox chbat jcholbetik mantal o chbat kiktabetik jlikuk vune.

Kʼuxi ta pasel:

Chapano aba lek. Mu xaxiʼ, oyuk slekil avoʼonton xchiʼuk stseʼetuk noʼox me li asate.
Kʼelo li kʼusitik oy ta apat axokone. ¿Mi oy van kʼusi chakʼ ta ilel ti oy yalab xnichʼnabe, ti tskʼupin stsʼunel nichime o ti oy stsʼunbolal chonbolome? ¿Mi oy van srelijion? Li kʼusitik taje xuʼ jaʼ xatsak ta venta kʼalal chalikes aloʼile.
Jakʼbo kʼusi tsnop xchiʼuk chikintabo lek li kʼusi chale, mu xatuchʼbe ta be li sloʼile. Kʼelbo sat sventa xakʼ venta ti yakal chachikintabee. Tojbo ta vokol li kʼusi chale xchiʼuk mi oy kʼusi stakʼ xakʼupil kʼopta-oe, albo me yaʼi. Mu xasaʼ kʼop.
Jtunestik li kʼusi mas lek ta xaʼiike. Jelo slikeb aloʼil sventa jaʼuk xavalbe skʼoplal li kʼusi oy ta yoʼonton li krixchanoe. Mu toj vokoluk ta pasel, yuʼun li tratadoetik, foyetoetik xchiʼuk li revistaetike yichʼoj tal ep ta tos loʼiletik ti xuʼ jchiʼintik-o ta loʼil li krixchanoetike. Mi jaʼo lakʼot kʼalal oy kʼusi tspas li krixchanoe, mu me xa jalij.

Paso jech sjunul u liʼe:

Chanulano kʼuxi xuʼ jaʼ xaloʼilta li kʼusi oy ta yoʼonton krixchanoetik kʼalal jaʼo ch-echʼ avuʼun li yichʼel ta mukʼ Jeova ta avutsʼ avalale o kʼalal chachol mantale.
Li buchʼu chetʼes li tsobajel sventa cholmantale xuʼ xal xtok yan kʼuxitik xuʼ xkakʼtik ta ilel ti oy ta koʼontontik li krixchanoetike o xuʼ xichʼ akʼel ta ilel skʼelobil.