Kolosenses 3:23 | «Scotol li cʼusiuc noʼox chapasique, pasic ta scotol avoʼntonic»

«Kʼusiuk noʼox ti yakal chapasike pasik ta sjunul avoʼontonik ta sventa Jeova, maʼuk ta sventa krixchanoetik» (Kolosenses 3:23, Xchʼul Kʼop Dios sventa Achʼ Balumil).

«Scotol li cʼusiuc noʼox chapasique, pasic ta scotol avoʼntonic. Jaʼuc me chaʼabtejic yuʼun Cajvaltic chavaʼyic. Mu xanopic ti cristiano chaʼabtejic yuʼune» (Colosenses 3:23, Xchʼul Cʼop Jtotic Dios, ta skʼop Chenalhó).

Li kʼusi skʼan xal Kolosenses 3:23

Li yajtsʼaklomtak Kristoe skʼan xakʼbeik yipal ti kʼu yelan ch-abtejike, yuʼun te snitojbe sba skʼoplal xchiʼuk ti kʼu yelan chichʼik ta mukʼ li Jeovae.

«Kʼusiuk noʼox ti yakal chapasike». Li buchʼutik tskʼan chichʼik ta mukʼ Jeovae, chakʼik persa yakʼel ta xkuxlejalik skotol li kʼusi chal Vivliae. Li ta snaik, ta yabtelik xchiʼuk li ta eskuelae, chakʼik persa jujun kʼakʼal ti jaʼikuk lekil j˗abteletik, ti lekuk stalelalik xchiʼuk ti spatuk yoʼontonik ta stojolalike (Proverbios 11:13; Romanos 12:11; Ebreos 13:18).

«Pasik ta sjunul avoʼontonik». Kʼalal paso «ta sjunul avoʼontonik» xie, li ta griego kʼope chakʼ ta aʼiel «ti jaʼ li buchʼu chakʼ persa xchiʼuk ti tspasbe yabtel Dios ta sjunul yipale».a

Jaʼ yuʼun, li buchʼu jech tspase chakʼ persa sventa lekuk stunes yipal xchiʼuk snopben sventa lekuk xbat ta pasel yuʼun li kʼusi sbainoje. Kʼalal «pasik ta sjunul avoʼontonik» xie, junantik Vivliaetike xi sjelubtasojike: «Pasic ta slequilal yutsilal avoʼntonic» (Xchʼul Cʼop ti Jtotic Diose, ta skʼop Chamula) o «pasic ta slequilal avoʼntonic» (Ti Achʼ Rextomento yuʼun ti Jesucristoe, ta skʼop Chamula). Kʼelo «Kolosenses 3:23 ta yan Vivliaetik».

«Ta sventa Jeova, maʼuk ta sventa krixchanoetik». Kʼusuk abtelal spasik li yajtsʼaklomtak Kristoe chakʼ ta yoʼontonik spasel, mu venta kʼusiuk abtelal, yuʼun snaʼojik lek ti te snitojbe sba skʼoplal ti kʼu yelan xil sbaik xchiʼuk li Jeovae. Maʼuk tspasik sventa lekuk x-ilatik yuʼun li yajval yabtelik o li krixchanoetike, yuʼun li kʼusi mas tsots skʼoplal chaʼiike jaʼ ti lekuk x-ilatik yuʼun li Jeovae. Kʼalal lek snaʼ x-abtej li jun yajtsʼaklom Kristoe xchiʼuk ti lek stalelale maʼuk noʼox lek skʼoplal chkom, yuʼun lek skʼoplal chkom xtok li Dios ti chichʼ ta mukʼe. Kʼalal jech chichʼ pasele jaʼ «sventa mu chopoluk xichʼ albel skʼoplal li sbi Diose» (1 Timoteo 6:1; Kolosenses 3:22).

Stsʼak loʼil ta Kolosenses 3:23

Li karta sventa Kolosensese jaʼ la stsʼiba jtakbol Pablo ti jaʼ la stakbe batel li yajtsʼaklomtak Kristo ti te nakalik li ta voʼneal jteklum Kolosase.b Jaʼo van la stsʼiba kʼalal jutuk xa’ox skʼan xlokʼ li ta sba velta och ta chukel ta Roma, ti tetik van ta sjabilal 60 o 61.

Li karta li’e, yichʼoj tojobtaseletik ti jtunel yuʼun skotol li yajtsʼaklomtak Kristo ti mu ventauk bu likemik tal o ti kʼu yelan xkuxlejalike, yuʼun xuʼ jmoj xichʼik ta mukʼ li Diose (Kolosenses 3:11). Jech xtok, tstijbe yoʼonton sventa xchanbeik stalelal li Diose, jech kʼu chaʼal li kʼanelal, slekil oʼontonal xchiʼuk li kʼuxubinele (Kolosenses 3:12-14). Chal xtok, kʼalal chichʼ ta muk’ Dios li jun krixchanoe, te chvinaj ta skotol li kʼusi tspas ta xkuxlejale (Kolosenses 3:18-4:1).

Kolosenses 3:23 ta yan Vivliaetik

«Cʼusiuc noʼox ta xapasique, pasic ta slequilal yutsilal avoʼntonic ti coʼoluc sʼelan jaʼ avacʼoj abaic ta tunel yuʼun ti Cajvaltique, ti maʼuc noʼox ta xatun yuʼun ti jnaclejetic ta banomile» (Xchʼul Cʼop ti Jtotic Diose, ta skʼop Chamula).

«Scotol li cʼustic chaʼacʼbat apasic yuʼun la avajvalique, ta slequil yutsil me avoʼonic xapasic. Mi jech chapasique, jaʼ ta sventa Cajvaltic chaʼabtejic, mu crixchanouc noʼox chaʼabtejic yuʼun» (Achʼ Testamento, ta skʼop San Andrés).

«Scotol li cʼusitic chacʼ apasic lavajvalique, sjunul me avoʼon xapasic. Mi yech chapasique, jaʼ chaʼabtejic yaʼel yuʼun ti Cajvaltique; maʼuc crixchano yaʼel ti chaʼabtejic yuʼune» (Scʼop Riox, ta skʼop Zinacantán).

«Cʼusiuc noʼox ti ta xapasique, pasic ta slequilal avoʼntonic ti coʼoluc sʼelan ti tey avacʼoj abaic ta tunel yuʼun ti Cajvaltique. Yuʼun maʼuc noʼox ta xatun yuʼun ti cristianoetique» (Ti Achʼ Rextomento yuʼun ti Jesucristoe, ta skʼop Chamula).

Sventa xavaʼibe smelolal kʼusi chal li karta sventa Kolosensese, kʼelo li video liʼe: