Toj tsots xkʼuxul xchiʼuk mu noʼox x-echʼ

MU TO toj voʼneuk laj yichʼ chanel sventa chichʼ naʼel kʼuyelan chaʼi sbaik li buchʼutik chokʼitaik tajmek jun yutsʼ yalalik ti skʼanojik tajmek ti oy xa sjalil slajele. Sventa taje laj yichʼ takel batel sjakʼobiltak jayibuk totil-meʼiletik ti oy xa sjabilal slajel yalab xnichʼnabike. Mu skotoluk la stakʼik. Jun totil ti Vladimir sbie laj yal ti manchuk mi voʼob xa jabil slajel li xnichʼone, toj kʼux to la chaʼi mi loʼilaj ta sventa taje.a

Stalel onoʼox ti totil-meʼiletik ti yiloj kʼux svokolik kʼuchaʼal taje mu x-echʼ chaʼiik li xkʼuxule. Wiliam, ti lajuneb xa jabil yechʼel ijikʼav ta voʼ jun xnichʼon ti vaxaklajuneb jabil yichʼoje, xi laj yale: «Mu to x-echʼ xkaʼi xkʼuxul snaʼel, jaʼ jun yayijemal ti muʼyuk chmak-o ti kʼu sjalil kuxulune», xi. Jech chaʼi sba Lucy, ti kʼalal lokʼ xaʼox voʼob jabil slajel yol ti anil noʼox ilaj ta skoj chamele, xi la stsʼibae: «Kʼalal jun chib toʼox kʼakʼal slajele xi chkalilane: “Mu jchʼun chkaʼi, mu jchʼun chkaʼi”. Chkale jaʼ noʼox mu chopol vaychil xchiʼuk ti mu xa jaluk chi julave. Pe ta mas jelavele te laj kakʼ venta ti melel li kʼusi yakal chkʼot ta pasele xchiʼuk kʼot ta koʼonton ti mu xa bu tsut talel li jkereme. Manchuk mi jelav xa voʼob jabil, bakʼintike ta to xkokʼita kʼalal jtuk oyune», xi.

¿Kʼu yuʼun toj tsots xchiʼuk ti mu noʼox x-echʼ xkʼuxul chaʼiik li Vladimir, Wiliam, Lucy xchiʼuk yantik totil-meʼiletik ti jech staoj svokolik eke? Jkʼelbetik junantik srasonal.

¿Kʼu yuʼun toj tsots xkʼuxul kʼalal chcham jun alab-nichʼnabile?

Kʼalal chvokʼ jun olole, li totil-meʼiletike ep kʼusi chaʼi ta yoʼontonik ti mu kʼusi jech xkoʼolaj-oe. Spetel li uni neneʼe, skʼelel kʼuyelan ta x-och svayel o skʼelel li yuni tseʼeje jaʼ ch-akʼbat ep smuyubajelik xchiʼuk xkuxetel yoʼontonik. Li lekil totil-meʼiletike ta xkʼuxul yoʼonton tskʼel li yalab xnichʼnabike xchiʼuk chakʼbeik yipal xchanubtasel kʼuyelan xuʼ lek xichʼ smelolik xchiʼuk ti lekuk noʼox stalelalike (1 Tesalonicenses 2:7, 11). Kʼalal chakʼik venta ti mu altikuk chlikik ta akʼobaltike, xmuyubajik noʼox xchiʼuk chlik xa snopik kʼusi xuʼ spas mi chʼi li sneneʼike.

Li lekil totil-meʼiletike toj ep ch-abtejik xtok yoʼ tsmakʼlin yalab xnichʼnabik. Ta van skʼej stakʼinik o kʼusitik yuʼunik sventa tskolta yalab xnichʼnabik kʼalal mi la saʼ snup xchiʼilik ta jelavele (2 Corintios 12:14, Ch). Kʼalal ta jnoptik kʼuyelan chaʼi sbaik, chlikik ta akʼobaltik, chakʼ skʼakʼalik xchiʼuk ti ep chlaj stakʼinik li totil-meʼiletik sventa tstsʼites li yalab xnichʼnabike, lek xvinaj ti tskʼanik akʼo xchʼie, ti mu skʼanik xchame. Kʼalal chcham jun yol xnichʼonike, li yabtel totil-meʼile muʼyuk bu tsʼakal chkom, xchiʼuk li spatobil yoʼontonik ta sventa kʼusi ox tskʼanik kʼalal mi chʼie te noʼox chchʼab. Mu xa xuʼ xakʼbeik ta ilel ti skʼanojik tajmeke, yuʼun li lajelale, xkoʼolaj kʼuchaʼal jun mukʼta ton ti skakanoj sba ta stojolal li totil-meʼiletik xchiʼuk li anima yolike. Kʼalal chlaj jun olole chakʼbe michʼ oʼontonal li totil-meʼiletike, jun tsatsal vokolil ti tsots ta ichʼel batele.

Li Vivliae chal ti toj kʼux ta aʼiel xchiʼuk ti mu noʼox x-echʼe. Jech kʼuchaʼal chalbe skʼoplal kʼuyelan iyaʼi sba Jacob kʼalal la snop ti chamem xaʼox li xnichʼon ti José sbie, xi ta jkʼeltike: «Jech te la sliʼ scʼuʼ li Jacobe; la slap cʼuʼil sventa meʼnal ti chʼixlajan ta lapele. Ep cʼacʼal laj yocʼta, laj yat yoʼnton ta sventa ti icham li xnichʼone. Scotol li squeremetic xchiʼuc stsebetique la spatbeic yoʼnton li stotique, pero li stuque muc scʼan patbel yoʼnton. Jaʼ noʼox te chlic yocʼta yan velta li xnichʼone, jech laj yal: “Mu xchʼay ta coʼnton o li jnichʼone. Ep ta jnaʼ; jaʼ to chchʼay ta coʼnton me bat jchiʼin ta yavil chʼulelale [o animae]». Kʼalal echʼ xaʼox jayibuk jabile, li Jacobe chokʼita to li xnichʼon ti la snop ti chamem xaʼoxe (Génesis 37:34, 35; 42:36-38). Yan skʼelobil kuʼuntike jaʼ li Noemie, jun ants ti tukʼ yoʼonton ta sventa Jeova ti ilaj chaʼvoʼ skereme. Ta skoj ti toj kʼux laj yaʼie, la skʼan ti akʼo xa mu x-albat Noemí, ti jaʼ skʼan xal «xcuxet yoʼnton chcʼopoj», xie, la skʼan ti akʼo xbiiltasat Mara, ti jaʼ skʼan xal «chʼa, o at-oʼnton» (Rut 1:3-5, 20, 21, tsʼib ta yok vun).

Jech un chaʼa, li Vivliae maʼuk noʼox chakʼ ta ilel ti kʼuyelan svokol chaʼiik li totil-meʼiletike. Ta xal xtok ti Jeovae ta stsatsubtasbe yoʼonton, tspatbe yoʼonton li buchʼutik chokʼitaik slajel junuk yalab xnichʼnabike. Li ta yan loʼile te chlik jkʼeltik junantik kʼusitik ta stunesan.

[Ts’ib ta yok vun]